Dual PanelNanian pa’parundena Debora
1Allo iato menanimi tu Debora sola Barak, anakna muane Abinoam, nakua:
2Belanna umpakalando beluakna tu tau lan Israel, belanna ussorong kalena tu to buda, iamoto pudimi tu PUANG!
3Perangiimi, e mintu’ datu! Tanannimi talinga, e mintu’ to paa! La moraina’, la morai tonganna’ umpenanian PUANG, umpenanianna’ pa’pudian PUANG, Kapenombanna to Israel.
4O PUANG, iatomMi tassu’ lan mai Seir, tomMi mentengka tarru’ dio mai padangna Edom, lino’mi te lino sia rutu’mi tu langi’, sia iatu gaun umpato’do uai.
5Tiseno-senomi tu mintu’ buntu dio oloNa PUANG, moi na iatu Sinai tiseno-seno duka dio oloNa PUANG, Kapenombanna to Israel.
6Iatu linona Samgar, anakna muane Anat, iatonna linona Yael, iatu mintu’ batatta makarorrong, na minda-minda tu parallu tongan umpolalan batatta, unnolamo lalan sumepang.
7Tae’ tu panglalan dio Israel, tonganna tae’ tu panglalan, sae lako bendankomi, Debora, bendan butung to misa’ indo’ lan Israel.
8Iake napilei tau iato mai tu kapenomban ba’ru, dio bangmo babangan tu tananan ra’. Denraka ombo’ misa’ balulang ba’tu doke, dio lu patangpulo sa’bu to Israel?
9Naala penaangku tu mintu’ pangulu rarinna to Israel, iamotu mai to ma’lalan penaanna ussorong kalena, dio lu bangsa, pudimi tu PUANG!
10E kamu sola nasang, to ussakei keledai busa’, e kamu to unnisungi permadani, sia kamu mintu’ to lumingka, pokadami tu iannato.
11Umpeolai gamara pangala nanian dio to’ mata uai, melo ke iatu to buda umpenanian penggauran malambu’Na PUANG, penggauran lambu’na pangulunna dio lu to Israel. Attu iato solo’mi tu mintu’ taunNa PUANG lako to’ babangan.
12Mainga’ko, mainga’ko, e Debora! mainga’ko, mainga’ko, popenaniko misa’ sengo! Bendanmoko, e Barak! solanni tu to murampa, e anakna muane Abinoam!
13Attu iato iatu mintu’ to lussu’ Napadadimo Puang umparenta to la’bi’, Napadadimo PUANG tu taunNa ma’parenta butung to lalong, untunduina’.
14Dio mai Efraim nanii sae tu mintu’ tau tu torro dao buntu Amalek undi unturu’ko, e Benyamin, sola mintu’ kaponanmu; dao mai Makhir nanii solo’ tu mintu’ pangulu, sia dio mai Zebulon nanii sae tu tau untangke tekken pangarak;
15ia duka tu arungna Isakhar sola Debora. Sia susi Isakhar solo’ rokko, susi dukato tu Barak! Undimi sipa’dondo-dondoan tu tau rokko lombok. Dio lu golonganna Ruben budapa tu pa’tangngaranna.
16Ma’apari mutorro bangra unno’ko’ dio lu to’ barung tedong, sia marassan umperangii passuling dio to’ patuoan ma’baanan? Dio lu golonganna Ruben budapa tu pa’tangngaranna.
17Iatu Gilead torro bang kappa sambalinna lu Yordan, ma’apai tu Dan natorro bang dio to’ kappala’? Iatu Asyer torro bang dio lu biring tasik kalua’, sia torro bang ma’pakappa dio lu to’ tasik mengkokona.
18Apa iatu Zebulon misa’ bangsa tang umpa’tinakkai katuoanna, susi dukato tu Naftali dio padang madao.
19Saemi tu mintu’ datu anna parari, attu iato pararimi tu mintu’ datu Kanaan, dio Taanakh, dio biring salu Megido; moi sangti’pek salaka tae’ duka narampa.
20Dao duka mai langi’ parari tu bintoen, tassu’ lan mai lalanna ullaoi Sisera.
21Iatu salu’-salu’ Kison untallananni tu tau iato mai, tu salu’-salu’ inang den dolo-dolonapa tu salu’-salu’ Kison – tarru’ liumoko e sumanga’ku situang kamatotorans-
22Sigalunturan tu mai kalungkung darangna, belanna napatinno’ to lalong.
23Tampakki ropu to Meros, kadanna Malaeka’Na PUANG, tampakki ropu, tampakki ropu tu pa’tondokanna, belanna tae’ nasae umpennoloan pa’tunduan lako PUANG, umpennoloan pa’tunduan lako PUANG susito lalong.
24Losong upa’na tu Yael na mintu’ baine, iamotu bainena Heber, to Keni, losong ia upa’na na iatu mintu’ baine torro lan lu tenda.
25Uai napalaku Sisera, apa pangandu’ nabenni Yael; natadoan bumbungan makko lan misa’ irusan mellong.
26Kumorongmi unnala petana’, unnulumi lima kananna unnala pepa’tong to pande, napa’tongi tu Sisera, natarru’i tu ulunna, nalo’po’mi natarru’i tu pili’na.
27Menggerok-gerok lan to’ lentekna Yael, anna songka sumpandan dio, menggerok-gerok lan to’ lentekna anna songka, dio tu inan nanii menggerok-gerok, inde dukato nanii songka, tang nasau’mo.
28Dao mai to’ pentiroan mentiromi tu indo’na Sisera, sia metamba dao mai to’ tarali, nakua: Ma’apai’ anna marempara sae tu karetana? Ma’apai anna tang dirangipa tu gumalugunna karetana?
29Iatu mai baine mase’ponna tu liu matarru’ umpebalii, ia kalena dukamo umpebalii tu kadanna, nakua:
30Ma’apai nala tang unnappa’ pangrampa, nataa-taai, ke simisa’o muane misa’ ba’tu da’dua baine napotaa, iatu sampin sanda rupanna napopangrampa Sisera, pangrampa iato sampin sanda rupanna, sia passulan ma’ba’na sura’na, pangrampa iato passulan ma’ba’na sura’na, sangpasang disamboan barokoku?
31Susimoto la sanggang tu mintu’ ualimMi, o PUANG! Apa iatu mintu’ to ungkamali’ Puang la susito allo dellek mapannang. Mangkato marampa’mi tu tondok patangpulo taunna.