Dual PanelKapengkaolan tongan
1Pa’pudianna Asaf. Puang Matua undaoanni mintu’ deata, Iamo PUANG, ma’kada sia untambai mintu’ banne lino randuk lan mai matallo landa’ rokko kalambunan.
2Iatu Puang Matua pangkillang dio Sion, sundun kamaballoanna.
3Iatu Kapenombanta la sae tae’ nala ma’pakappa, dio oloNa den api la ma’pamampu’, sia naguririkkI angin bara’.
4Metambami langngan langi’ daona lu, sia tama lino, kumua la Napaolai salunna tu taunNa:
5RampunanNa’ taungKu tu mekaaluk, tu mangka Kusibassean dipandanni pemala’!
6Langi’ umpasomboi tu kamaloloanNa. Belanna Puang Matua tu To ma’paolai salu. Sela
7Perangii, e taungKu, angKu ma’kada, e Israel, la Kupakanassangko, kumua: Akumo Kapenomban, tu Kapenombammu.
8Tang bannang diora pemala’mu Kunii untarru’iko, belanna iatu pemala’ ditunu pu’pu’mu tontong bang dio oloKu.
9Tang undaka’ra’ sapi laki kandean datu dio mai banuammu, ba’tu iatu mai bembe’ laki lan mai balamu.
10Belanna poissangKu tu mintu’ olo’-olo’ lan pangala’, sia iatu patuoan massa’bu ussamboi tanete.
11Kutandai nasang tu manuk-manuk dao lu tanete, sia mintu’na angge menono’ dio lu kapadanganna lan nasang poissangKu.
12Iake moronganna tangdia’Na’, tae’ra angKu la umpokadai mati’, belanna Aku puangna te lino sola mintu’ issinna.
13Ma’apai angKu la ungkande duku’ sapi laki ba’tu unniru’ rara bembe’ laki?
14Pennoloanni lako Puang Matua tu pa’kurre sumangasan, sia palesso’i tu mintu’ pangallonammu lako Puang Patodoranna.
15Sia meongli’ko lako Kaleku lan kapussakan, Aku la ungkarimmanniko, ammu pakala’bi’Na’. Sela
16Apa iatu to tang mekaaluk nakua tu kadanNa Puang Matua lako: Apara battuanammu unnosso’ mintu’ aluk Kupondok, sia umpoparipuduk basseKu,
17Na mukabiri’ tu peada’, sia mutibe lako boko’mu tu mintu’ kadangKu?
18Iammu tiro misa’ to boko, ma’papada landomoko sola, sia iatu to pasandak salu lako rampanan kapa’ mutamai.
19Mupopa’elo’na tu randan pudukmu ussa’bu’ sanda kadakena sia iatu tongka’ dililamu untannun sanda pakena.
20Unno’ko’ko ungkada-kadai le’to barra’mu, sia ullangdo to nadadian indo’mu.
21Susimoto tu penggaurammu, apa ma’loko-lokoNa’; musanga kumua iatu Aku te susiNa’ iko! Apa la Kuada’ko, sia la Kupatama tangnga’mu tu mintu’nato.
22Parinaai tu iannate, e kamu to tang ungkilalai Puang Matua, da angKu se’bu-se’bukomi, sia tae’ misa’ tau umbelai untindokkomi.
23Minda-minda tu umpennoloan pa’kurre sumanga’, iamo umpakala’bi’Na’, sia iatu to malolo lalanna, la Kupakitan kasalamaran lu dio mai Puang Matua.