Dual PanelDiona garaganna pakean to minaa
1Nagaragaimi tu mintu’ pakean pangka’ la napopake menomba lan inan maindan; iamotu mai bannang lango-lango, lango-lango makaseda sia karamisi, sia nagaragan Harun tu mintu’ pakean maindan susitu Napepasanan PUANG lako Musa.
2Iatu epo’ bannang bulaan nagaragai sia bannang lango-lango makaseda sia karamisi sia bannang lenang melo dikaridi’ nagaragai.
3Natampami tu bulaan napemanipi’i anna nunnukki bannang bulaan napasitannunni bannang lango-lango sia lango-lango makaseda sia karamisi sia lenang melo, dadi misa’ pa’tannun kamanarangan.
4Nagaragaimi tu petampi’ palempeng dio epo’ tu sikande, anna siumpu’ tu tampak epo’ patomali.
5Iatu beke’ dibekeran epo’ sikande sia dipasusi duka garaganna; iamotu mai bannang bulaan, bannang lango-lango sia bannang lango-lango makaseda sia bannang karamisi sia bannang lenang, susitu Napepasanan PUANG lako Musa.
6Nagaragaimi tu parimata ake’ ido, disa’pi’ bulaan, disura’ susi passura’ peca’ unturu’ sanganna mintu’ to Israel.
7Anna pale’ke’i lako tu petampi’ palempeng epo’ patomali, nadadi parimata kapengkilalan diona to Israel, susitu Napepasanan PUANG lako Musa.
8Sia nagaragai tu pesambo ara’, misa’ panggaraga kamanarangan susi garaganna epo’, iamotu mai bulaan sia bannang lango-lango sia bannang lango-lango makaseda sia bannang karamisi sia bannang lenang melo dikaridi’.
9Massulapa’ a’pa’ tu rupanna; napaduang papa’ tu garaganna, sangdangkan lambe’na sangdangkan duka sangka’na, duang papa’.
10Namatai parimata patang borong: sangborong dimatai parimata yaspisi’ mararang sangbatu sia parimata krisoli’ sangbatu sia parimata malaki’ sangbatu, iamotu borong bunga’na;
11iatu borong ma’penduanna dimatai parimata ake’ malotong sangbatu sia parimata lasuri’ sangbatu sia parimata yaspisi’ maido;
12iatu borong ma’pentallunna parimata amba’ sangbatu sia parimata ake’ sangbatu sia parimata ketubung sangbatu;
13iatu borong ma’penna’pa’na dimatai parimata pirusa’ sangbatu sia ake’ maido sangbatu sia parimata nepri’ sangbatu. Mintu’ tu parimata iato umposa’pi’ bulaan lan inanna.
14Mintu’ tu parimata iato unturu’ sanganna anakna Israel, sangpulo dua bilanganna, pada bilanganna sanganna; pantan disura’ susi passura’ peca’, unturu’ sanganna simisa’-misa’i tu sangpulo dua sukunna to Israel.
15Nagaragaimi tu rante bulaan massang dio pesambo ara’, diampinni’ dipopa’karawang.
16Sia nagaragai tu da’dua pesa’pi’ bulaan sia da’dua sissin bulaan, anna pale’ke’i tu sissin da’dua lako tampak pesambo ara’ patomali.
17Napale’ke’i tu duang tinting rante bulaan diampinni’ lako tu da’dua sissin dio tampak pesambo ara’.
18Iatu tampakna duang tinting rante diampinni’ napale’ke’ lako to’ pesa’pi’ da’dua, napatoppo’i tu petampi’ palempeng epo’ dio tingayo.
19Natampai tu da’dua sissin bulaan napale’ke’i lako tampak pesambo ara’, dio biring lanna lu, umpatu epo’.
20Sia natampai tu da’dua sissin bulaan, napale’ke’i lako petampi’ palempeng epo’ patomali, diongna lu dio tingayo, sikandappi’ pa’pasikandean, daona lu pepori epo’.
