Dual PanelMa’penna’pa’na bating: Kamandasan ussonda kamala’biran
1Ma’patumbai tu bulaan namalottongmo. Anna tang pandillakmo tu bulaan massang! Iatu mai batu maindan tisambo’mo dio lu mintu’ kasepangan lalan.
2Iato mai anak Sion, tu mala’bi’ tongan, dolona siangga’ bulaan massang, ma’patumbai anna dipapada busso litak, panggaraga to tumampa kurin.
3Moi serigala umpatado sia ia susunna, la nasusu anakna; apa iatu anak dara bangsaku masarrangmo, susi burung unta dio lu padang pangallaran.
4Iatu pia’-pia’ sumusupa, la’ka’ tu lilana langngan lingarona napobua’ kama’rangan, iatu mai pia umpalaku roti, apa moi misa’ tau tae’ untadoanni.
5Iatu to ma’pemammi’ bang kumande limpumo mangelo dio lu mintu’ lalan; iatu to ditaranak mamma’ dao sampin karamisi, urraka’mo pa’rampunan au.
6Belanna iatu kakadakeanna anak dara bangsaku mandu kapua anna kasalanna Sodom, tu dibaliangan lan sangkappidian mata, moi misa’ tau tae’ ungkasara’i.
7Iatu mai arungna masero na ambun makko, sia mabusa anna bumbungan, pa’kaleanna mararang anna merdan, kalena susito batu parimata lasuri’.
8Totemo iatu kalena malottong anna sisaling, tang ditandaimo dio lu lalan, kuli’na tikkurrung sia la’ka’ lako bukunna, sia marangkemo susi kayu.
9Maupa’ iatu to mate nakande pa’dang, anna iatu to mate mangelo; samasai-sainna samoro’-moro’na susito ditobok, belanna iatu padangna tang memburamo.
10Iatu limanna baine matirinna untollo’mo anakna; iamoto tu napokande, tonna lambi’ kasangganganna tu anak dara bangsaku.
11Napasundunmo PUANG tu kare’dekan ara’Na. Nabarrakan tu kadukkuanna kasengkeanNa. Ondong pissan Napadukkumo tu api lan Sion, tu umpepurai nakande tu parandangan tembo’na.
12Mintu’ datu lan lino sia iatu mai to untongkonni kuli’na padang tae’ napatonganni, kumua iatu to pabali-bali sia uali nakulle tama babangan Yerusalem.
13Iatu iannato buntu tumangna kasalanna tu mai nabinna, sia kakadakeanna tu mai to minaanna, tu mangka umpatibollo rarana to malambu’ lan tangnga-tangngana Yerusalem.
14Sumasak butung to buta dio lu lalan, umpentombang rara; narumbu pakeanna tu apa napemalii ungkaka’i.
15Metamba tu tau lako: Lendu’mokomi! To maruttak! Lendu’mokomi, lendu’mokomi, da mikaka’i lako! La mallai tu tau iato mai, ondongpi la salamba salao; melo ke nakua tau dio lu mintu’ bangsa, kumua: Tae’mo nama’din torro inde te.
16PUANG kalenamo umpatisambo’-sambo’i tu tau iato mai; Tae’mo Nasailei tu tau iato mai. Iatu tau iato mai tae’ nakatirinnai tu to minaa, Sia iatu to matua tae’ nakaturu-turui.
17Tontong bang tu matanta ma’penunu sia ma’peagi – apa tae’ gai’na; dao menara pa’kampanta tanii umpemantangi tu misa’ bangsa tang nakulle merampanan.
18Attu iato nabasamiki’ matanna tau iato mai, ke mentengkaoki’, naurungan tae’mo tama’din umpolalan rante malona’ta; upu’mo allota sia sumpumo sumandakta, manassa, upu’mo allota!
19Mintu’ to unnula’ki’ matira’ ia anna langkan maega dao langi’, masarrang tongan unnula’ki’ dao buntu, sia naodo’ki’ dio lu padang pangallaran.
20Iatu penaa tassu’ dio to’ illongta, tu Natokko PUANG, didammak dio to’ kalo’tokna, tu tatangnga’ kumua: diong pentiongananna tanii tuo dio lu mintu’ bangsa.
21Parannu bangmoko sia sende paimanko, e anak dara Edom, tu torro dio lili’na Us – la ditadoan dukamoko tu irusan, naurunganni malango sia ma’kambelang.
22Upu’mo tu kakadakeammu, e anak dara Sion, tae’mo anNa la umpali’ko Puang. La napapakkanni Puang tu mintu’ kakadakeammu, e anak dara Edom, sia la Napapayan tu kasalammu.