Dual PanelTae’ kamenomban dio lu tondok senga’
1Da musende-sende, e Israel, ammu mela’tek-la’tek, susi mintu’ bangsa, belanna sorong boko’moko dio mai Kapenombammu sia pasandak salu lako rampanan kapa’, ammu kamorai saro gau’ sala dao lu mintu’ panglulluran gandung.
2Iatu panglulluran sia pa’parran anggoro’ tae’mo nala umpabu’tuanni tu apa dikande sia diiru’ sia la napakenamo uai anggoro’ ba’ru.
3Tae’mo nala torro lan tondok PUANG tu tau iato mai, sangadinna iatu Efraim la sule lako Mesir, sia la ungkande apa tang masero dio lu Asyur.
4Tae’ anna untedokan uai anggoro’ PUANG tu tau iato mai, sia tae’ anna alai penaanNa Puang tu pemala’ pangrere’na; disanga kande ro’ lako kalena tau iato mai; mintu’ tau tu ungkandei urruttakki kalena, belanna iatu roti iato la napokandena siamo, sia tae’ anna ma’din dibaa tama banuanNa PUANG.
5Apara la mipogau’, ke allo kapua sia iake allo pa’gauranNa PUANG?
6Belanna, moi anna tilendok dio mai kasanggangan, la narampun duka Mesir, sia la napeliang Memfis. Ria la ussitutu’i tu ianan salakana sia duri la tuo lan lu tendana.
7Saemo tu allo kadiukungan, saemo tu allo pa’papakkan. La naperasai to Israel te iannate. Iato nabi iato baga sia iatu to natamai penaa bomboan, napobua’ kakapuanna kakadakeammu sia belanna kakapuanna tu kamabirisan.
8Iatu to ma’kampana Efraim dio oloNa Kapenombangku, iamo nabi – misa’ poyana to ma’poya dio mintu’ lalanna, sia kamabirisan lan banuanNa Kapenombanna.
9Lendu’ ia kadakena penggauranna, susi lan allona Gibea: La Nakilalai Puang tu kakadakeanna sia la Naukung tu kasalanna.
Efraim tang membati’
10Kukabu’tuimo tu Israel susi bua anggoro’ dio padang pangallaran; iatu nene’ to dolomi Kutiro susi bua ara bunga’, iamotu pamulanna dio garonto’ ara. Apa tau iato mai male lako Baal-Peor, sia mengkaola lako deata mesirisan; iamoto megallian tu tau iato mai susitu apa nakamali’.
11Iatu kamala’biranna Efraim la mettia’ male susi manuk-manuk; tae’mo tau la dadi, tae’mo tau la ma’tambuk, iatu inan tau tang la kasampean.
12Moi umpelobo’i pia muane tu tau iato mai, la Kupasisayuran, naurunganni moi misa’ tau tae’mo torro. Manassa upu’ allona tu tau iato mai, ke untoyangammo’ Kaleku dio mai.
13Iatu Efraim, susitu mangka Kutiro, butung Tirus, tu ditanan lan misa’ pa’lak; apa totemo inang la nasorong Efraim tu anakna lako to papatean.
14Benni tau iato mai, o PUANG, tu sipatunna la Mibenni: benni tau iato mai tu inan tau tang kasampean sia susu tang sekka’.
15Mintu’ kakadakeanna sirampun dio Gilgal, iamoto inde dukato dio Kunii ungkabiri’i tu tau iato mai; belanna penggauran kadakena, angKu la unnula’i lan mai banuangKu. Sia tae’mo angKu kamasei; mintu’ arungna pabali-bali nasang.
16Iatu Efraim dipandasamo sia marangkemo tu daka’na; tae’mo anna la membua. Ianna la kianakpa, manassa la Kupatei tu sun dikalena tu napakaboro’.
17La Natibe Kapenombangku tu tau iato mai, belanna tae’ naperangii; iamoto anna salamba salao dio lu mintu’ bangsa.