Dual Panel1– Umbara naolai tu andi’ pa’kaboro’mu, e iko tu mandu maelo dio lu mintu’ baine? Umbara naolai tu andi’ pa’kaboro’mu sepang? Belanna la maleki’ sola undaka’i.
2– Iatu muane pa’kaboro’ku mengkalaomo rokko pa’lak bunganna, rokko to’ bedeng oto’ pebangki’, la naposende tu pa’lak bunga sia la unnala danga-danga.
3Iatu aku te andi’ pa’kaboro’ku puangna iatu andi’ pa’kaboro’ku aku puangna, tu mangkambi’ lan lu to’ danga-danga!
Iatu muane la diparampo untendeng baine la narampanni kapa’
4Maballoko, e rindungku, susi Tirza, makari’dikko sangtinti Yerusalem, makarama’ susi tuntunan surodadu ma’bandera.
5Pasalaina’ pentiromu, belanna napalittuna’; iatu beluakmu susito sangbaanan bembe’ songlo’ tikalulun-lulun dao mai Gilead.
6Iatu isimmu susite sangbaanan domba birang, tu kendek diong mai pa’baseanna, mintu’i sibaa anak rapi’na namoi misa’ tae’ sisayuran anak.
7Iatu pili’mu susito dalima dipiak, tu payan ullendu’i bobongmu.
8Iatu baine tonganna datu den annan pulona, na iatu gundi’na karua pulona, sia iatu anak dara tang dikemba’ diia’.
9Apa ia manna tu misa’ tu dangan-danganku, e baine adang-adangku, tu tae’ sayuanna; ia manna tu misa’ dio indo’na, masero dio to padadianna. Mintu’ tu anak dara untiroi sia umpudi kumua maupa’ ia, mintu’ baine tonganna datu sia gundi’na untendengi.
10Mindara ia tu susi allo berre’, maelo sangtinti bulan taro-taro, parrang susi mata allo dukku; sia makarama’ sangtinti tuntunan surodadu?
11Mengkalaomo’ rokko to’ pa’lak pala la untiroi tu ta’bi diong lombok, la untiroi ba’tu la mentarukmi tu garonto’ anggoro’ sia ba’tu la menta’bimi tu garonto’ dalima.
12– Tae’pa kumengkilala; kusanga kendekmo’ langngan kareta dio sa’dena datungku.
Kameloanna baine dirampanni kapa’ tonna ma’gellu’
13Menggirikko, menggirikko, e iko baine Sulam, menggirikko, menggirikko, angki tiroko! Ma’apai mimentiro lako baine Sulam susito lako pa’gellu’ dio mai Mahanaim?