Dual PanelDiona kamasakke-sakkean sia kamandasan dio mai PUANG
1Da migaragan kalemi rapang-rapang dipodeata; iamotu mai rapang-rapang dipodeata dipa’, ba’tu batu dipodeata da mipabendananni kalemi; susi duka tu batu dia’ga rapang-rapang da mipabendanni lan tondokmi, ammi tukku umpenombai, belanna Akumo tu PUANG, Kapenombammi.
2La mikaritutui tu allo katorroangKu sia mikasiri’ tu inan maindanKu, Akumo tu PUANG.
3Iake mituru’i tu mintu’ aluk Kupondok sia mikaritutui tongan tu pepasanKu,
4la Kupasaeangkomi uran, ke attunnai, anna pakendek burana tu padang sia la membua tu kayu lan pa’lak.
5Iatu panglulluran la sae lako peanggorosan sia iatu peanggorosan la sae lako pangamboran; la mikande tu kandemi sadia’mi sia la marampa’komi lan tondokmi.
6La Kupaden tu kamarampasan lan tondok, ammi mamma’ tang dipatiramban len; la Kumangsanni tu olo’-olo’ masuru lan mai tondok, sia iatu pa’dang tang la umpandasa tondokmi.
7La miula’ tu ualimmi, anna tibambang dio tingayomi nakande pa’dang tu tau iato mai;
8limakomi la unnula’i tu to saratu’, sia saratu’komi la unnula’i tu to sangpulo sa’bu, anna iatu ualimmi la tibambang dio tingayomi nakande pa’dang.
9Sia la messaileMo’ lako kalemi, angKu popemba’ka’komi sia umpabudakomi sia la Kupabantangmo tu basseta.
10Sia la mikande tu bura padang taun dolo, tu la’binnapa sia la mialai tu bura padang taun dolo, belanna denomo tu ba’runna.
11Sia la Kupabendan tu kemaKu lan lu tangngami sia tae’ Kula ungkalilukomi,
12apa la Kusalongikomi sia la dadiNa’ Kapenombammi, angKu potaukomi.
13Akumo tu PUANG, Kapenombammi, tu mangkamo ussolangkomi tassu’ lan mai tondok Mesir, kumua damo napokaunankomi tau iato sia Kutessemo tu kayu ayokami, ammi lumingka malolo.
14Apa iake tae’i miperangiiNa’ sia tae’ mituru’i tu mintu’ pepasan iate,
15Iake mipamatunai tu aluk Kupondok sia mikalilui tu atorangKu, ammi tang unturu’i tu pepasangKu, moi misa’ duka sia mipokamo tu basseKu,
16iamoto la Kupogau’ dukamo susito lako kalemi sia la Kuparampoimokomi te katirambanan iate, iamotu saki rangke sia lalla’ tu umpamalo’ko’ mata sia umpalangga’ sumanga’; attu iato tae’ gai’mi unnambo’ bannemi, belanna la pura nakande ualimmi.
17La messaileMo’ unneakomi, miurungan natalo ualimmi sia mintu’ tu to ungkabiri’komi iamo la umparentakomi, sia la mallaikomi, moi natae’ misa’ tau unnula’komi.
18Moi narampoimokomi susito, ke tae’i miperangiiNa’, manassa la Kutompoipa sae lako pempitu, diona kasalammi.
19Sia iatu kuasa mala’bi’mi la Kuputtai sia la Kupadadi susito bassi tu langi’mi sia susito tambaga tu padangmi.
20Anna iatu kamabukuammi mipake sala, belanna iatu padangmi tang la membura sia iatu kayu lan pa’lak tang la membua.
21Iake la mieaNa’ sia tae’ miperangiiNa’, manassa la Kupa’dikkikomi pempitu pole’pa makarra’, sitinaya kasalammi.
22La Kurampanan tu olo’-olo’ masuru lako kalemi, anna pasisayurangkomi anak sia la napisanni tu mai patuoammi sia la napososso’ lu rokko tu bilangammi, anna iatu mintu’ lalanmi makarorrong.
23Moi natete dio te kadipandasammi, ke tae’pi mimengkatoba’ sule sia tontongkomi unneaNa’,
24manassa la Kulaoikomi sia la Kupa’dikki dukakomi pempitu diona kasalammi,
25sia la Kuparampoikomi pa’dang, anna pabala’i tu basse mipoka; iammi sirampunmo lan kotami, manassa la Kupasaeangkomi ropu, ammi disorong lako ualimmi.
