Dual PanelNehemia nasua datu Artahsasta male lako Yerusalem
1Iatonna bulan Nisan taun ma’penduang – pulona kaparentanna datu Artahsasta, tonna sakka’ tu uai anggoro’ dio tingayona, kuangka’mi tu uai anggoro’, kutadoanni datu. Tae’ lenpa kumasussa to lendu’na dio olona datu.
2Ma’kadami datu lako kaleku nakua: Ma’apai namaru’gun lindomu ditiro, natae’ mumasaki? Tae’ senga’na te sangadinna den kamasussan lan penaammu. Attu iato matakkukmo’.
3Ma’kadamo’ lako datu kukua: Namasakkemora tu datu tontong sae lakona! Umba nakua tang la maru’gun lindoku ditiro, na dio lu kota iamotu inan nanii lamunanna nene’ to doloku, sanggangmo sia iatu babanganna puramo nakande api.
4Ma’kadami datu lako kaleku nakua: Apara palakummu? Attu iato massambayangmo’ lako Puang Matua dao suruga.
5Ma’kadana’ lako datu kukua: Iake napasituru’i datu sia iake nakalo’na’ penaanna, la misuana’ lako Yehuda lako kota tu nanii lamunanna nene’ to doloku, angku bangunni sule.
6Ma’kadami datu lako kaleku tonna unnisung tu bainena dio sa’dena, nakua: La sangapara mulingkai sia piran ammu la sule? Iatongku pamanassami tu attunna, nakalo’mi penaanna datu ussuana’.
7Sia ma’kadana’ lako datu kukua: Iake nakalo’i penaanna datu, melo ke misuai tu tau umbenna’ ba’tu pira-pira sura’ kuparampoi lako tu mai to maraa lompo dio lili’ sambalinna lu Salu, anna eloranna’ tau iato mai lendu’ sae lako rampoku lako Yehuda;
8sia misa’ sura’ lako Asaf, petoro’ pangala’na datu, anna benna’ kayu la kupotangdan rattiang dio babanganna benteng tu sikande Banua Kabusungan sia dio rinding tembo’ kota sia dio banua la kunii torro. Nabenmo’ datu tu sura’ iato mai, belanna narondongna’ pa’kaborro’Na KapenombangKu.
9Ta’kala rampomo’ lako tu mai to maraa lompo tu dio lili’ sambalinna lu Salu, angku parampoi lako tau iato mai tu mintu’ sura’na datu. Sia nasua duka datu tu ba’tu pira-pira kamandang surodadu sia pakkanarang ussolanna’.
10Iatonna rangimi Sanbalat, to Horon sia Tobia, kaunan to Amon, lendu’mi mapa’di’na penaanna, kumua saemo misa’ tau la undakaran melo to Israel.
Bunga’na pengkaranganna Nehemia dio Yerusalem
11Ta’kala rampomo’ lako Yerusalem; iatongku tallung allomo dio,
12ke’de’mo’ tonna ibongi sola ba’tu pira-pira tau. Moi misa’ tau tae’ kupokadan tu apa Napabu’tu kapenombangku lan penaangku tu la kupogau’ diona Yerusalem. Sia moi misa’ olo’-olo’ tae’ kubaa sangadinna ia manna tu kusakeinna.
13Iatonna ibongi tassu’mo’ lan mai babangan Lombok, ma’palulako kalimbuang Ula’, tarru’ lako babangan Au, sia kuparessa tu rinding tembo’ Yerusalem, tu ro’pokmo sia iatu babanganna tu puramo diballa api.
14Tarru’mo’ lako babangan kalimbuang sia lako limbong datu, apa inde to dio sukku’mo la naolai tarru’ tu olo’-olo’ kusakei.
15Iamoto unnola lombokmo’ tuka’ langngan tonna ibongi, angku paressai tu mai rinding tembo’. Mangkato maleomo’ unnola babangan Lombok, nasusi to tibalikmo’ sule.
16Iatu mintu’ pangulu tae’ natandai tu kuolainnamo male sia apa mangkamo kupogau’; belanna lako to Yahudi, to minaa, to kapua, pangulu sia to diala parea senga’ tae’pa kupokadanni sae lako attu iato.
17Attu iato ma’kadamo’ lako tau iato mai kukua: Mitiromo tu kadipandasanta, kumua iatu Yerusalem sanggangmo na iatu mai babanganna puramo diballa api. Maikomi tabangunni sule tu rinding tembo’ Yerusalem, anna damo tapomatunai.
18Iatongku pokadammi tau iato mai, kumua narondongna’ pa’kaboro’Na Kapenombangku, sia umba nakua tu datu mangkamo ma’kada lako kaleku, ma’kadami tu tau iato mai nakua: La ke’de’ki’ umbangunni sule. Napabatta’mi tu penaanna ungkarangi tu pengkarangan melo.
19Iatonna rangimi Sanbalat, to Horon sia Tobia, kaunan to Amon sia Gesyem, to Arab tu iannato, ma’tellemi sia ma’lo’bo tu tau iato mai lako kaleki, nakua: Apa toda kamu mipogau’? La umbalirokomika datu?
20Apa kubali tu tau iato kukua: iatu Puang Matua dao suruga Iamo la umpamaupa’ pengkarangangki, na kami, te taunNa, la ke’de’ umbangunni; apa iatu kamu tae’ taami ba’tu patu borongmi ba’tu kadipengkilalaiammi lan Yerusalem.