Dual PanelKarangi tu pengkarangammu sia da naposelangi penaammu tu poleanna
1Tibemi tu rotimmu rokko to’ uai, belanna la muappa’ sule, ke ba’tu pirang-pirang allomi lendu’na.
2Taa pitui, ondongpi taa karuai tu iannato belanna tae’ muissanni kamandasan apara la urrampoi te lino.
3Ianna maru’gun tu gaun, umbanasami tu uran kamban tama lino; sia ianna songka tu batang kayu lu sau’ ba’tu lu rekke, iatu nanii songka, inde dukato nanii sumpandan.
4Minda-minda tu umpenandai bang angin, tae’ nala mangambo’, sia minda-minda untiro bang gaun, tae’ nala megandung.
5Susitu iko tae’ mutandai tu lalanna angin sia umba nakua tu bukunna pia lan pa’tambukanna misa’ baine ma’tambuk, susi dukamoto tae’ muissanni tu penggauranNa Puang Matua, tu ungkombong mintu’na.
6Ambo’i tu bannemu, ke melambi’i sia da mutorroi mengkarang moi namakaroenmo, belanna tae’ mutandai umbanna tu dadi melo, iaraka te iarakato, ba’tu melo dua siaraka tuona.
Kilalai tu Totumampamu lan attu kamangurammu
7Manaman tu masiang sia paiman tu matanta untiroi tu mata allo.
8Iamoto, iake tuoi tu tau masai, melo, ke parannui tu penaanna diona tu mintu’nato, apa sipatu duka la nakilalai, kumua buda tu allo la nanii kamalillinan: Iatu mintu’na apa la dadi tae’ gai’na.
9Melo ke parannuko, e pia muane lan attu kamangurammu, sia la sende paiman tu penaammu su’ding pia muanepoko; ondongpi turu’i tu mintu’ lalan inaammu sia patiro matammu, apa issanni kumua belanna mintu’ tu iannato la Napatamako Puang Matua pa’paolaian salu.
10Iamoto, kanandai tu penaammu da natama karossoan sia patoyangi tu kamasussan dio mai kalemu belanna iatu kamanguranta sia kamalolleranta, tae’ gai’na.