Dual Panel1Pa’tendeng ballona Salomo.
Kamamaliranna baine lako muane sikampana
2– La namimmokna’ pudukna! Belanna iatu mali’mi mandu marasa na uai anggoro’.
3Iatu bau minna’mi busarungngu’, sia iatu sangammi susitu minna’ pandere’ dibolloan. Iamoto anna mintu’ anak dara ungkasinnaikomi.
4Rendenna’ angki sarra’i undi. Nasolammo’ Datu tama bilikna, melo ke unnarrakkan umposendekomi sia umpudi tu mali’mi losong na iatu uai anggoro’! Sipatukomi nakasinnai tau!
5Masa’pangna’, apa maballo, e anak dara Yerusalem, susitu tenda Kedar, sia sangtinti kulambu Salma.
6Da mitiro-tirona’, kumua malotong-lotongna’ belanna natengona’ allo. Mintu’na anak muaneku dio indo’ makarra’ lako kaleku, anna padadina’ to ma’kampa pa’lak anggoro’ – anna pa’lak anggoro’ku kalena tae’ kukampai.
7Pokadanna’, e andi’ pa’kaboro’ inaangku, umba minii mangkambi’, umba minii umpalenga’ baanan domba, ke tangngai allo. Belanna ma’apai angku la susito ma’lullung merreke’-reke’ lako baanan dombana solami?
8– Iake tae’i muissanni, e iko, tu ma’iringanna maelo dio lu mintu’na baine, pelalanni tu lalan lette’na domba, sia kambi’i tu bembe’ birangmu sikandappi’ tu mai inan to mangkambi’.
Sisonda-sonda sitendeng tu muane na baine sikampana
9– E rindungku, kupasangtintiko darang birang, tu dipalakoi karetana Firaun!
10Me’lok tu popomu naparitangnga anting-anting, sia iatu barokomu nasialikki manik.
11La kigaragampoko anting-anting bulaan sola manik salaka.
12– Iatonna marassan tu datu unno’ko’ dio medana, tipamaen-maenmi tu busarungngu’na narawastungku.
13Iatu andi’ pa’kaboro’ku butung to mur sangsepu’-sepu’, tu torro lan alla’ susungku.
14Iatu andi’ pa’kaboro’ku butung to sangtangke bunga enna dio kaleku, lan pa’lak anggoro’ En-Gedi.
15– Lendu’ ia melomu, e rindungku, tonganna lendu’ ia melomu, sia iatu matammu susi dangan-dangan.
16– Tonganna lendu’ ia melomi, e andi’ pa’kaboro’ku, ondongpi makari’dikkomi sia iatu patindoanta kariongan.
17Iatu pa’kayuan banuanta aras sia iatu mintu’ rinding papanta kayu sanoba’.