Alkitab Mobile SABDA
[VER] : [TORAJA]     [PL]  [PB] 
 <<  Keluaran 20 >> 

Sangpulo Sukaran alukNa Puang Matua

1Nasa’bu’mi Puang Matua mintu’ kada iate, Nakua:

2Akumo PUANG, Kapenombammu, tu ussolangko sun lan mai tondok Mesir, dio mai inan munii dipokaunan.

3Da’ naden kapenomban senga’ dio oloKu.

4Da’ mugaraga rapang-rapang dipodeata dipa’, sia rapang-rapang apa dao lu langi’ ba’tu apa dao kuli’na padang nasambo langi’, ba’tu apa diong to’ uai diongna lu lino.

5Da’ mutukku umpenombai sia da’ mupengkaolai, belanna Akumo PUANG, Kapenombammu, Kapenomban manoka ditimba oloNa, tu umpapakkanni kakelokanna mintu’ ambe’ lako anakna, sae lako osso’ ma’pentallunna sia ma’penna’pa’na tu mintu’nato ungkabiri’Na’,

6apa umpa’pekitananNa’ kamasokanangKu lako massa’bu’-sa’bu tu to ungkamali’Na’ sia ungkaritutui mintu’ pepasanKu.

7Da’ musa’bu’ punala bangi tu sanganNa PUANG, Kapenombammu, belanna tae’ Nabilang maseroi PUANG dio mai kasalan tu to ussa’bu’ punala bangi tu sanganNa.

8Pengkilalai tu allo katorroan, ammu pamadatui;

9annan allona la munii mengkarang sia ungkarangi tu mintu’ pengkarangammu;

10apa allo ma’pempitu iamo allo katorroanNa PUANG, Kapenombammu, allo iato da’ mumengkarang, la iko, la anakmu muane, ba’tu anakmu baine, ba’tu solamu muane, ba’tu solamu baine, ba’tu patuoammu, ba’tu to sae tu torro lan kotamu.

11Belanna annan allona Nanii PUANG umpadadi tu langi’ sia lino sia tasik sola mintu’ issinna, anNa torroi tonna allo ma’pempitu; iamoto Napassakkei PUANG tu allo katorroan sia Napamadatu.

12Kasiri’i tu ambe’mu sia indo’mu, anna dipamalambe’ tu sunga’mu lan tu tondok Nakamaseangko PUANG, Kapenombammu.

13Da’mupapatean.

14Da’mupasandak salu lako rampanan kapa’.

15Da’ muboko.

16Da’ musa’bi tang tongan lako padammu ma’rupa tau.

17Da’ mukailui banuanna padammu ma’rupa tau, da’ mukailui bainena padammu ma’rupa tau, ba’tu solana muane, ba’tu solana baine, ba’tu sapinna, ba’tu keledainna, ba’tu barang apanna padammu ma’rupa tau.

To Israel ungkataku’ PUANG umpaombo’ Kalena

18Mintu’ tau iato mai ungkanassa nasangi tu guntu’ sia kila’ sia oni tarompe’ pua sia iatu buntu merambu; iatonna tiromi ma’parondomi sorong boko’ anna toyang bendan.

19Anna ma’kada lako Musa, nakua: Melo ke kamu bangmo ma’kada lako kaleki, angki perangii; da’omo anNa Puang Matua ma’kada lako kaleki, da angki mate.

20Nakuami Musa lako tau iato mai: Da mimataku’, belanna songlo’mo tu Puang Matua la untobakomi, sia dikua ammi mataku’ lako Puang, da mipogau’ kasalan.

21Iatu to buda toyang bendan, apa iatu Musa umpentireke’i gaun malillin, tu Naninna Puang Matua.

Atoranna kapemalaran

22Nakuami PUANG lako Musa: La ma’kadako lako to Israel susite: Iatu kamu mikanassai, kumua Aku tu ma’kada lako kalemi dao mai langi’.

23Iamoto da migaraga rapang-rapang dipodeata miparondonganNa’; da migaragan rapang-rapang dipodeata kalemi, la salaka, la bulaan.

24GaraganNa’ misa’ inan pemalaran litak sia pemalaranni dao tu mintu’ pemala’ pantunu pu’pu’mu sia pemala’ kasalamarammu, iamotu bembe’ sola domba sia sapimmu. Iatu mintu’ inan, tu Kupadadi misa’ kapengkilalan diona sangangKu, inde to dio Kunii songlo’ lako kalemu sia umpamasakkeko.

25Iake la mugaraganNa’ misa’ inan pemalaran batu, da’na iatu batu dipa’ mugaragai. Iammi la umpa’i mipamaruttakmo to.

26Sia da mukendek langngan inan pemalarangKu ma’eran, kumua da anna kaanan tu kasirisammu dao.


  Share Facebook  |  Share Twitter

 <<  Keluaran 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel