Mazmur 41 (TORAJA)

Passambayang lan kamasakian

1Lu lakona pangala sengo. Pa’pudianna Daud. (41-2) Maupa’ tu to ungkilalai to bongko; manassa la Narampanan PUANG, ke allo kamaparrisan.

2(41-3) La Nakaritutui PUANG sia Napamalambe’ sunga’; anNa dipudi lan te lino; sia tae’ len Mila ussorongi lako pa’poraianna ualinna.

3(41-4) PUANG ussande’i dao inan kamasakianna, Kamumo umpopembali a’ganna dao inan mamma’na ke masakii.

4(41-5) Kukuami: O PUANG, kamaseina’ dikka’, sia pamatanana’ belanna kasalammo’ lako Kalemi.

5(41-6) Mintu’na ualingku umpokada kadakei tu diona aku, nakua: Piranra nala mate sia pa’de tu sanganna?

6(41-7) Iake saei misa’ unto’longina’, ma’kada leko’, sia urrampun kakadakean lan penaanna, anna tassu’ umpatale’i tu iannato.

7(41-8) Mintu’ to ungkabiri’na’, sibisik-bisik umpokadana’, sia sanda kakadakean, natannunanna’ nakua:

8(41-9) Le’ke’ misa’ saki tang dampi-dampian lako kalena, iamoto totemo mamma’mo anna tae’mo nala malimbangun sule.

9(41-10) Ondongpi, iatu sangmuane karra’ku tu kupatongan, sia kusolan kumande unnande’ lentekna urrea’na’.

10(41-11) Apa Kamu, o Puang, kamaseina’ dikka’ sia pamillikna’, angku pabala’i tu tau iato mai.

11(41-12) Naindeto kunii unnissanni kumua Miporaina’, ke tae’i napoparannu paimanni ualingku tu kasanggangangku.

12(41-13) Iate aku te Misande’na’ tete dio kamasalloranna penaangku, sia Kamumo umpatulangdanna’ dio oloMi tontong sae lakona.

13(41-14) Mintu’na kadipudian lu lako PUANG, Kapenombanna to Israel. Tempon dio mai tontong sae lakona. Amin, amin.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

<< Mazmur 41 >>