Dual PanelPa’tendengna muane la diparampo umpudi kameloanna baine la narampanni kapa’
1Tonganna, lendu’ ia maelomu, e rindungku, manassa, lendu’ ia maballomu; iatu matammu susi dangan-dangan, tu payan ullendu’i bobongmu, beluakmu susito sangbaanan bembe’, songlo’ tikalulun-lulun dao mai buntu Gilead.
2Iatu isimmu susito sangbaanan domba tu mane mangka digontingi bulunnna, anna kendek diong mai pa’baseanna, mintu’i sibaa anak rapi’na, na moi misa’ tae’ sisayuran anak.
3Iatu pudukmu susito bannang karamisi sia melo rarek sadangmu. Iatu pili’mu susito bua dalima dipiak, tu payan ullendu’i bobongmu.
4Iatu barokomu susi menarana Daud, dipabendan massora-sora lolokna, iatu balulang sangsa’bu ditoke’ dio, mintu’nato iamo pakolongna to lalong.
5Iatu susummu patomali sangtinti da’dua anak kijang rapi’ tu undaka’ kande dio lu to’ danga-danga.
6Sae lako mangiri’na angin makaroen sia pa’dena mintu’ ongan-ongan la malena’ lako buntu nanii muru, lako tanete nanii dupa.
7Melo tu pa’kaleammu, e rindungku, sia moi sidi’ tae’ sayuammu.
8Songlo’ko mai dao mai Libanon, e dodo’ sangkalamma’ku, songlo’ko dao mai Libanon, songlo’ko dao mai botto Amana, dao mai botto Senir sia dao mai Hermon, tu nanii lo’ko’ singa, tu buntu natorroi arimau buluh.
9Mupatiludak tu penaangku, e adingku, e dodo’ sangkalamma’ku, mupatiludak tu penaangku moi mupissanri umpata’paina’ mata, moi nasangtintingri manik lan barokomu.
10Lendu’ ia keangga’na, tu mali’mu, e adingku, e dodo’ sangkalamma’ku, lendu’ ia marasanna tu mali’mu na uai anggoro’ sia la’bi busarungngu’ ia tu minna’ pandere’mu na iatu mintu’ pebangki’.
11Pudukmu umpato’do uai tani’ enoan, e dodo’ sangkalamma’ku, iatu tani’ enoan sia pangandu’ diongna lu lilamu; sia iatu busarungngu’na pakeammu susi busarungngu’na Libanon.
12Iatu iko sangtinti pa’lak tu dibala tiku lao, e adingku, e dodo’ sangkalamma’ku, butung to kalimbuang dirompo, sia mata uai digonting sia dica’.
13Iatu mintu’ tarukmu susito pa’lak kamanamanan, nasitutu’i garonto’ dalima, tu maelo buanna sia bunga enna sia oto’ narawastu,
14narawastu, kuni’, bangle sia kayu matappa’, sia mintu’ oto’ dupa, muru sia aloe kayu busarungngu’ sia mintu’ rupanna pebangki’ melo.
15E uai tikula’dakna mintu’ pa’lak bunga, e kalimbuang boba, e salu’-salu’ dao mai Libanon!
Sisonda-sonda sitendeng tu baine na muane la diparampo
16– Ke’de’ko, e angin ma’paludaa mai, maiko e angin ma’palulo’ mai, mangiri’ko lan pa’lak bungangku, anna tipamaen-maen tu busarungngu’na mintu’ pebangki’na! La tama pa’lak bunganna tu andi’ pa’kaboro’ku, anna kandei tu mai bua-bua maelona.