Dual PanelKamala’biranNa Puang Matua lan mintu’ angge maritik sia lan Sukaran alukNa
1Lu lakona pangala sengo. Pa’pudianna Daud. (19-2) Mintu’ langi’ unnulelean kamala’biranNa Puang Matua, sia batara umpa’peissanan panggaraga limanNa.
2(19-3) Allo umpokadanni kada tu allo, sia bongi umpa’peissananni lako bongi.
3(19-4) Tae’ basana sia tae’ kadanna; tae’ misa’ tau urrangi gamaranna.
4(19-5) Moi susito situtu’mo mintu’ lino tu pa’uleleanna, sia landa’mo lako randanna langi’ tu kadanna. Indeto Nanii Puang umpabendananni tenda tu matanna allo.
5(19-6) Tu butung misa’ muane ma’rampanan kapa’ sun lan mai bilikna, sia sende paiman butung pa’barani la ullingkai lalanna.
6(19-7) Iatu kadellekanna dio mai randan langi’, sia kamenggulilinganna landa’ lako randan sangbalinna, na moi misa’ apa tae’ kalalunan dio mai kamapannanganna.
7(19-8) Iatu Sukaran alukNa PUANG sundun, sia umpapaya penaanna tau; iatu kasa’bianNa PUANG matappa’, sia umpabu’tuan kakinaan to tang paissan.
8(19-9) Iatu parentaNa PUANG manappa’, sia umpasende penaa; pepasanNa PUANG masero, sia umpemarorrongi mata.
9(19-10) Iatu kamatakuran lako PUANG masallo’, sia tontong sae lakona; atoranna PUANG tonganna; sia malambu’ nasang.
10(19-11) Tu mandu maballo anna bulaan, moi na bulaan tasak buda; sia mandu matanning na tani’ enoan, sia iatu lannapa serangna.
11(19-12) Sia iamo la umbangunni ada’ taumMi, na diona kanaturusanna kapua tongan poleanna.
12(19-13) Mindara tu unnissan mintu’ kapusanna? Seroi pindanna’ dio mai mintu’ kasalan tang dikita.
13(19-14) Karitutui dukai tu taumMi dio mai kamatampoan, da nataloina’ tu kamatampoan; manera’ tang sayuan, sia masero pindan dio mai sala kapua.
14(19-15) Sangapaoi anna iatu mintu’ kada sun dio pudukku sia tangnga’ diong penaangku naala penaamMi, o PUANG, buntu batungku sia To mangla’bakku.