Dual PanelRinding tembo’ disundunni moi naden tau mangea
1Iatonna rangimi Sanbalat, Tobia sia Gesyem, to Arab, sia mintu’ uali senga’ta, kumua kusundunnimo umbangunni sule tu rinding tembo’ sia tae’mo torro tu lo’bangna, moi tae’pa kupalakoi tu ba’bana lan babangan,
2nasuami Sanbalat sia Gesyem tu tau lako kaleku nakua: Maikomi tasirampun dio Kefirim diong lombok Ono. Apa iatu tangnga’na tau iato mai la ungkadakeina’.
3Apa ussuana’ tau male umpokadanni kumua: Marassanna’ ungkarang pengkarangan kapua, iamoto natae’ kuma’din male mati’. Ma’apai nala dipatadang tu pengkarangan, belanna la kutampe, kumale mati’?
4Sae lako penna’pa’ situru-turu’ ussua tau lako kaleku umpokadai susito, apa saeoi susi duka bangsiato kubalianni.
5Nasuami Sanbalat tu taunna tonna ma’pellimanna lako kaleku untangke misa’ sura’ tibungka’.
6Disura’ lan susite nakua: Tiseno-senomo dio lu mintu’ bangsa tu kareba sia napamanassamo Gasymu, kumua iatu kamu sola mintu’ to Yahudi ma’tanga’mo la mangea; iamoto mimasara’ umbangunni sule tu rinding tembo’, sia den duka kareba nakua morai dukakomi ade’ dadi datunna tau iato mai.
7Sia miangka’ kalenamo tu ba’tu pira-pira nabi lan lu Yerusalem la umpetambangkomi, kumua: Denmo misa’ datu dio Yehuda! Tonganna iate apa iate la rampo lako datu. Iamoto maikomi anta sipa’kada-kada.
8Apa kusua tu tau male umpokadai, kumua: Moi sangbuku kada tae’ natongan tu mintu’ apa mipokada, sangadinna panggaraga penaammi kalena.
9Belanna la morai tu tau iato mai umpakataku’kanni, nasanga kumua: Nalangga’ tu limanna tau iato mai natampei tu pengkarangan iato, anna tang dadi. – Iamoto, pematoto’i tu limangku!
10Iatongku tama banuanna Semaya, anakna Delaya, anakna Mehetabeel, – tonna iato den sakkalangan, – ma’kadami nakua: Manassa la maleki’ sola lako banuanNa Puang Matua tama tangnga Banua Kabusungan, anta salli’ nasangi mintu’ ba’bana, belanna iatu tau iato mai la sae umpateikomi, manassa bongi ia bangsiamote nasae la umpateikomi.
11Apa ma’kadana’ kukua: Ma’dinraka misa’ muane susi aku te la mallai? Ma’dinraka tu misa’ tau susi aku te tu tama Banua Kabusungan la tuo? Tae’ kula male.
12Belanna kutandai melo, kumua tae’ Nasuai Puang Matua, sangadinna ia sia nama’nubua’ diona aku, belanna nasaroi Tobia sola Sanbalat.
13Ia sia nasaroi susito, kumua angku mataku’ sia iake kupogau’i susito la kasalanna’; na iamo la napotete tau iato mai umpakadake lelena’, kumua nalo’bona’.
14O Kapenombangku, kilalai tu Tobia sola Sanbalat sitinaya penggauranna sia ia duka tu nabi baine Noaja sia ba’tu pira-pira nabi, tu morai la umpakataku’na’.
15Disundunnimi tu rinding tembo’ tonna allo ma’penduangpulo llima bulan Elul, iamotu lan limangpulo ndua allona.
16Iatonna rangimi ualingki tu iannato, mataku’mi tu mintu’ bangsa untikuikan sia rosso penaanna, anna mangaku kumua iate pengkarangan iate dikarang tete dio pa’tunduanNa Kapenombanta.
17Ia duka tonna allo iato iatu mintu’ to mala’bi’na Yehuda umpakatu sura’ buda lako Tobia na dio duka mai Tobia den sura’ sae lako tau iato mai.
18Belanna budamo tu to Yehuda mangka sibasse Tobia, belanna minintunna Sekhanya, anakna Arah, na iatu anakna muane Yohanan umpobaine anakna Mesulam, anakna Berekhya.
19Sia natendeng tu mintu’ kameloanna dio tingayoku sia naparampo tu mintu’ kadangku lako kalena. Iatu Tobia umpakatu sura’ la umpakataku’na’.