26Iake Kuparoto’i tu roti mipopamuntu, la sangpulo baine untunui tu rotimmi lan misa’ dapo’ sia ditimbang tu rotimmi, ke dipasulei, ammi kandei, apa tae’ ammi dia’.
27Moi nasusimoto, ke tae’i miperangiiNa’ sia la tontongkomi unneaNa’,
28manassa la Kulaoikomi sia la Kuparampoikomi kare’dekan ara’Ku, ondongpi la Kupa’dikkikomi pempitu diona kasalammi.
29Ammi kandei tu duku’na anakmi muane sia duku’na anakmi baine.
30Sia la Kusanggang tu inan madao sia la Kusabu’i tu inan pemalaran pantunuan dupammi sia la Kupembuangan tu batang rabukmi dao batang rabukna deatammi sia la Kukalilukomi.
31Iatu mai kotami la Kupadaun lauanmo sia la Kusanggang tu inan maindanmi sia manokaMo’ unnudukki tu bau busarungngu’na tu apa la mitunuanNa’.
32Aku kalena la ussanggangi tu tondok naurunganni iatu ualimmi tu untorroi, magiang untiroi.
33Apa iatu kamu, la Kupasisarak-sarakkomi dio lu mintu’ bangsa sia la Kunonok tu pa’dang dio boko’mi sia la mempadang lo’bang tu tondokmi sia iatu kotami la daun lauan.
34Iatu padang disondai taun katorroanna, lan mintu’ allo nanii talo sia la minii torro lan tondokna ualimmi, attu iamoto namelayo tu padang sia disondai taun katorroanna.
35Lan mintu’ attu nanii talo tu padang, la melayo, iamotu kapelayoan tae’pa naappa’i lan to taun katorroammi, tommi torro lan.
36Sia la Kupaden tu kamatakuran lan penaammi tu mintu’komi tu torronapa lan tondokna ualinna, naurungan moi daun kayu rondon unnula’ tau iato, anna mallai, susito naula’ pa’dang, anna tibambang tang naula’ tau.
37Sia pantan la tilende’ tu tau iato mai anna siboton-boton susito undi naula’ pa’dang, anna tae’ tau undi unnula’i, sia tang la miatta bendan dio tingngayona ualimmi.
38Susimokomito la sanggang dio lu mintu’ bangsa sia la mangsankomi dio lu tondok ualimmi.
39Sia minda-mindakomi tu torronapa, la marangke tu kalena lan tondokna ualinna natumang kakelokanna sia diona duka kakelokanna nene’ to dolona, anna marangke tu kalena, susitu nene’ to dolona.
40Apa iake naakui tu kakelokanna sia iatu kakelokanna nene’ to dolona, belanna katangmarurusanna, nanii umpogau’ tang maruru’ lako Kaleku sia ia duka tu naeaNas-
41iamoto angKu ea dukai tu tau iato mai sia Kusolan tama tondokna ualinna –, sia iake umpamadiongi kalena tu tang disunna’ penaanna sia mangkamo umpassan pakkan kakelokanna,
42attu iato la Kukilalai tu basseKu sola Yakub, sia iatu basseKu sola Ishak sia iatu basseKu sola Abraham la Kukilalai, sia la Kukilalai duka tu tondok.
43Apa iatu padang iato la natampe tau iato mai sia la disondai taun katorroanna, ke talomi tang napa’tondokki tau iato, sia la umpassan pakkan kakelokanna tu tau iato mai, ondongpi, belanna napamatuna tu atorangKu sia iatu penaanna ungkasorro mintu’ aluk Kupondok.
44Apa moi torro lan tondokna ualinna, tae’ duka Kula umpamatunai sia tae’ Kukasorroi, Kuurungan ussabu’i sia Kupoka tu basseta, belanna Akumo tu PUANG, Kapenombanna.
45Sangadinna napomelona tau iato mai, la Kukilalai tu basseKu sola nene’ to dolona, tu Kusolan tassu’ lan mai tondok Mesir, dio pentirona mintu’ bangsa, kumua Akumo dadi Kapenombanna, Akumo tu PUANG.
46Iamote tu mintu’ aluk dipondok sia atoran sia sukaran aluk, tu Napamanassa PUANG lan alla’Na anna mintu’ to Israel dao buntu Sinai tu nalopian Musa.