Dual PanelPuang Matua tu butung ianan ballo
1Ianan ballona Daud. Karimmannina’, o Puang Matua, belanna Kamu kuposande’.
2Kukua lako Puang: Kamumo tu Puangku, Kamu manna tu nanii kameloangku!
3Na iatu mai to masallo’ lan te lino: Iamo mala’bi’, dio tau iato mai nanii kasendeangku.
4Sitodon tampomo tu kamaparrisanna, to umpengkanorongi (deata) senga’! Nokana’ untedokki tu mai rara napenomban tau iato mai, ba’tu ussa’bu’i randan dipudukku tu sanganna.
5PUANGmo tu ba’gi kupomana’ sia luangna irusangku, Kamu duka tu umpantok serongku.
6Ditintingammo’ padang ballo kupoba’gi, ondongpi iatu mana’ku to, kupopaiman.
7La umpudina’ PUANG tu umpatuduna’, pissanmi to napatiangka’na’ sukaran inaangku ke mabongi.
8Dio bang lindoku tu PUANG kusa’ding; belanna dio kananku tu Puang, iamoto anna tae’ angku la tilende’.
9Iamoto anna parannu penaangku sia sende paiman deatangku, sia iatu batang kaleku la torro marampa’!
10Belanna tae’ Mila unneloranni tu sumanga’ku tama lino to mate, sia tae’ Mieloranni tu to Mipakaboro’ unnisungi inan tang merambu.
11Mipokadanna’ lalan katuoan; dio oloMi den kaparannuan media’i; sia dio kananMi den kasode-sodean tontong sae lakona.