Dual PanelDiona tongkonan palita sia roti dipennoloan
1Ma’kadami tu PUANG lako Musa Nakua:
2Suami tu to Israel anna baai lako kalemu tu minna’ masero dio mai saitun dilambuk, la dipatama tongkonan palita, sia dipasakka’ natontong bang dukku tu palita iato.
3Dio salianna kulambu kasa’bian lan Tenda Kasitammuan la nanii Harun tontong ungkaritutui randuk dio mai makaroen sae lako melambi’na dio oloNa PUANG. Iamote tu aluk dipondok matontongan lako bati’mi.
4Dao tongkonan palita bulaan massang iato la nanii tontong umpasakka’i tu mintu’ palita dio oloNa PUANG.
5La muala tu ta’pung manisak, ammu tunui tu pa’ranggina sangpulo dua; simisa’oi tu pa’ranggina iato duang taan sangpulona epa.
6La mupadao meda bulaan massang, ammu paduang topporanni siannan roti ke sangtoppo’oi, dio oloNa PUANG.
7La mupannii dupa masero dao tu roti manipi’ dipasitoppo’, ke sangtoppo’oi; la dipopemala’ kapengkilalan tu roti iato, iamotu misa’ pemala’ pantunu dipemalaran lako PUANG.
8Iake allo katorroanoi la nene’ naparandan dio oloNa PUANG; iamote tu kasialluran matontongan natanggung to Israel.
9Iamote tu la napotaa Harun sola mintu’ anakna, sipatu la nakande lan inan maindan, belanna mandu masero lako kalena; naala duka bilangan tu pemala’ pantunu dipemalaran lako PUANG; iamote tu aluk dipondok matontongan.
Ukungan urrua tau tu umpa’kada solangi sanganNa Puang Matua
10Denmo misa’ muane ma’indo’ to Israel, iatu muane iato ma’ambe’ to Mesir, torro dio lu to Israel, anna tassu’ dio mai inanna, nasigaga tu anakna baine to Israel iato na misa’ muane to Israel lan to’ tenda.
11Iatu muane ma’indo’ to Israel iato umpa’kada solangi tu Sanga, nama’tampak ropu; nasolammi tau lako Musa. Iatu indo’na disanga Selomit, anakna Dibri, to ma’suku Dan.
12Napatadangmi tau lan pa’tarungkuan la ungkampai pangra’ta’ situru’ kadanNa PUANG.
13Ma’kadami tu PUANG lako Musa Nakua:
14Baai tu tau ma’tampak ropu lako salian to’ tenda, anna mintu’ tu to urrangimi urremme’i lima tu ulunna, na iatu mintu’ kasirampunan ussileba’i batu.
15Sia ma’kadako lako to Israel kumua: Minda-minda tu untampakki ropu Kapenombanna, la umpassan kalena kasalanna.
16Minda-minda tu umpa’kada solangi SanganNa PUANG, manassa la mate dipongko; mintu’ kasirampunan la ussileba’i batu la to sae la to Israel tongan, ke napa’kada solangi tu Sanga, la mate dipongko.
17Sia minda-minda duka tu umba’ta tau namate, manassa la mate dipongko.
18Minda-minda umpatei misa’ patuoanna to senga’, la nasondai: misa’ ke misa’oi.
19Sia minda-minda ussanggang batang kalena padanna ma’rupa tau, la dipogau’ duka lako kalena sitinaya penggauranna,
20iamotu, ianna pale’to, dile’to duka, pabutan dibutai duka, pasimpoan la disimpoi duka; apa-apa tu nasanggang dio kalena tau, la susi dukato diparampoan kalena.
21Sia minda-minda tu umpatei olo’-olo’, la nasondai, apa minda-minda tu umpatei ma’rupa tau, la mate dipongko duka.
22La pada-pada tu katonganan dio kalemi, la to sae la to Israel tongan, belanna Akumo tu PUANG, Kapenombammi.
23Susimote tu kadanna Musa lako to Israel; anna baai tau tu to ma’tampak ropu lako salian to’ tenda, nasileba’i batu; napogau’mi to Israel susitu mangka Napepasanan PUANG lako Musa.