Dual Panel1Ma’kadami PUANG lako Musa Nakua: Ke’de’moko indete mumale, la iko la iate bangsa iate tu musolan lan mai tondok Mesir lako tondok tu umpalaoNa’ sumpa unnallu’i lako Abraham, Ishak na Yakub, Kukua: La Kukamasean bati’mu
2– la ussuaNa’ misa’ malaeka’ undoloangko sia la Kurambai tassu’ tu mintu’ to Kanaan sia to Amori sia to Het sia to Feris sia to Hewi sia to Yebus-
3lako tondok sebo pangandu’ sia tani’ enoan, apa tae’ Kula ke’de’ ussolangkomi, belanna kamumo tu misa’ bangsa makarra’ penaammi, Kusabu’ikomi manii lako lalan iate.
4Tonna rangimi to buda te kada metakuran iate, masussami penaanna, naurunganni tae’mo’ misa’ umpake belona.
5Ma’kadami tu PUANG lako Musa Nakua: Pokadanni to Israel kumua: kamumo misa’ bangsa makarra’ penaammi. Moi angKu sattu’ri ke’de’ ussisolangkomi, manassa la Kusabu’ikomi. Iamoto alai tu mintu’ belomi, angKu issanni apa tu sipatu la Kupogau’ lako kalemi.
6Nalossokammi to Israel tu belona, randuk dio mai buntu Horeb.
7Unnalami misa’ tenda tu Musa, anna pabendan dioi lu salian mambela dio mai to’ tenda, anna sangai tenda kasitammuan. Minda-minda la mekutana lako PUANG, la tassu’ male lako to’ tenda kasitammuan.
8Sia ianna tassu’ tu Musa lako tenda iato ke’de’ nasangmi tu mintu’ tau, anna pada bendan dio to’ ba’ba tendana, umpaula’i mata tu Musa sae lako tamanna tenda iato.
9Ianna tamamo tenda tu Musa, ta’pa songlo’ tu lentong gaun, anna tadang dio to’ ba’ba tenda, anna sipa’kada Puang tu Musa.
10Iatonna tiromi to buda tu lentong gaun iato tunannang dio to’ ba’ba tenda, bendan nasangmi, anna pada tukku menomba dio ba’ba tendana.
11Sitiro lindomi PUANG tu Musa, Nama’kada lako Musa, butung to misa’ tolino sipa’kada sangmanena; mangkato sulemi tu Musa lako to’ tenda. Apa iatu taunna, iamo Yosua, anakna Nun misa’ to mangura, tae’ namallai dio mai tenda iato.
Palakunna Musa la untiro kamala’biranNa PUANG
12Ma’kadami Musa lako PUANG nakua: Tonganna Mikua lako kaleku: Solanni te bangsa iate, anna tae’ Mipokadanna’ minda tu la Misua ussolanna’ moi mangkamo Mikua: Kutandai tonganko sia Kukaturu-turuiko.
13Iake Mikaturu-turuina’, paissannina’ tu lalanMi kuurungan untandaiKomi, ianna susito kuissan tonganmo, kumua Mikaturu-turuina’. Melo Mikilalai, kumua iate bangsa iate taumMi.
14Ma’kadami PUANG Nakua: Aku Kalenaraka la ussolangko, anna pomatanai penaammu?
15Ma’kadami Musa lako PUANG nakua: Iake tae’i na Kamu Kalena ussolangkan, da Misuakan ke’de’ indete.
16Belanna umba la dikua unnissanni, kumua Mikaturu-turuina’, la aku la taumMi? Tang bannang iaraka te ke Misolangkanni? Susimo kadipamarimbangangki to, la aku la taumMi dio mai mintu’ bangsa dao kuli’na padang.
17Ma’kadami tu PUANG lako Musa Nakua: Iate apa mupokada, la Kupogau’, belanna Kukaturu-turuiko sia Kutandai tonganko.
18Nakuami Musa: Patiroammo’ tu kamala’biramMi.
19Ma’kadami tu PUANG Nakua: Iamoto la Kupalendu’iko tu mintu’ kamadatuangKu sia la ussa’bu’Na’ sanganNa PUANG dio tingayomu: iamoto angKu katuru-turui, minda-minda tu Kukaturu-turui, sia Kukamasei minda-minda tu Kukamasei.
20Sia nakuapa kadanNa PUANG: tae’ nama’din mutiro tu lindoku, belanna moi misa’ tolino tae’ nakullei untiroNa’ anna tuo.
21Sia Nakuapa PUANG: Den misa’ inan Kusikandappiran, inde to la munii bendan dao buntu batu.
22Iake lendu’mi tu kamala’birangKu, angKu palanko lo’ko’ batu sia la Kuparerungiko limangKu sae lako lendu’Ku.
23Attu iato Kuriu’mi sule tu limangKu, ammu tiroi tu boko’Ku, apa iatu lindoKu tae’ nama’din ditiro.