Alkitab Mobile SABDA
[VER] : [TORAJA]     [PL]  [PB] 
 <<  Mazmur 64 >> 

PepakkanNa Puang Matua lako mintu’ uali ma’palele beko

1Lu lakona pangala sengo. Pa’pudianna Daud. (64-2) O Puang Matua, tanding talingai tu buangan sarroku, sia rinding pala’i tu katuoangku dio mai uali metakuran;

2(64-3) Rerungna’ dio mai kada turu’na mintu’ to kadake gau’, sia dio mai kamaarasanna to umpogau’ kabulitukan.

3(64-4) Tu unnasa lilana butung la’bo’ sia unnando-ando bulianna, iamotu kada mapannang.

4(64-5) La untinaranni to ma’bulo-lollong dio mai to’ kabunianna; tang magiang ta’pa untinaranni.

5(64-6) Napamakarra’ tu penaanna umpogau’ kakadakean, sia sama turu’ untanan buni poya, nakua: Mindara la untiroi?

6(64-7) Tau iato mai umpana’ta’ mintu’ kakadakean, nakua: Tepumokan, iatu kasiturusangki ditangnga’ mandalan tongan! Belanna iatu tangnga’na sola nasangi sia karangan inaanna mandalan tongan.

7(64-8) Apa Natinaranni Puang Matua tu tau iato mai, anNa ta’pa umbangkei.

8(64-9) Tongka’ dililana kalena untobanganni tu tau iato mai, sia minda-minda untiroi tu tau iato mai la unniling-iling.

9(64-10) Anna mataku’ tu mintu’ tau sia la umpakalelean penggauranNa Puang Matua, sia untiro melo pengkaranganNa.

10(64-11) Iatu to malambu’ la umposende paiman PUANG, sia mentiongan lako, sia mintu’ to ma’bulo lollong la massattuan.


  Share Facebook  |  Share Twitter

 <<  Mazmur 64 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran