Dual PanelMataku’ Yakub sitammu Esau
1Tarru’mi tu Yakub male, anna sitammu ba’tu pira-pira malaeka’Na Puang Matua.
2Iatonna tiroi Yakub, nakuami: Iamo pa’baraninNa Puang Matua te mai! Nasangaimi Mahanaim tu inan iato.
3Nasuami Yakub tu ba’tu pira-pira tau male dolo umpessitiroi Esau, siulu’na, lako tana Seir, iamo lili’na Edom.
4Napakare’nami tu tau iato mai nakua: Susite tu la mipokada lako Esau, puangku, kumua: Susite tu kadanna kaunanta Yakub: Mentiruranna’ dio Laban sia torrona’ sola sae lako totemo.
5Den sapi sia keledai, sia domba na bembe’ sia sabua’ muane baine kuampui, iamoto angku mesua umpokadangkomi, ke ma’dinni mikaturu-turuina’.
6Sulemi lako Yakub tu to disua nakua: Sitiromokan Esau, siulu’mi sae duka la ussitiroangkomi sia den a’pa’ratu’ muane nasolan.
7Lendu’mi mataku’na tu Yakub sia pussak, na iatu mintu’ to nasolan sia mintu’ domba sia bembe’ sia sapi sia unta napaduang tuntunan.
8Belanna nakua: Iake saei narukka’ Esau tu sangtuntunan anna taloi, iatu sangtuntunan ma’dinpa lussu’.
9Ma’kadami tu Yakub nakua: O Kapenombanna nene’ku Abraham, o Kapenombanna ambe’ku Ishak, o PUANG tu mangka ma’kada lako kaleku susite: Sulemoko lako tondokmu sia lako rapummu, Aku la umpatiroiko melo.
10Iatu aku te tae’ angku sipatu la unnappa’ kameloan sia kamarurusan moi sidi’ duka, tu Napa’ pekitanan Puang lako kaunanMi, belanna tekkenku manna kubaa ullambanni te salu Yordan, na totemo menduang tuntunammo.
11Rampananna’ dio mai limanna siulu’ku, dio mai limanna Esau, belanna mataku’na’, saei manii ullampak-lampakna’ la’bo’ sia iate mai pia sola indo’na.
12Tang susiraka te tu kadanNa Puang kumua: Manassa la Kupatiroiko melo sia iatu bati’mu la Kupapada karangan diong biring tasik, tu tang dikemba’ dibilang?
13Ma’bongimi tu Yakub inde to dio tonna ibongi. Naalai tu apanna, la napa’kasianan lako Esau, siulu’na.
14Iamotu bembe’ birang duaratu’ na bembe’ laki duangpulo, na domba birang duaratu’ na domba laki duangpulo,
15sia unta birang tu ma’pasusunnapa tallungpulo sola anakna, na sapi birang patangpulo na sapi laki sangpulo na keledai birang duangpulo na sangpulo anak keledai laki.
16Mintu’nato nasorong lako kaunanna, napapantan torro, ke sangrupaoi, nama’kada Yakub lako pa’dua’na nakua: Dolo nasangkomi namane aku; pasitoyang-toyangan sisangtuntunanni.
17Nakuanni tu dolona, nakua: Iammu sitammu Esau, siulu’ku anna kutanaiko kumua: Mindaroko sola sia umba muola sia minda apa te dio tingayomu?
18La mibalii kumua: Apanna Yakub, kaunanta, misa’ pa’kasian la naben sia puangku Esau, undi duka kalenamo dio mai boko’ki.
19Susi dukato tu kadanna lako ma’penduanna sia ma’pentallunna sia lako mintu’ to urrambai tu mai patuoan iato, nakua: Susito tu la mipokada lako Esau ke sitammukomi.
20Sia la mikua: Iatu kaunanmi Yakub undi dio mai boko’. Belanna nakua tu Yakub lan penaanna: la kusa’po pamengan tu penaanna, tu dipopennolo kumane rampo, mangkato kumane ussitiroanni, nakambaroan siana’ manii.
21Susimoto tu pa’kasian napopennolo dolo, apa iatu kalena ma’bongi tonna bongi dio tu naninna pa’bongian.
Yakub massila’karan dio Pniel
22Ke’de’mi tu Yakub to bongi iato, nasolanni tu bainena da’dua sia baine kaunanna sia anakna sangpulo misa anna lamban dio kalambanan salu Yabok.
23Nasolanni napalambanni lian, sia nabaa nasang duka tu mintu’ apanna lian.
24Sangadinna Yakub mannamo torro misa-misa; denmi misa’ muane nasila’karan sae lako tibangka’na masiang.
25Iatonna tiroi tau iato kumua tae’ nasau’i tu Yakub, nala’ka’imi tu garonto’ pupunna Yakub nasilesangan, tonna sila’karan.
26Nakuami ma’kada: Rampananna’, belanna tibangka’mo masiang. Nakuami Yakub: Tae’ angku rampanankomi, ke tae’pi ammi passakkena’!
27Nakuami tu tau iato lako: Mindara sangammu. Mebalimi nakua: Yakub.
28Nakuami tinde tau: Tae’mo mudisanga Yakub, sangadinna Israel, belanna mangkamoko sirari Puang Matua sia tolino ammu patalo.
29Mekutanami tu Yakub nakua: Pokada dukai tu sangammi. Mebalimi nakua: Ma’apai mupekutananni tu sangangKu. Napassakkemi inde to.
30Nasangaimi Pniel Yakub tu inan iato, belanna nakua: Sitiro lindomo’ Puang Matua, sia makarimmanna’.
31Iatonna lendu’imi tu Pniel, dellekmi tu allo unnarrang Yakub; iatu Yakub tisondokmo tu pupunna.
32Iamoto sae lako totemo tae’ nakandei to Israel tu kaua’ dio garonto’ pupu, belanna Nala’ka’i tu garonto’ pupunna Yakub dio to’ kaua’na.