Alkitab Mobile SABDA
[VER] : [TORAJA]     [PL]  [PB] 
 <<  Mazmur 18 >> 

Sengona datu ma’kurre sumanga’

1Lu lakona pangala sengo. Lu dio mai Daud, taunNa Puang Matua, tu umparampoi langngan Puang Matua tu mintu’ buena sengo iate, tonna rampananni PUANG dio mai mintu’ ualinna sia dio mai Saul. (18-2) Nakua: Ponno tongan penaangku, ungkamali’Komi, o PUANG, oto’na kamatotorangku,

2(18-3) O PUANG, buntu batungku sia tambakukungku sia To urrampananna’, Iamo kapenombangku sia buntu batungku, tu kunii mentirerung, Iamo kupobalulang, sia tanduk kasalamarangku, sia pentionganan layukku.

3(18-4) Metambana’ kumua: AnNa dipudimora tu PUANG! Tu belanna tilendokna’ dio mai mintu’ ualingku.

4(18-5) Nabi’bi’na’ mintu’ pearra’ kamatean, sia natu’ba’na’ darra’ kasanggangan;

5(18-6) naerrena’ mintu’ pearra’ lino to mate; sia la naalana’ mintu’ poya kamatean.

6(18-7) Iatongku lan kamatakuran meongli’na’ langngan PUANG, sia mengkamoyana’ lako Kapenombangku. Narangimo tu gamarangku lan banua kabusunganNa, sia rampomo tama talinganNa tu pengkamoyaku.

7(18-8) Lino’mi tu padang sia tigega’, sia mintu’na garonto’ tanete tiseno, sia tigega’ belanna kare’dekanna ara’Na.

8(18-9) Sun tu rambu dao mai illongNa, sia api lan mai sadangNa ma’pamampu’, anNa popa’lulu-lului tu ruaya.

9(18-10) Napalempemi tu langi’ anNa mengkalao, na iatu lillinan parrak, diongna lu lentekNa.

10(18-11) Ussakeimi karubion Namettia’, sia sumayo dao pani’ angin.

11(18-12) Malillin Napopembungku’, sia Napopentirerungan untikuI, iamotu uran pittuk sia salebu’ makamban.

12(18-13) Iatu naninna arrang dio oloNa tipoli’ dio mai tu salebu’ makamban, sia uran batu sia ruaya borrong.

13(18-14) Gumalugumi tu PUANG dao langi’, sia umpatialling gamaranNa tu Puang Patodoranna – (uran batu sia ruaya borrong).

14(18-15) Napa’panan tu tinaranNa anNa pasisarak-sarakki tu tau iato mai, Napellebaranni tu kila’ sia Napasisarambuan tu tau iato mai.

15(18-16) Iato attu iato payanmi tu mintu’ sali tasik, sia mintu’ parandangan lino sombo duka, tu belanna pegarrakMi, o PUANG, sia belanna pa’pamurru’na penaamMi dao mai illongMi.

16(18-17) Naulumi tu limanNa dao mai unnalana’, Nariu’na’ lan mai uai luang.

17(18-18) Narampananna’ dio mai mintu’ uali lalongku, sia dio mai to ungkabiri’na’ belanna nasau’na’ tau iato mai.

18(18-19) Iatongku maparri’ narukka’na’ tau iato mai, apa PUANG ussande’na’.

19(18-20) Nasolammo’ sun lako inan malona’, sia Narampananna’, belanna Napopaimanna’.

20(18-21) Napapatuimo’ PUANG sitinaya kamaloloangku, sia Napapakkannina’ sitinaya kamasero-pindananna limangku.

21(18-22) Belanna kuturu’mo tu mintu’ lalanNa PUANG sia tae’ bangpa angku sala’ kedo sepang dio mai Kapenombangku.

22(18-23) Belanna mintu’na atoranNa tontong kupalan ara’, sia tae’ angku patoyangi tu Napondokna.

23(18-24) Sangadinna bulo lollong tu penaangku lako Kalena, sia ungkaritutuina’ kaleku dio mai kakadakean.

24(18-25) Iamoto anNa papakkannina’ PUANG sitinaya kamaloloangku, sia sitinaya kamasero-pindananna limangku dio oloNa.

