Kamarampasanna to umposande’ Puang Matua
1Lu lakona pangala sengo. Unturu’ baenan sengo Yedutun. Pa’pudianna Daud. (62-2) Rapa’ penaangku ma’patu’tun lako Puang Matua, tu kuNii ungkabu’tui kasalamaran:
2(62-3) Ia manna buntu batungku sia oto’na kasalamarangku, Iamo tambakukungku, natae’ angku la masang bang tilende’.
3(62-4) Sangapaparokomi la umbala’-bala’ tau? Ammi dipasiapanan nasang sangtinti rinding la songka, sia tembo’ la rondon.
4(62-5) Ia manna nabisara tu la umpasisayuranni kamala’biranna, naporai tau iato mai tu mo’rang; iatu pudukna ma’passakke, apa iatu penaanna ma’tampakki ropu. Sela
5(62-6) Rapa’ penaangku ma’patu’tun lako Puang Matua, belanna diori mai tu rannungku.
6(62-7) Ia manna buntu batungku sia oto’na kasalamarangku, Iamo tambakukungku, natae’ angku la tilende’ len.
7(62-8) Lan Puang Matua nanii tu kasalamarangku sia kamala’birangku, iatu buntu batu matoto’ku sia pentirerungangku iamo Puang Matua.
8(62-9) E solaku, tontongkomi urrannuanNi, sia bungka’i tu penaammi dio oloNa; iatu Puang Matua Iamo pentirerunganta. Sela
9(62-10) Iatu mai to bitti’ tae’ bua’na sia iatu mai to la’bi’ inang mo’rang; la tongka’ tu tau iato mai dio timbangan, sia mandu maringngan sola nasangi na iatu mai apa tang kebattuan.
10(62-11) Da mirannuanni tu apa mipabu’tu ma’pakario-rio, sia da miparannuan lo’bangi tu apa mipabu’tu mangrampa; iake memba’ka’i tu iananmi, da mipala’ka’ lakoi tu penaammi.
11(62-12) Pissanmo ma’kada tu Puang Matua, penduammo kurangi Nakua: Iatu kuasa, Puang Matua Ia tu ampunna.
12(62-13) Sia iatu kamasokanan, Kamu duka puangna, o Puang, belanna Mipabala’i tu tau sitinaya penggauran simisa’-misa’na.