Dual PanelMallaimi tu Yakub untampe Laban
1Narangimi Yakub tu kadanna anakna Laban tu mai muane, nakua: Naala nasangmo Yakub tu mintu’ apanna ambe’ta, na iatu barang apanna ambe’ta iamo naposugi’.
2Sia natiro Yakub tu lindona Laban, tae’mo namatana susi dolona.
3Ma’kadami tu PUANG lako Yakub, Nakua: Sulemoko lako tondok nene’mu sia lako sangdadiammu, Aku la urrondongko.
4Mesuami tu Yakub untambai Rahel sola Lea sae dio padang tu nanii mintu’ patuoanna.
5Nakuami tu Yakub lako: Kutiro tu lindona ambe’mi, tae’mo namatana susi dolona, apa Narondong siamo’ Kapenombanna ambe’ku.
6Miissan sia kumua kupengkabatta’i tongan sumaro lako ambe’mi.
7Apa napakenana’ ambe’mi, pessangpulo nasondai tu saro ra’ta’ku, apa tae’ anNa tiro-tiroi Puang Matua umpogau’ kadake lako kaleku.
8Iatonna kuai: Mintu’ domba sia bembe’ saleppang la muposaro, undadian nasangmi saleppang, sia iatonna kuai: Mintu’ domba sia bembe’ balo la muposaro, undadian nasangmi balo.
9Susimoto Nanii unnalai Puang Matua dio mai ambe’mu tu patuoan, anNa palulakoi kaleku.
10Belanna den pissan tonna sirundu’ tu domba sia bembe’, kubangunanni tu matangku, kutiroi lan tindoku, kumua iatu mintu’ bembe’ laki tu urrundu’ bembe’ birang, den balo, den sambo ra’tuk, den saleppang.
11Ma’kadami tu malaeka’Na Puang Matua lako kaleku lan tindo: E Yakub. Mebalimo’: Inde siana’.
12Nakuami: Totemo bangunanni tu matammu, tiromi tu mintu’ bembe’ laki, tu urrundu’ bembe’ birang, den balo, den sambo ra’tuk den saleppang, belanna Kutiro nasangmo tu mintu’ penggauranna Laban lako kalemu.
13Akumo tu Kapenomban dio Betel, inan munii umbolloi minna’ tu batu tanda, iamotu inan munii mangallonan lako Kaleku; totemo ke’de’moko ammu tassu’ lan mai tondok iate sule lako tondokna sangdadiammu.
14Mebalimi tu Rahel sola Lea: Denparaka taaki ba’tu mana’ lan banuanna ambe’ki?
15Tang nasangarakannika kumua to saekan? belanna nabalukmokan sia napepurai tu sombaki.
16Belanna mintu’ tu kasugiran mangka Naala Puang Matua dio mai ambe’ki, inang apangki siamo, sia apanna anakki; totemo pogau’i tu mintu’ apa Napokadangko Puang Matua!
17Mangkato, ke’de’mi tu Yakub anna pakendekki tu mintu’ repokna langngan unta.
18Sia nabaa tu mintu’ patuoanna sia barang apanna, tu napabu’tumo, iamotu patuoan napoapamo, tu napabu’tumo dio Padan-Aram, la male lako Ishak, ambe’na, lako tondok Kanaan.
19Iatu Laban male toda ia ungku’ku’i bulu dombana; nabokomi Rahel tu balo’ taunna ambe’na.
20Natangnga’ Yakub tu Laban, to Aram, tae’ napokadanni kumua la mallai.
21Mallaimi tu Yakub umbaa mintu’ apanna, ke’de’mi anna ullamban salu sia ma’palulako buntu Gilead.
22Iatonna ma’tallung alloammo napokadami tau lako Laban nakua: mallaimo tu Yakub.
23Nasolammi Laban tu mintu’ sangdadianna anna ula’i pada mambelanna kalingkan pitung allo, anna lambi’i dio buntu Gilead.
24Apa sae tu Puang Matua lako Laban, to Aram, tonna mabongi lan tindona, Nakua: Kilalai tonganni, da muma’kada lako Yakub la melona la kadakena.
25Mangkato nalambi’mi Laban tu Yakub. Iatu Yakub unnosokmo tendana dao buntu iato, na iatu Laban unnosok toda ia tendana dao buntu Gilead.
26Ma’kadami tu Laban lako Yakub nakua: Umbara susite penggaurammu, ammu tangnga’na’ sia mupallaian tu mai anakku butung to dirampa bassi mataran?
27Apara bannangna ammu mallai kamama’ bangra sia mutangnga’na’ tang mupokadan siamo’, angku issanni lao ussolangko naturu’ kaparannuan sia naturu’ sengo sia oni ganda’-ganda’ sia oni katapi.
28Sia tae’ poleopi ammu tangga’na’ unnudungi tu mati’ bati’ku muane sia baine. Iamoto munii umpogau’mo penggauran baga.
29Maatang duka sia tu limangku la umpata’paikomi kadake, apa sangmai’ bongi Nama’kada lako kaleku tu Kapenombanna ambe’mu Nakua: Kilalai tonganni, da muma’kada lako Yakub la melona la kadakena.
