Pa’kurre sumanga’ langngan Puang Matua tonna patalomo tu datu
1Lu lakona pangala sengo. Pa’pudianna Daud. (21-2) O PUANG, parannu paiman tu datu tu diona kuasamMi, sia tumba kalo’dokanna belanna kamakarimmanan lu dio mai Kalemi!
2(21-3) Mibenmo tu lalan penaanna, sia tae’ Mitumpui tu palaku nasa’bu’ randan dipudukna. Sela
3(21-4) Belanna Mipatammuimo rongko’ sanda maelo, sia Mipaluangimo makota bulaan tasak tu ulunna.
4(21-5) Umpalaku katuoan mati’ amMi kamaseanni, ontongpi kamalamberan sunga’ tontong sae lakona.
5(21-6) Kapuamo kamala’biranna belanna kasalamaran lu dio mai Kalemi, sia Mikamaseimo kadipangkeran sia kabarre – alloan.
6(21-7) Belanna Mipatulangdanmo mendadi misa’ karongkosan, sia Mipasende paimanmo dio oloMi.
7(21-8) Belanna nakatappa’i datu tu PUANG, sia diona kamasokananNa Patodoranna anna tae’ natilende’.
8(21-9) La nalambi’ limamMi tu mintu’ ualimMi, sia la nalambi’ lima kananMi tu mintu’ to ungkabiri’Komi.
9(21-10) La Mipabutung dapo’ nanii ma’lulu-lulu api tu tau iato mai, ke umpapayanKomi rupamMi. Puang la unnimbakanni kasengkeanNa tu tau iato mai, sia la namangsanni api.
10(21-11) La Misabu’i tu bati’na lan mai lino, sia lanto mimi’na lan mai mintu’ ma’rupa tau.
11(21-12) Belanna tau iato mai la umpabu’tu kakadakean lako kalemi, untangnga’ kakelokan, apa tang nabela umpalanda’i.
12(21-13) Belanna Mipatipero’mo sule tu tau iato mai, sia Miparundu’imo bulianMi tu lindona.
13(21-14) BendanKomi lan kamatotoramMi! La menanikan umpakendekan pa’pudian kuasamMi.