Alkitab Mobile SABDA
[VER] : [TORAJA]     [PL]  [PB] 
 <<  Pengkhotbah 5 >> 

Iake mengkaolako lako Puang Matua pakala’bi’i

1(4-17) Kanandai tu lentekmu, ke maleko lako banuanNa Puang Matua; belanna iake mennoloko ma’perangi melo ia na iatu mintu’ pemala’ tu napemalaran to baga, belanna tae’ naissanni, kumua umpogau’mo kadakena.

2(5-1) Da mumadomi’ ma’kada sia da nasasai penaammu umpatassu’ kada dio oloNa Puang Matua; belanna lan Ia suruga tu Puang Matua, ammu dao iko kuli’na padang, iamoto la sidi’ri tu kadammu.

3(5-2) Belanna susito tindo dadi, belanna kabudanna sara’, susi dukato tu kada kabagan diona kabudanna ulelean.

4(5-3) Iake mangallonanko lako Puang Matua, da mudampa-dampai umpalesso’i, belanna tae’ naalai penaanNa tu to baga, iamoto palesso’i tu apa mangka muallonan.

5(5-4) La’biran da pissan mumangallonan, ke la tae’mira mupalesso’i tu pangallonammu.

6(5-5) Da mupopa’elo’nai tu pudukmu umbaako tama kasalan, ammu ma’kada dio tingayona sumbung pudukNa Puang Matua kumua mangka lendu’ tu kadangku. Ma’apai mula umpare’dekki ara’Na tu Puang Matua diona tu kadammu, Naurunganni ussanggangi tu panggaraga limammu?

7(5-6) Belanna susitu kabudanna tindo, susi duka tu to kabudanna kada tang kebattuan; apa la mukataku’ tu Puang Matua.

Tae’ nabuda bang gai’na tu kasugiran

8(5-7) Iake untiroko to bongko dipakario-rio sia dilullu’ tu katonganan sia kamaloloan lan propinsi, da mukamangngai tu iannato, belanna iatu misa’ to kapua pangka’na umpenunui tu misa’na, sia den pole’opa ia tu madaona umpenunui tu tau iato mai.

9(5-8) Maupa’ sia tu tondok lan mintu’nato, ke denni misa’ datu, tu ungkanandai lakoan padang.

10(5-9) Minda-minda ungkamali’ doi’, tae’ nadipedia’i doi’, sia minda-minda ungkamali’ kasugiran, tae’ nadipedia’i bunga rangka’na. Ia duka tu apa iato tae’ gai’na.

11(5-10) Iake kerangnganni tu ianan, inde dukato nanii kerangngan tu to ungkandei; sia apara upa’na tu to unnampui, sangadiri natirona manna mata?

12(5-11) Iatu kamatindoanna to mengkarang manaman, la sidi’ la buda tu kandena; apa iatu kadiaranna to sugi’ napobannang tang mamma’.

13(5-12) Kutiro den misa’ kamandasan tu umpa’dikki tau lan naarrang matanna allo, iamotu kasugiran nananna puangna, nama’katampakanna naposanggang.

14(5-13) Belanna pa’de tu kasugiran iato, napobua’ kamatilakan; sia iake undadianni misa’ pia muane, natae’mo apa-apa naampui.

15(5-14) Susitu tau tassu’ lan mai inan taunna indo’na, susi dukato la male, iamotu ma’kambelang susi tonna tama te lino, anna tae’ naala apa tete dio saro ra’ta’na, tu natampean anakna.

16(5-15) Tonganna ia dukamo misa’ kamandasan tu umpa’dikki penaa; pada bangsia saena susi dukato tu malena. Apara sarona ungkara’ta’i kalena, ke naalai angin?

17(5-16) Ondongpi ungkande bang kandena lan mintu’ allo katuoanna nakabu’ kamalillinan, sia umperasai buda karossoan penaa sia kamaparrisan sia saki inaa.

18(5-17) Manassa inde sia tu kutiro melo, iamotu sipatu, ke kumandei sia mangiru’i tu tau sia umperasai melona diona mintu’na ra’ta’na tu nanii mara’ta’ lan naarrang matanna allo, lan sangattu’ allo katuoanna, tu Nakamaseanni Puang Matua, belanna iamoto tu taana.

19(5-18) Susi dukato minda-minda tu Nakamasei Puang Matua kasugiran sia ianan buda sia Naelorampa la ungkandei to sia la unnalai tu taana, sia la umposende ra’ta’na – iatu iannato misa’ pa’kamaseNa Puang Matua.

20(5-19) Belanna tae’ napembuda ungkilalai, kumua kondi’ tu katuoanna, saba’ Napasende Puang Matua diona kaparannuan penaanna.


  Share Facebook  |  Share Twitter

 <<  Pengkhotbah 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran