Dual PanelDiona da’dua papan batu ba’ru
1Ma’kadami tu PUANG lako Musa Nakua: Parangko kalemu da’dua papan batu susito dolona, angKu sura’i lako tu mintu’ kada dio papan batu dolo tu mangka mutesse.
2Ma’pasakka’moko ke melambi’i, ammu mela’bik kendek langngan buntu Sinai, umpennoloiNa’ dao botto tanete iato.
3Moi misa’ tau da musolanni kendek sia moi misa’ tau da naditiro dao nalili’ buntu iato sia da naden domba sia sapi kumande sikandappi’ buntu iato.
4Napa’mi Musa tu da’dua papan batu susito dolona; melambi’mi millik anna kendek langngan Sinai, susitu kadanNa PUANG lako kalena anna tangkei tu da’dua papan batu.
5Songlo’mi tu PUANG lan sangkombong gaun, anna sae bendan umpentireke’i, sia ussa’bu’ sanganNa PUANG.
6Lendu’mi tu PUANG dio tingayona sia meongli’ Nakua: PUANG, PUANG, Puang Matua sumpu mamase liu kaboro’, kalando pesuka’ sia kapua kamasokananNa sia kamarurusanNa,
7tu umpatontong kamasokananNa lako ma’sa’bu-sa’bu tau, tu umpagarri’ mintu’ kapatodo-tintingan sia kakelokan sia kasalan; inang tae’ nabilang maseroi tu mintu’ to umpogau’ kasalan, sangadinna umpapakkanni kakelokanna mintu’ ambe’ lako anak-lanto mimi’na sae lako osso’ ma’pentallunna sia ma’penna’pa’na.
8Tikarami tu Musa tukku menomba sae rokko padang,
9anna ma’kada nakua: O Puang iake Mikaturu-turuina’, Puang la ussolangkan. Tonganna iate bangsa iate to makarra’ penaanna, apa la Mipa’dei dikka’ tu kapabali-baliangki sia kasalangki, amMi pomana’kan.
10Ma’kadami tu Puang Nakua: Manassamo untananNa’ basse, kumua la Kupaden tu ba’tu pira-pira tanda mangnga, tu tae’ bangpa dipadadi dao kuli’na padang ba’tu dio lu mintu’ bangsa; na mintu’ tu tau iato mai tu musolan la untiroi tu penggauranNa PUANG, belanna metakuran tu apa la Kupogaurangko.
11La mukaritutui tu apa Kupepasanan lako kalemu allo iate. Manassa la Kurambai dio mai tingayomu tu mintu’ to Amori sia to Kanaan sia to Het sia to Feris sia to Hewi sia to Yebus.
12Sia kanandai tu kalemu dio mai kasibasseammu pa’tondokan tu mupempatui, kumua da anna tau iato mai dadi poya dio kalemu.
13Sangadinna la mirondonni tu mintu’ inan pemalaranna sia la mipoka-poka tu mintu’ batu napodeatanna sia la milelleng tu mintu’ lentong napodeatanna.
14Belanna tae’ muma’din tukku menomba lako deata senga’ belanna iatu sanganNa PUANG iamo Puang noka ditimba oloNa, sia Iamo Kapenomban noka ditimba oloNa.
15Da musibasse tu pa’tondokan iato mai, belanna tau iato mai ma’gau’ sala umpengkaolai deatanna sia napemala’i, umbai natoratuko ammu kandei tu pemala’na.
16Iake mualai tu anakna tau iato mai la napobaine anakmu, sia iake ma’gau’i umpengkaolai deatanna, manassa la nanaran duka tu anakmu ma’gau’ sala umpengkaolai deatanna.
17Da mugaraganni kalemu tu rapang-rapang dipodeata dipati’no’.
18Karitutui tu pa’gauran umpakaraya allo roti tang diragii: pitung allo la munii ungkandei tu roti tang diragii, susitu Kupepasanan lako kalemu, lan attu dipamanassa ke bulan Abib, belanna lan bulan Abib ammu tassu’ lan mai Mesir.
19Mintu’na tu anak pa’bunga’ urrubak pa’tambukan Aku puangna, sia mintu’ patuoan lakimmu tu bunga’na dadi la sapi la iatu domba sia bembe’.
20Apa iatu anak keledai pa’bunga’ la mula’bak misa’ domba ba’tu bembe’; na iake tae’i mula’bakki, manassa la mutoto sokkongna. Na mintu’ anak pa’bunga’mu muane, la mula’bak, sia da naden tau mennolo lako Kaleku ma’pala’ lo’bang.
21Lan annan allona la munii mengkarang, apa allo ma’pempitu la mutorroi; moi attu ma’tengko moi attu pegandungan la mutorroi.
22Sia la mupogau’ tu pa’gauran Pitung Minggu, iamo pa’gauran pangrakanan, ke pegandungan, sia allo kapua pa’rampunan bua-bua, kepentaunanoi.
23La sipentallun lan sangtaun tu mintu’ muane dio lu kalemi la mennolo lako PUANG Puangmi, iamotu Kapenombanna to Israel.
24Belanna la Kurambai nasang tu mintu’ bangsa iato lan mai tondokna, dio olomu sia Kupakalua’mo tu lili’ tondokmu; moi misa’ tau tae’mo la ungkamorai tu tondokmu to, ke kendekko la mennolo lako PUANG, Kapenombammu, pentallun lan sangtaun.
25Da mupasiraui apa messu’ tu rara pemala’ pangrere’ mutunu lako Kaleku, sia iatu pemala’ pangrere’ ditunu ke allo Pa’pasa, da nadipaalai bongi sae lako melambi’.
26Mintu’ tu bunga’ bura padang me’lokmu la mubaa tama banuanNa PUANG, Kapenombammu. Da mutollo’i tu anak bembe’ muuai pangandu’na indo’na.
27Sia Nakuapa PUANG lako Musa: Surasanni kalemu te mintu’ kada iate, belanna tete dio kada iate, angKu sibasseangko sola to Israel.
28Torromi tu Musa dao sola PUANG patangpulo allona patangpulo bonginna, tang ungkande roti sia tang unniru’ uai; Nasura’mi PUANG dao papan tu mintu’ kada basse, iamotu Sangpulo Kada.
29Iatonna mengkalaomo tu Musa dao mai buntu Sinai, natangkemi tu da’dua papan kasa’bian tonna marassan solo’, natae’ naissanni, kumua iatu kuli’ lindona pandila-dila belanna sipa’kada-kada Puang.
30Tonna tontongimi Harun sola mintu’ to Israel tu Musa, natiroi tu kuli’ lindona pandila-dila, mataku’mi tu tau iato mai urreke’i.
31Attu iato natambaimi Musa tu tau iato mai, anna sule tu Harun sola mintu’ pangulu lan kasirampunan urreke’i, namane tu Musa ma’kada lako tau iato mai.
32Mangkato sae nasangmi tu to Israel mentireke’ lako Musa, anna pepasananni Musa lako tau iato mai tu mintu’ apa Napokada PUANG lako kalena dao buntu Sinai.
33Iatonna mangkamo Musa ma’kada lako tau iato mai, nalullungimi tu lindona.
34Apa iake tamaoi tu Musa umpennoloi PUANG la sipa’kada, naalaimi tu lullung iato sae lako tassu’na; iatonna tassu’mo naparampoammi to Israel tu mintu’ kada dipepasanan lako kalena.
35Iake natiroi to Israel tu kuli’ lindona Musa pandila-dila, nalullungiomi Musa tu lindona sae lako tamanna la sipa’kada Puang.