Alkitab Mobile SABDA
[VER] : [TORAJA]     [PL]  [PB] 
 <<  Imamat 11 >> 

Diona olo’-olo’ masero sia olo’-olo’ maruttak

1Ma’kadami tu PUANG lako Musa sia Harun, Nakua ungkuanni:

2Ma’kadakomi lako mintu’ to Israel kumua: Inde sia tu olo’-olo’ ma’din mikande dio mai mintu’ olo’-olo’ lan lino.

3Mintu’ tu olo’olo’ ma’kasapak kalungkungna, iamotu olo’-olo’ tipa’dua kalungkungna, sia lenga’, ma’din mikande.

4Inde sia tu mintu’ olo’-olo’ lenga’ ba’tu ma’kasapakna kalungkungna tae’ mima’din la ungkandei, iamotu unta, belanna moi anna lenga’, apa tae’ nama’kasapak kalungkungna; manassa la maruttak to lako kalemi.

5Sia kalinti to’ batu, belanna moi anna lenga’, apa tae’ nama’kasapak tu kalungkungna; manassa maruttak to lako kalemi.

6Sia ia duka tu kalinti, belanna moi anna lenga’, apa tae’ nama’kasapak tu kalungkungna; manassa maruttak to lako kalemi.

7Sia ia duka tu bai, belanna moi anna ma’kasapak kalungkungna ondongpi tipa’dua kalungkungna, apa tae’ nalenga’; manassa maruttak to lako kalemi.

8Da mikandei tu duku’na, sia da duka mikaka’i tu batang rabukna; manassa maruttak to lako kalemi.

9Inde sia tu ma’din mikande tu mintu’ apa tuo diong lu to’ uai, iamotu mai kekaa-kaana sia kesissikna, tu diong lu to’ uai, sia diong lu tasik sia diong lu salu, iatu iannato ma’din mikande.

10Apa iatu mai tang kekaa-kaana sia tang kesissikna, diong lu tasik sia diong lu salu, tu mintu’na dio mai mintu’ apa siberongan lan to’ uai sia iatu mintu’ apa kepenaa diong lu to’ uai, la mipomagiang nasang tu mintu’nato.

11Tonganna la mipomagiang to; da mikandei tu duku’na sia la mikagi’gi’ tu batang rabukna.

12Mintu’ tu tang kekaa-kaana sia tang kesissikna diong lu to’ uai, la mipomagiang tu iannato.

13Inde sia tu mintu’ manuk-manuk la mikagi’gi’ tu tae’ nama’din dikande belanna dipomagiang, iamotu langkan maega, langkan sia langkan tasik,

14tengnge’ sia mintu’ pa’bulan sanda rupanna,

15mintu’ kadoya sanda rupanna,

16burung unta, totosik, manuk-manuk tasik sia mintu’ tarru’ sanda rupanna.

17Sia iatu langau to’ batu, koro’-koro’, langau sia langau mabusa,

18kayo, alo,

19tambolang ballau, mintu’ tambolang sanda rupanna, dora’ na ledo.

20Sia mintu’, olo’-olo’ pandiu tu kepani’na, iamotu umpopellese a’pa’ lette’na, mintu’nato la mipomagallian.

21Inde sia tu mintu’ olo’-olo’ pandiu tu kepani’na, iamotu umpopellese a’pa’ lette’na ma’din mikande, iamotu mai olo’-olo’ kepupu daona lu lette’na tu napopekkondong dao kuli’na padang.

22Inde sia tu ma’dinna mikande, iamotu mintu’ batik sanda rupanna, mintu’ pokkamurrung sanda rupanna, mintu’ batik padang sanda rupanna sia mintu’ pokkalondong sanda rupanna.

23Apa iatu mintu’ olo’-olo’ pandiu tu kepani’na, iamotu umpopellese a’pa’ lette’na la mipomagiang.

24Iamote tu mipobannang maruttak; minda-minda ungkaka’i tu batang rabukna manassa la maruttak sae lako makaroen,

25sia minda-minda unnangka’i tu batang rabukna, la nabusukki tu pakeanna, sia la maruttak sae lako makaroen.

26Iatu mintu’ olo’-olo’ ma’kasapak tu kalungkungna, apa tae’ natipa’dua kalungkungna, ba’tu tae’ nalenga’, iamo maruttak lako kalemi; minda-minda ungkaka’i la maruttak.

