Dual PanelPUANG umpaombo’ Kalena lako to Israel dao buntu Sinai
1Iatonna bulan ma’pentallunna to mangkanna to Israel tassu’ lan mai tondok Mesir, ia duka bangsiamoto allo iato anna rampo tu tau iato mai lako padang pangallaran Sinai.
2Iatonna ke’de’mo tu tau iato mai dio mai Rafidim, rampomi lako padang pangallaran Sinai, anna ma’tenda dio padang pangallaran iato; leleomi ma’tenda sipatu buntu iato.
3Kendekmi tu Musa langngan buntu iato mennolo lako Puang Matua, metamba tu PUANG lako kalena dao mai buntu, Nakua: Susite tu la mupokada lako bati’na Yakub sia lako tarukna Israel, kumua:
4Mitiromo tu apa Kupogau’ lako to Mesir, umba Kukua urrande pala’komi susi dao pani’ langkan maega, angKu pasaekomi lako Kaleku.
5Iamoto, iammi perangii tonganni tu kadangKu sia mikaritutui tu basseKu manassa dio mai mintu’ bangsa kamumo tu dadi mana’Ku, belanna mintu’ lipu daenan Aku puangna.
6Kamumo la dadi misa’ kadatuan to minaa sia misa’ bangsa dipamarimbangan dio oloKu. Iate kada iate la mupokada lako mintu’ to Israel.
7Saemi tu Musa, natambai tu mintu’ to matua-tua bangsa iato, naparampoi tu mintu’ kada Napokadanni PUANG lako tau iato mai.
8Sangrambanammi mebali tu mintu’ tau iato, nakua: Mintu’ tu kada Napokada PUANG la kipogau’! Naparampomi Musa tu mintu’ kadanna to buda lako PUANG.
9Ma’kadami PUANG lako Musa, Nakua: Tonganna songlo’Na’ lako kalemu lan misa’ gaun malillin, kumua anna rangii to buda, ke ma’kadaNa’ lako kalemu, sia anna patonganko tontong sae lakona. Naparampoomi Musa lako PUANG tu mintu’ kadanna to buda.
10Ma’kadami tu PUANG lako Musa, Nakua: Maleko lako to buda, ammu pemaseroi tu tau iato mai te allo iate sia masiang; la nabusukki tu pakeanna.
11Sia la ma’parandan tu tau iato duang bongi, belanna duang bongi na la songlo’ tu PUANG sae dao buntu Sinai dio tingayona mintu’ tau iato mai.
12Iamoto anggeanni tiku lao natorro salian tu to buda sia pokadanni kumua: Matangkinkomi, da mikendek langngan te buntu sia da duka mirumbui tu biringna; minda-minda urrumbui te tanete iate, manassa la mate dipatei.
13Moi misa’ tau tae’ nama’din la urrumbui, belanna inang la dileba’ batu ba’tu dipana sae lako matena; la olo’-olo’ la tolino tae’ nadipatuo. Ianna dipannoni pela’-pela’mo tu tanduk domba, maneri tau iato mai kendek langngan buntu iato.
14Solo’mi tu Musa dao mai buntu rokko to’ to buda, anna pamaseroi tu tau iato mai, sia pada umbusukki pakeanna.
15Ma’kadami tu Musa lako to buda, nakua: Ma’parandankomi sae lako duang bongi; moi misa’ tau tae’ nama’din urrumbu baine.
16Iatonna ma’duang bongian melambi’ dadimi dao buntu iato tu ba’tu pira-pira guntu’ sia kila’ sia gaun makamban sia oni tarompe’ pua lendu’ kapuana, naurunganni sipa’parondoan nasang tu tau iato mai lan lu to’ tenda.
17Nasolammi Musa tu tau iato mai lan mai to’ tenda, napopennoloi lako Puang Matua, anna bendan dio to’ biring buntu iato.
18Mintu’ tu buntu Sinai merambu, belanna songlo’mo tu PUANG lan api sae dao, anna kendek tu rambunna, susi rambu dapo’ sia lendu’ tigega’na tu mintu’ buntu iato.
19Iatu oni tarompe’ pua samasai-sainna sakapua-puana; ma’kadami tu Musa, Nabalii Puang Matua lan mai guntu’.
20Iatonna songlo’mo tu PUANG sae dao buntu Sinai, dao bottona, Natambaimi PUANG tu Musa langngan bottona, anna kendek tu Musa.
21Ma’kadami PUANG lako Musa, Nakua: Solo’moko, pakilalai tu to buda da nasuangi tu rompo la umperreke’i PUANG la mentiro-tiro, kumua da nasanggang ba’tu pira-pirai tu tau iato mai.
22Sia iapa tu mai to minaa tu la mennolo lako PUANG la umpemaseroi kalena, kumua da Nakare’dekki PUANG.
23Ma’kadami Musa lako PUANG, nakua: Tae’ nama’din tu tau iato mai ungkendekki te buntu Sinai, belanna ma’kada tu Puang lako kaleki kumua: Rompoi tu buntu iate sia pamaindanni.
24Ma’kadami tu PUANG lako, Nakua: Malemoko rokko, ammu kendek pole sola Harun, apa iatu mai to minaa sia to buda da nasuangi tu rompo la kendek umperreke’i PUANG, da Nakare’dekki tu tau iato.
25Malemi tu Musa rokko to buda, anna pokadanni te mintu’ kada iate.