Dual PanelPassambayang umpalaku pa’tunduan la parinding pala’ dio mai mintu’ uali masa’ga’
1Lu lakona pangala sengo. (Unturu’ baenan sengo:) Dandi’ bala’-bala’i. Pa’pudianna Daud; misa’ ianan ballo, tonna suai Saul tu tau untalimbung tama banuanna, la morai umpatei. (59-2) Rampananna’ dio mai mintu’ ualingku, o Kapenombangku, rindingna’ dio mai mintu’ to unneana’.
2(59-3) Rampananna’ dio mai mintu’ to umpogau’ kakadakean, sia lendokanna’ dio mai mintu’ to umpato’do rara.
3(59-4) Belanna morai tongan unnala sunga’ku, sia mintu’ to masa’ga’ la ullaoina’, moi tae’ kapatodo-tintingangku ba’tu kasalangku, o PUANG.
4(59-5) Tau iato mai lumumpa’ sae sia ma’kamandi’ moi anna tae’ salaku. Ke’de’Komi untunduina’, sia tiroi tu iannato.
5(59-6) O PUANG, Kapenombanna mintu’ ma’dandan maritik, Kapenombanna to Israel, ke’de’Komi la unnada’i tu mintu’ to tang untandai kapekaalukan, da Mikatirinnai tu mintu’ to tang maruru’ sia umpogau’ kakadakean. Sela
6(59-7) Bongi-bongi sae sule tu tau iato mai, sia mengua’-ngua’ susi asu sia sisellukan len lan kota.
7(59-8) Pambura-bura tu sadangna ussa’bu’ pebe’se, sia mataran tu lilana susi pa’dang, belanna nasanga kumua: Mindara la urrangii?
8(59-9) Apa Mipetaai tu tau iato mai, o PUANG, sia Mitelle-telle tu mintu’ to tang untandai kapekaalukan,
9(59-10) La kutayanKomi o oto’na kamatotorangku, belanna Puang Matua kupobenteng matoto’.
10(59-11) KamasokananNa Kapenombangku untammuina’, pissanmi to, la Naeloran dukana’ Puang Matua untiroi tu kasangganganna mintu’ to umpandasana’.
11(59-12) Da Mipatei tu tau iato mai, da natang ungkilalai bangsaku; sangadinna pasalamba-salaoi tu tau iato mai tete dio kuasamMi, sia tibei lao, o Puang, balulang toto’ki.
12(59-13) Iatu motokan lilana, iamo kasalan sun dio pudukna, iamoto melo ke ditingkanni natumang matampona, sia belanna tampak ropunna sia mo’rang nasa’bu’.
13(59-14) Sabu’i kasengkean tu tau iato mai, sabu’i, naurunganni sappi, anna issanni kumua Puang Matua tu Kapekapuanganna Yakub, landa’ lako randan langi’. Sela
14(59-15) Bongi-bongi sae sule tu tau iato mai, sia mengua’-ngua’ susi asu sia sisellukan len lan kota.
15(59-16) Tau iato mai palong undaka’ kande, sia unnurrung-urrung, ke tae’i nadia’,
16(59-17) Apa iate aku la menanina’ umpudi kamatotoramMi, sia la mela’tekna’ ke melambi’ diona kamasokanamMi, Belanna Kamumo kupobenteng matoto’, sia pentilindungan tongku lan kamandasan.
17(59-18) Mati’ Kalemi la umpakendekna’ pa’pudian, o kamatotorangku, belanna Puang Matua kupobenteng matoto’, Iamo Kapenomban masokanku.