Dual Panel1(8-2) saemi sirampun tu mintu’ bangsa butung to misa’ri dio lu tana lapang dio tingayo babangan Uai. Napalakumi tau iato mai tu Ezra, pandita sura’ la unnala sura’ Sukaran alukna Musa, tu Napa’bengan PUANG lako to Israel.
2(8-3) Nabaami to minaa Ezra tu sura’ Sukaran aluk lako tingayo kombongan, la muane la baine sia mintu’ tu to ma’dinmo untandai tonna allo bunga’na bulan ma’pempitu.
3(8-4) Nabasami Ezra lan mai sura’ iato dio tana lapang dio tingayo babangan Uai randuk dio mai tibangka’na masiang sae lako tangnga allo dio tingayona mintu’ muane sia baine sia mintu’ tu to ma’dinmo untandai. Natananni tonganmi talinga mintu’ bangsana tu sura’ Sukaran aluk.
4(8-5) Bendanmi tu Ezra, pandita sura’ dao lempo kayu, tu inang iamo diparandanan. Dio sa’dena, iamotu dio kananna bendan tu Matica, Sema, Anaya, Uria, Hilkia, na Maaseya; dio sa’de kairinna iamotu Pedaya, Misael, Malkia, Hasum, Hasbadana, Zakharia na Mesulam.
5(8-6) Nabungka’mi Ezra tu sura’ iato natiro mintu’ bangsana, belanna bendan madao na iatu mintu’ tau iato mai. Iatonna bungka’mi tu sura’ iato, bendanmi tu mintu’ bangsana.
6(8-7) Napudimi Ezra tu PUANG, Puang Matua pasareongan, anna mebali tu mintu’ bangsana, sia mempala’ nasang langngan, nakua: Amin! Amin! Malinguntu’mi tu tau iato mai sia tukku menomba rokko padang dio oloNa PUANG.
7(8-8) Naada’imi Yesua, Bani, Serebya, Yamin, Akub, Sabetai, Hodia, Maaseya, Kelita, Azarya, Yozabad, Hanan, Pelaya sia mintu’ to Lewi tu bangsa iato diona Sukaran aluk, anna bendan dio inanna.
8(8-9) Napamalesomi nabasan tau iato mai tu sura’ iato, iamotu Sukaran alukNa Puang Matua sia nabattuananni, anna tandai tau tu apa dibasanni.
9(8-10) Ma’kadami tu Nehemia, iamotu to maraa, sola Ezra, tu to minaa na pandita sura’ sola mintu’ to Lewi, tu unnada’i bangsana, nakua: Maindan te allo iate lako PUANG, Kapenombammi; iamoto da namasussa tu penaammi sia da mitumangi’. Belanna tumangi’ tu mintu’ bangsa iato, tonna rangii tu kada Sukaran aluk.
10(8-11) Sia ma’kadapa lako tau iato mai nakua: Malemokomi, ammi kandei tu apa mammi’ sia unniru’ apa matappa’ sia pantan ma’kada’pa lako minda-minda tu tae’ nasakka’, belanna maindan te allo iate lako Puangta; iamoto da namasussa penaammi, belanna iatu kaparannuan bannang dio PUANG Iamo pentirerungammi.
11(8-12) Napakatana dukami to Lewi tu penaanna mintu’ bangsa iato, nama’kada nakua: Rapa’mokomi, belanna maindan te allo iate, da’mo namasussa tu penaammi.
12(8-13) Malemi tu mintu’ bangsana tau iato mai kumande sia mangiru’, anna ma’kada’pa sia sila’tekan parannu, belanna naissanmo tau iato mai tu apa dipokadanni.
13(8-14) Iatonna allo ma’penduan saemi tu mai pangulu rapunna mintu’ bangsana sola mintu’ to minaa sia to Lewi sirampun lako Ezra, pandita sura’, la umparessai tu kada Sukaran aluk.
14(8-15) Naappa’mi tau iato mai den disura’ lan sukaran aluk tu mangka Napa’bengan PUANG nalopian Musa, kumua: iatu to Israel, ke allo pa’gauran lan bulan ma’pempitu la torro lan kalumba.
15(8-16) Sia la napatassu’ tau iato mai tu misa’ parenta, la mesua umpetambanni lan lu mintu’ kotana tau iato mai sia lan Yerusalem, kumua: Tassu’komi male langngan buntu, ammi baai dio mai tu tangke saitun, tangke saitun pangala’, tangke murdu’, tangke koroma sia tangke makamban daunna, la digaragai kalumba, susitu mangka disura’.
16(8-17) Tassu’mi tu tau iato mai, naalai tu tangke kayu, nagaraganni kalumba tu kalena, napantan umpadaoi lu bubunganna sia dio lu tarampakna sia tarampak banuanNa Puang Matua sia dio tana lapang babangan Uai sia dio tana lapang babangan Efraim.
17(8-18) Iatu mintu’ kombongan to sule dipali’ unggaragai kalumba anna torro lan. Iatu susinna to tae’ lenpa napogau’i to Israel randuk dio mai linona Yosua, anakna Nun, sae lako allo iato. Bu’tumi kaparannuan kapua.
18(8-19) Nabasami tau kiallo-kiallo lan mai sura’ Sukaran alukNa Puang Matua randuk dio mai allo bunga’na sae lako katampakanna; napakarayami tu allo pa’maruasan iato pitung allo, na iatonna allo ma’pengkarua napakaraya tu kasirampunan kapua, susitu mangka dipana’ta’.