30Totemo inang la malemoko, belanna mamali’ tonganko lako banuanna ambe’mu, nama’apai ammu bokoi tu balo’ku?
31Mebalimi tu Yakub lako Laban nakua: Mataku’na’ kukua: Mialai torona’i manii tu mai anakmi.
32Na minda-minda minii unnappa’i tu balo’mi, damo nadipatuo len. Daka’i dio tingayona mintu’ sangdadianta, ke la denni dio kaleku tu apammi, alai sule. Apa tae’ anna issanni Yakub kumua mangka naboko Rahel.
33Tamami tendana Yakub tu Laban sia tama tendana Lea sia tendana to baine sabua’ da’dua, natae’ nakabu’tui lenni. Iatonna sunmo lan mai tendana Lea, anna tama tendana Rahel.
34Apa naalamo Rahel tu balo’ tau, anna patamai lapik unta, anna o’ko’i. Napemabillei Laban lan tenda iato, apa tae’ nakabu’tui.
35Nakuami tu Rahel lako ambe’na: Da misengke, ambe’, belanna tae’ kubelai bendan dio tingayomi, pa narampoina’ lalan biasanna baine. Napemadaka’i lan tenda iato, apa tae’ nakabu’tui tu balo’ taunna.
36Re’dekmi ara’na Yakub anna sarabai tu Laban, nakua lako: Apara palendurangku sia kasalangku, ammi sengkera undi unnula’na’?
37Iatommi bille simisa’i tu pareanangku, apara tu pareanammi mikabu’tui? Paindei te tingayona mintu’ sangdadiangku sia sangdadiammi, anna paolaiki’ salunna sola dua.
38Duangpulomo’ taunna torro sola kamu, na iatu domba birangmi sia bembe’ tae’ bangra masala tu anakna, sia iatu lakinna tae’ra angku kandei.
39Iatu tang kulaainnamo tae’ angku patiroangkomi, sangadinna kusonda sia iatu dibokona ke kulla’i allo ba’tu mabongi mipasurungina’.
40Nala’da’na’ allo keallo sia iake bongi naparrana’ sangkang, sia maroyana’.
41Na totemo duangpulomo’ taunna lan banuammi: sangpulo a’pa’na’ taunna ruranan mati’ diona te anakmi da’dua na annan taunna diona dombami sia bembe’mi, anna pessangpulo misondai tu saro ra’ta’ku.
42Iake tang la Narondongna’ Kapenombanna ambe’ku, Kapenombanna Abraham sia To napengkaolai Ishak, manassa totemo misuana’ male ma’pala’ lo’bang. Manassa Natiro Puang Matua tu parri’ku sia kamara’tasangku mengkarang. Iamo umpakilalakomi sangmai’ bongi.
43Mebalimi tu Laban lako Yakub nakua: Iate mai baine anakku sia iate mintu’ pia muane anakku duka, sia mintu’ te patuoan patuoangku duka, pissanni to, mintu’na tu mutirona inde, apangku nasang. Apa totemo la kupatumbai te anakku baine sia mintu’ te pia muane nadadiammo?
44Maiko anta tanan basse, la tapotanda-tasikna patomalinta!
45Naalami Yakub tu misa’ batu anna osokki, tu la mendadi misa’ tanda dianna batu silambi’.
46Nakuami tu Yakub lako mintu’ sangdadianna: Rampunni tu batu. Naalami tu ba’tu pira-pira batu, natombonni anna kumande dao pa’tombonan batu.
47Nasangaimi Yegar-Sahaduta Laban, apa nasangai ia Galed Yakub.
48Nakuami tu Laban: Iake totemo, iate pa’tombon batu la titanan sa’bi lako kita sola dua. Iamote nasangai Galed.
49Sia nasangai siapa Mizpa, belanna nakua: La Nakanandaiki’ PUANG patomalinta, ke tang sikitanammiki’.
50Iake mupakario-rioi tu mai anakku sia umpobaineko baine senga’, moi anna tae’ tau dioren: kilalai, kumua Puang Matua la untiroki’ patomali.
51Sia nakuapa tu Laban lako Yakub: Tiroi te pa’tombon iate sia iate batu dipotanda, tu kuosok tapotanda.
52Iate pa’tombon sia iatu batu dipotanda tu la ditanan sa’bi, kumua tae’ angku la ullendu’i te pa’tombon iate sia tae’ duka ammu la ullendu’i te pa’tombon sia batu dipotanda sae la kadake.
53Kapenombanna Abraham sia Kapenombanna Nahor, pada Kapenombanna ambe’ta umpaolaiki’ salu! Massumpami tu Yakub ussa’bu’ To napengkaolai Ishak, ambe’na.
54Napemalarammi Yakub tu misa’ pemala’ dao buntu iato, anna tambai nasangi tu sangdadianna sae kumande sola; kumandemi sola nasangi anna ma’bongi dao buntu iato.
55Iatonna mela’bik la ke’de’mi tu Laban, anna udung nasangi tu mai bati’na muane sia baine sia napassakke, anna male sule lako tondokna.