Dual PanelDiona to mane ma’tondok dio Yerusalem sia dio lu ba’tu pira-pira kota
1Ma’tondokmi tu pangulunna bangsa iato dio Yerusalem, apa iatu tau pira ma’loterei la umpamanassai tu misa’ tau, torro dio Yerusalem, iamotu kota maindan, ke sangpulooi, na iatu kasera lan lu kota senga’.
2Napudimi bangsa iato tu mintu’ muane, tu tanning inaa ma’tondok lan Yerusalem.
3Inde sia tu mintu’ pangulu propinsi, tu ma’tondok lan Yerusalem; – nalan lu kota Yehuda pada torromo tu tau iato mai dio lu mana’na, lan lu kotana, iamotu to Israel, tominaa, to Lewi, to pabali-balian lan Banua Kabusungan sia bati’na taunna Salomo.
4Dio Yerusalem torromo tu ba’tu pira-pira to Yehuda sia to Benyamin: dio mai to Yehuda iamotu Ataya, anakna Uzia, anakna Zakharia, anakna Amarya, anakna Sefaca, anakna Mahalaleel, dio mai bati’na Peres,
5sia Maaseya, anakna Barukh, anakna Kolhoze, anakna Hazaya, anakna Adaya, anakna Yoyarib, anakna Zakharia, anakna Syela.
6Iatu mintu’ bati’na Peres, tu torro dio Yerusalem, a’pa’ratu’ annan pulona ngkarua tu ma’din parari.
7Inde sia tu to Benyamin, iamotu Salu, anakna Mesulam, anakna Yoëd, anakna Pedaya, anakna Kolaya, anakna Maaseya, anakna Itiel, anakna Yesaya;
8na iatu sidampi’na iamotu Gabai na Salai: kasera ratu’na duangpulo ngkarua tau.
9Na Yoël, anakna Zikhri pangulunna tu tau iato mai, sia Yehuda, anakna Hasenua akkele’ kapala lan kota.
10Dio mai mintu’ tominaa iamotu Yedaya, anakna Yoyarib, na Yakhin;
11Seraya, anakna Hilkia, anakna Mesulam, anakna Zadok, anakna Merayot, anakna Ahitub, iamo pangulu banuanNa Puang Matua.
12Sia mintu’ siulu’na tu umpogau’ kamenomban lan banua kabusungan: den karua ratu’na duangpulo ndua. Sia Adaya, anakna Yeroham, anakna Pelalya, anakna Amzi, anakna Zakharia, anakna Pasyhur, anakna Malkia;
13sia mintu’ siulu’na pangulu rapu, den duaratu’ patangpulo ndua. Sia Amasai anakna Asareel, anakna Ahzai, anakna Mesilemot, anakna Imer;
14sia siulu’na, to barani parari, den saratu’ duangpulo ngkarua. Iatu pangulunna, iamotu Zabdiel, anakna Gedolim.
15Dio mai to Lewi, iamotu Semaya, anakna Hasub, anakna Azrikam, anakna Hasabya, anakna Buni.
16Iatu Sabetai sola Yozabad, dio mai pangulunna to Lewi, iamo umpangului tu mintu’ pengkarangan dio salian banuanNa Puang Matua.
17Iatu Matanya, anakna Mikha, anakna Zabdi, anakna Asaf, iamo pangulu, tu unnangka’ nanian pa’pudi-pudian, ke massambayangi tau sia Bakbukya ma’penduanna dio mai mintu’ siulu’na, sia Abda, anakna Samua, anakna Galal, anakna Yedutun.
18Iatu mintu’ to Lewi, tu torro lan kota maindan den duaratu’ karua pulona nna’pa’.
19Mintu’ to ma’kampa babangan, iamotu Akub, Talmon sola mintu’ siulu’na, tu ungkampai babangan, den saratu’ pitungpulo ndua.
20Iatu tang dipokadannapa tu mai to Israel, to minaa na to Lewi, torro lan lu mintu’ kota Yehuda, pantan dio lu kota mana’na.
21Iatu mintu’ to pabali-balian lan Banua Kabusungan torro dio Ofel; iatu Ziha na Gispa pangulunna to pabali-balian lan Banua Kabusungan.
22Iatu pangulunna to Lewi dio Yerusalem iamotu Uzi, anakna Bani, anakna Hasabya, anakna Matanya, anakna Mikha, dio mai bati’na Asaf, iamotu to menani lan kamenomban dio banuanNa Puang Matua.
23Belanna denmo pa’pana’ta’na datu diona tau iato mai, iamotu atoran umpamanassa apa napotuo to menani pada tu paralluna kiallo-kiallo.
24Iatu Petahya, anakna Mesezabeel, dio mai bati’na Zerah, anakna Yehuda, to diala parea matippa’ na datu, umpoissan mintu’ kaparalluanna to buda.
25Iatu tondok nanii tau dio salian kota, iamotu to Yehuda pira torro dio Kiryat-Arba sia lili’na, dio Dibon sia lili’na, dio Yekabzeel sia kampongna;
26dio Yesua, Molada na Bet-Pelet;
27dio Hazar-Sual, Bersyeba sola lili’na;
28dio Ziklag, Mekhona sola lili’na;
29dio En-Rimon, Zora, Yarmut,
30Zanoah, Adulam sola kampongna, Lakhis sola pa’padanganna, sia dio Azeka sola lili’na. Susimoto tu tau iato mai ma’tondok dio mai Bersyeba sae lako lombok Hinom.
31Iatu to Benyamin torro dio inan: randuk dio mai Geba dio Mikhmas, Aya, Betel sola lili’na,
32dio Anatot, Nob, Ananya,
33Hazor, Rama, Gitaim,
34Hadid, Zeboim, Nebalat,
35Lod, Ono na lombok Pande kayu.
36Denmo ba’tu pirang-pirang laoanna to Lewi dio mai Yehuda male ma’tondok lako lili’na to Benyamin.