27Iatu mintu’ olo’-olo’ a’pa’ lette’na tu umpopellese pala’ lette’na, iamo maruttak lako kalemi; minda-minda ungkaka’i tu batang rabukna, la maruttak sae lako makaroen.

28Sia minda-minda unnangka’i tu batang rabukna, la nabusukki tu pakeanna sia la maruttak sae lako makaroen; mintu’nato maruttak lako kalemi.

29Inde sia tu maruttak lako kalemi tu mintu’na olo’-olo’ pandiu, tu pandiu dao kuli’na padang, iamotu tangali, balao sia mintu’ koko sanda rupanna;

30iatu anaka, puarang sia bulilik, bukoyo sia bulilik membali-bali rupanna.

31Iatu iannate tu mintu’na olo’-olo’ pandiu la maruttak lako kalemi; minda-minda ungkaka’i, ke matemi, la maruttak sae lako makaroen.

32Mintu’ tu apa natobangi olo’-olo’ iato, ke matei, manassa la maruttak; iatu mintu’ pa’pannian kayu ba’tu pakean ba’tu balulang ba’tu karung, pantanni tu mintu’ pareanan la dipatama to’ uai sia la maruttak sae lako makaroen; mangkato namane masero sule.

33Sia iatu pareanan litak natobangi olo’-olo’ iato – mintu’ tu apa lan la maruttak, ammi pokai tu pareanan iato.

34Mintu’ kande lan pa’pannian iato, tu ma’din dikande, namennuai la maruttak; sia mintu’ apa diiru’, tu ma’din diiru’ tu lan pa’pannian iato la maruttak.

35Sia mintu’ apa natobangi batang rabuk iato la maruttak: iatu dapo’ sia lalikan la dipoka; inang maruttak ia sia la mipomaruttak.

36Apa misa’ kalimbuang ba’tu misa’ bubun batu, iamotu pa’pannian uai la masero; apa minda-minda ungkaka’i tu batang rabuk iato, la maruttak.

37Iake denni tu batang rabuk iato, untobangi banne la diambo’, la tontong masero.

38Apa iake dibolloi uai tu banne iato, anna tobangi tu batang rabuk iato, la maruttak lako kalemi.

39Iatu olo’-olo’ mikandena, ke matei misa’, naminda-minda ungkaka’i tu batang rabukna, la maruttak sae lako makaroen.

40Sia minda-minda ungkandei tu duku’na la umbusukki pakeanna, sia maruttak sae lako makaroen; la susi duka minda-minda unnangka’i tu batang rabukna la umbusukki pakeanna sia maruttak sae lako makaroen.

41Sia mintu’ olo’-olo’ pandiu, tu pandiu dao kuli’na padang, la megiangan, tae’ nama’din dikande.

42Iatu mintu’ olo’-olo’ mendonglo’ sia mintu’ olo’-olo’ menono’ umpopellese a’pa’ lette’na, susi duka tu apa buda lette’na, iamotu mintu’ olo’-olo’ pandiu sanda rupanna, tu pandiu dao kuli’na padang, da mikandei, belanna megiangan.

43Iamoto da mipamako’do’ kalemi napobua’ ba’tumba olo’-olo’ pandiu sia da miruttakki kalemi diona olo’-olo’ iato.

44Belanna Akumo tu PUANG, Kapenombammi; pamaserokomi kalemi ammi masero belanna Aku te masero; da miruttakki kalemi napobua’ olo’-olo’ pandiu sanda rupanna, tu situtu’ dao kuli’na padang.

45Belanna Akumo PUANG tu ussolangkomi sun lan mai tondok Mesir, kumua Akumo tu Kapenombammi; la maserokomi, belanna Aku te masero.

46Iamote tu atoran diona mintu’ patuoan sia mintu’ manuk-manuk sia mintu’ a’gan kepenaanna tu sibi’tokan lan to’ uai sia mintu’ a’gan kepenaanna tu pandiu dao kuli’na padans-

47la umpasisengaranni tu maruttakna na iatu maserona, iamotu olo’-olo’ ma’din dikande na iatu tae’na nama’din dikande.


  Share Facebook  |  Share Twitter

 <<  Imamat 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel