Dual PanelKadadianna Musa
1Denmi misa’ to dio mai sukunna Lewi, male umpobaine bati’na Lewi.
2Ma’tambukmi tu baine iato anna dadian pia muane. Iatonna tiroi kumua melo rupanna, nabunimi tallung bulan.
3Apa belanna tang naissanmo la umbunii, naalammi misa’ toban tille, napi’da’i aspala’ sia gala-gala, napamamma’i lan tu pia’-pia’ iato, anna patorroi lan to’ marrang, dio biring salu Nil.
4Iatu kakanna te pia’-pia’ bendan mambela la umpenniroi kumua ba’tu apamo la dadi lako kalena.
5Mengkalaomi tu anakna Firaun la mendio’ diong salu; na iatu mai baananna baine sumalong lu lako lu dio mai dio biring salu Nil; ta’kala natiromi tu toban tille lan to’ marrang, anna suai tu baananna male unnalai.
6Iatonna bungka’i natiromi tu pia iato; mangngami, belanna tumangi’ tinde pia muane, iamoto namasse tu penaanna, anna ma’kada nakua: Iamote tu misa’ anak to Ibrani.
7Ma’kadami tu kakanna baine pia iato lako anakna baine datu Firaun nakua: Ma’dinra’ka lao untamban puang misa’ to ma’ pasusu dio mai to Ibrani, anna pasusuanni puang tu pia iato?
8Nakuami tu anakna baine datu Firaun lako: Malemoko. Malemi tinde pia baine untambai tu indo’na pia iato.
9Ma’kadami tu anakna baine datu Firaun lako, nakua: Solanni te pia mupasusuanna’, angku benko saromu. Nabaami tinde baine tu pia iato anna pasusui.
10Iatonna kapuamo tu pia iato nasolammi lako anakna baine datu Firaun, naala anakki, nasangai Musa, nakua: Belanna kuangkaran diong mai to’ uai.
Musa umpatei to Mesir anna mallai lako Midian
11Den sangallo tonna kapuamo tu Musa, tassu’mi namale lako mintu’ sangsiuluranna, natiroi tu mintu’ pa’diamanna tau iato mai; natiromi tu misa’ to Ibrani dio mai mintu’ sangsiuluranna nabamba misa’ to Mesir.
12Messailemi tu Musa lu lako lu dio mai; iatonna tiroi tae’ sia tau, napateimi tu to Mesir iato, nabunii tu batang rabukna diong to’ bungin.
13Iatonna masiang tassu’ pole’omi, natiroi tu da’dua to Ibrani marassan sikambean nakuammi tu solana: Ma’apai ammu kambei tu sangsiulurammu?
14Mebalimi nakua: Mindara unnangka’ko arungki sia to ma’paolaingki salu? Lanomoraka penaammi la umpateina’ susitu to Mesir mipatei? Mataku’mi tu Musa, belanna natangnga’mo lan penaanna, kumua: Kaissanammo te kara-kara iate.
15Iatonna rangimi Firaun te kara-kara iate, undaka’mi lalan la umpatei tu Musa, apa mallai tu Musa dio mai Firaun undaka’ inan dio lu tondok Midian, anna torro sikandappi’ misa’ bubun.
16Iatu to minaa dio Midian pitu tu anakna baine; saemi tu tau iato mai la untimba uai unnissii pa’pairusan, la napairusan bembe’na sia dombana ambe’na.
17Saemi ba’tu pira-pira to manglaa muane unnula’i tu baine iato, apa ke’de’ tu Musa untundui anna pairu’i tu bembe’na sia dombana.
18Iatonna rampomo tu tau iato mai lako Rehuel ambe’na, nakuami ambe’na: Ma’apari te allo iate ammi sule kale’ra?
19Mebalimi tu tau iato mai, nakua: Den misa’ to Mesir untunduikanni unneai tu to manglaa sia natimbangkan uai salempanna sia napairu’ duka tu bembe’ sia domba.
20Nakuami lako anakna: Umbara nanii? Ma’apai mitampei dio? Tambai anta kumande sola.
21Natarimami Musa tu palakunna tau iato, anna torro tu Musa lan banuanna anna benni tu anakna napobaine Musa, disanga: Zipora.
22Undadiammi misa’ pia muane, nasangaimi Musa tu pia iato Gersom, nakua: Belanna to saena’ dio lu tondokna tau.
Musa Natambai PUANG la urrampanan to Israel
23Masaipa alla’na to namane mate tu datu Mesir; iatu to Israel tontong bang sumarro belanna magasa pa’diamanna sia silallakan, naurunganni iatu pengkamoyana diona pa’diamanna rampomo lako oloNa Puang Matua.
24Naperangiimi Puang Matua tu sarrona tau iato mai, sia Nakilalaimo tu basseNa sola Abraham, Ishak na Yakub.
25Natiromi Puang Matua tu to Israel sia Nakilalai.