21Naporii tu pesambo ara’ lako epo’, na iatu sissinna napasipori ulang lango-lango anna manda’ dao pepori epo’, kumua da natilendok dao mai epo’, susitu Napepasanan PUANG lako Musa.
22Sia nagaragai tu bayu salian lanna lu epo’, pa’tannun lango-lango massang.
23Iatu baroko bayu salian ma’tangnga melo, susito bayu kararran, iatu barokona bayu iato dilu’pi’ tiku lao, kumua da naserek.
24Dio to’ biringna bayu salian napalakoi ba’tu pira-pira bannang diulang susi bua dalima, ma’rupa lango-lango sia lango-lango makaseda sia karamisi.
25Nagaragai ba’tu pira-pira giring-giring bulaan massang, anna giring-giring iato napasialla’ bua dalima dio to’ biring bayu salian, tiku lao napasialla’ bua dalima;
26sialla’-alla’ misa’ giring-giring na misa’o bua dalima dio tu biring bayu salian tiku lao, tu dipake menomba, susitu Napepasanan PUANG lako Musa.
27Sia nagaragai tu bayu lanna lu tannun lenang melo la napake Harun sola tu mai anakna,
28sia iatu passapu lenang melo sia tali maballo lenang melo sia seppa lenang melo diulang,
29sia pepori aak lenang melo diulang, ma’rupa lango-lango sia lango-lango makaseda sia karamisi: pa’tannun paruki’ susi Napepasanan PUANG lako Musa.
30Nagaragaimi tu sa’pi’, iamotu makota maindan, bulaan massang, anna sura’i dao tu misa’ passura’, iamotu passura’ peca’: Dipamaindanan PUANG.
31Napalakoimi misa’ ulang bannang lango-lango anna pasiporii passapu, susi Napepasanan PUANG lako Musa.
Diona garaganna kema naala penaanna Musa
32Attu iato dipasundunmo tu mintu’ karangna kema, iamotu tenda kasitammuan, nagaragaimo to Israel susitu mintu’na Napepasanan PUANG lako Musa, susimo kanagaraganna to.
33Nabaami lako Musa tu kema iato, iamotu tenda sola mintu’ pareananna, iamotu pekadangna sia papanna sia pesa’pi’na sia lentongna sola lette’na;
34iatu pesambona kuli’ domba laki pa’damorro’ mararang, sia pesambo kuli’ taka’ sia kulambu dipa’rerungan;
35sia iatu patti kasa’bian situang pebullena sia tutu’ pebase kasalan;
36sia iatu meda sola to mai pareananna sia roti dipennoloan,
37sia iatu tongkonan palita bulaan massang sia iatu palitanna, iamotu palitanna dipasirundunan inanna – sia mintu’ pareana sia mintu’na la napadukku;
38sia inan pemalaran bulaan, sia minna’ la dipa’minnakan sia dipa’tokkoan, sia dupa sia kulambu dikulambuan tenda;
39sia inan pemalaran pantunuan situang sala’bi’ tambaga dio sia pebullena sia mintu’ pareananna, sia pembasean situang lette’na;
40sia kulambu dio lu tarampak sia lentongna situang lette’na sia kulambu ba’ba tarampak situang ulangna sia petangki’na sia mintu’ pareanan dipake menomba lan kema, iamotu tenda kasitammuan;
41sia pakean pangka’ napake menomba lan inan maindan, iamotu pakean maindan la napake Harun to minaa sia mintu’ napake anakna muane, la ungkarang toean to minaa.
42Susi mintu’ tu Napepasanan PUANG lako Musa, susimo tu mintu’ pengkarangan iato nakarang to Israel.
43Napasileleimi matanna Musa tu mintu’ pengkarangan iato, manassamo nakarang tau iato mai susitu mintu’ Napepasanan PUANG; susimo kanakaranganna to. Napassakkemi Musa tu tau iato mai.