25(18-26) Lako to maruru’ Mikaruru’i duka, sia lako to tae’ sayuanna, Mipemaloloan penaa,

26(18-27) Sia lako to masallo’, Mikasallo’i duka. Apa lako to leko’ penaanna, Miuali.

27(18-28) Kamumo ullendokanni tu bangsa dipandasa, apa Mipopengkadiongan tu mintu’ to patiro solo’.

28(18-29) Belanna Kamumo umpamarorrong palitangku, sia PUANG, Kapenombangku, umpopembali maseroi tu kamalillinangku.

29(18-30) Belanna Kamu dukari angku laoi sangtuntunan surodadu, sia Kapenombangkuri angku leanni benteng batu.

30(18-31) Iatu Puang Matua sundun tu lalanNa; iatu kadanNa Puang tang kabissikan. Iamo napobalulang mintu’ to umposande’I.

31(18-32) Belanna mindara senga’na tu Kapenomban, ke tang PUANG, sia mindara senga’na tu buntu batu, ke tang Kapenombanta?

32(18-33) Iamotu Kapenomban umpatambeke’ina’ kamabukuan, sia umpamarante lalanku.

33(18-34) Napaten to lentek donga birang tu lentekku, sia Napatulangdanna’ dao inan matandeku.

34(18-35) Napopa’biasa tu limangku parari, naurunganni malute tu limangku unggittingan ulang pana tambaga.

35(18-36) Mikamasean dukamo’ balulang kadikarimmanan lu dio mai Kalemi, sia natulakmo’ lima kananMi, sia napamatandemo’ kamasokanamMi.

36(18-37) Mipakalona’mo tu kuninna mentengka, natae’ natiparedok tu pa’gallangangku.

37(18-38) Mangkamo kuula’ sumpu tu ualingku angku lambi’i, sia tae’ kusule, ke tang kumangsanni nasangpi.

38(18-39) Mangkamo kupessambakan naurunganni tang nakullemo malimbangun sule, sia tibambang diong to’ lentekku.

39(18-40) Belanna mangkamoKomi umpatambeke’ina’ kamabukuan la parari; sia mangkamo Mipatunduk lako kaleku tu mintu’ to unneana’.

40(18-41) Mipopemboko’mo mallai tu mintu’ ualingku, sia kumangsannimo tu mintu’ to ungkabiri’na’.

41(18-42) Metambamo tu tau iato mai, apa tae’ misa’ tau untundui, metamba lako PUANG, apa tae’ Napebalii.

42(18-43) Kunisak-nisakmo tu tau iato mai butung to barra’-barra’ napentiaran angin, sia kulullu’-lullu’ ten to so’mak dio lu lalan.

43(18-44) MangkamoKomi urrampananna’ dio mai kasipakkanna to buda, sia Mipopangulunnamo’ ba’tu pira-pira bangsa; iatu bangsa tang kuperambu sae duka mengkaunan lako kaleku.

44(18-45) Mane narangi tu diona a’gangku, naturu’mi tu parentaku; sia iatu to salian bangsa naangga’-angga’i mengkanorong lako kaleku.

45(18-46) Iato to salian bangsa moro’mo tu kamatotoranna, anna ma’parondomo sun lan mai tambakukunna.

46(18-47) Iatu PUANG tuo sia mintu’na kadipudian lu lako nasang PUANG, buntu batungku, sia sipatu tu Puang Matua, oto’na kasalamarangku dipekalangka’I.

47(18-48) Iamotu Kapenomban, mangka umpopembala’na’, sia Ia tu umpopengkanorongmo ba’tu pira-pira bangsa lako kaleku,

48(18-49) Tu urrampananna’ dio mai mintu’ ualingku! Ondongpi Kamu duka umpamadaoanna’ na iatu mintu’ to umbalina’, sia Kamumo tu ullussuranna’ dio mai to masa’ga’.

49(18-50) Iamoto angku la umpudiKomi, O PUANG, dio lu mintu’ bangsa, sia la kupenanian pa’pudian tu sangamMi.

50(18-51) Iamo umpakapua kadirampananna datunna, tu umpa’pekitanan kamarurusan lako to Natokko, Iamotu Daud sia bati’na tontong sae lakona!


  Share Facebook  |  Share Twitter

 <<  Mazmur 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel