Dual PanelKatangmengkatobaranna to Efraim
1IangKu la umpakatanai sule tu to Israel, la payan tu kakelokanna Efraim sia kakadakeanna Samaria. Belanna ma’pakena bang: tama bang tu to boko, anna mangrampa tuntunan pa’gora’ dio salian.
2Tae’ nakilalai, kumua iatu mintu’ kakadakeanna Kupalan penaa. Totemo natikuimo gau’ kadakena, sia dio nasangmo oloKu.
3Napasende kakadakeanna tau iato mai tu datu sia mo’rangna tu mai arung.
4Mintu’ tau iato mai pasandak salu lako rampanan kapa’, butung to dapo’ tang pa’de apinna, moi na iatu to unggaragai roti tae’mo umpadukku apinna, belanna ullemun ta’pung, sae lako messu’mo.
5Iatonna allo kapuana datunta, napelangoi uai anggoro’ tu mai arung. Natadoan limanna tu to tae’mo apa nadampang.
6Apa napamalassu tu penaanna tete dio pa’pakena butung to dapo’; moi anna mamma’ situ’turan bongi tu to unggaragai roti, melambi’o to malassu bang tu dapo’ susi api ma’lana-lana.
7Iatu mintu’ tau iato mai malassu susi dapo’. Pura namangsanni tu mintu’ to ma’parentana, sia mintu’ datunna tibambangmo mate. Moi misa’ tau dio lu tau iato mai tae’ nameongli’ lako Kaleku.
8Iatu Efraim umpasirau kalena mintu’ bangsa. Iatu Efraim susi misa’ pa’ranggina tang dibaliangan.
9Napurai to salian lembang tu kamawatanganna, apa tae’ nasa’dingi. Ondongpi nasitutu’imo uban, apa tae’ naissanni.
10Sia iatu matampona Efraim kendek dio tingayona titanan sa’bi umpasalai. Apa tae’ namengkatoba’ lako PUANG, Kapenombanna, sia tae’ nadaka’i tu Puang, moi narampoi te mintu’na apa iate.
11Susi bang bu’ku’ baga tu Efraim, tae paissanna. Natambai tu Mesir la untundui, namaleo lako Asyur.
12Ianna male lako, la Kusalokko’i dalla’Ku tu tau iato mai. La Kutobangan tu tau iato mai susi manuk-manuk dao mai langi’. Ianna marekomo tu tuntunanna, Kutingkanmi.
13Upu’ allona tu tau iato mai, belanna male umboko’iNa’! Sumpu sumandakna, belanna sepangmo dio mai Kaleku. Moi mangkamo Kurampanan, tontong duka ma’kada mo’rang lako Kaleku.
14Tae’ duka nadio mai penaanna tu tau iato mai metamba lako Kaleku, ke sumarroi dao patindoanna. Natori’-tori’ piso tu kalena umpalaku gandung sia uai anggoro’ ba’ru; pabali-bali tongan tu tau iato mai lako Kaleku.
15Moi Kuada’i sia Kupamawatang tu takia’na, apa nenne’ bang untangnga’ kadake unneaNa’.
16Messaile sia tu tau iato mai, apa tae’ nalu langngan; butungi to misa’ pana disanga melo, apa tae’mo gai’na. Iatu mai arungna la tibambang nakande pa’dang natumang kada layukna. Dionamo to nanii tau ullo’boi lan lu tondok Mesir.