Dual PanelDiona taun katorroan
1Iake ganna’mi pitung taun, la mupa’bengan tu misa’ kamaseroan indan.
2Inde sia tu atoran kadiseroian indan: iatu to ma’peindan la napamasero tu apa napa’peindanan lako solana; tae’ na la umparukui mamaya’ tu solana sia siulu’na, belanna mangkamo dipa’peissanan la umpakala’bi’ PUANG.
3To salian bangsa ma’din musua mamaya’, apa iatu pa’peindanmu lako siulu’mu, la mupamasero.
4Apa tae’ tu to kalala’ misisolan, belanna manassa iatu PUANG la umpamasakkeko lan tondok, tu Nasorong PUANG, Kapenombammu, lako kalemu la mupoapa mupotaa mana’,
5podo ke muperangii tonganni tu PUANG, Kapenombammu, sia mukaritutui tongan te pepasan tu kupapassanangko totemo.
6Iake Napamasakkeko PUANG, Kapenombammu, susitu Naallurangko, manassa la mupaindanni tu mintu’ bangsa, apa iatu kalemu tae’ mula mangindan; sia la muparenta tu mintu’ bangsa, apa iatu iko tae’ na la umparentako.
7Iake den to kalala’ dio lu kamu, iamotu mai siulu’mu lan misa’ pa’tondokammu, iamotu lan tondok, tu la Nasorong PUANG, Kapenombammu, lako kalemu, da mupamakarra’ penaammu, ba’tu ungka’panan lima siulu’ kalala’mu,
8sangadinna la mubungkaran pala’- mu, ammu kasokanni umpaindanni, tu la umponnoi kakuranganna.
9Kanandai tu kalemu, da nabu’tu tu tangnga’ magi’gi’mu lan penaammu, kumua mandappi’mo tu taun ma’pempitu, iamotu taun kadiseroian, – mupobannang tang mamase lako siulu’ kalala’mu, sia tae’ mubenni apa-apa, anna urunganni umposarroko lako PUANG, ammu pokasalanni.
10Manassa la masokanko umpaindanni sia da napomasussai penaammu, ke mubenni apa, belanna iamo napobannang to, iatu PUANG, Kapenombammu umpamasakkeko lan mintu’ pengkarangammu sia lan mintu’ apa mukarang.
11Belanna iatu to kalala’ tae’ na la pa’de len lan tondok; iamoto kupepasananni lako kalemu susite, kukua: Bungkaranni pala’mu tu siulu’mu, tu to makario-rio sia to kalala’ lan tondokmu.
Kadipamaseroanna tu mai kaunan
12Iake den siulu’mu, misa’ muane to Ibrani, ba’tu misa’ baine to Ibrani, sandang lako kalemu, manassa la napentoeangko lan annan taunna, apa lan taun ma’pempitu, la mupamaseromo to.
13Sia iake mupamaseromi, da musua lo’bangi male.
14La mukasokanni mubenni tu dombamu sia bembe’mu sia apa dio mai panglullurammu sia dio mai pa’parran anggoro’mu; sia dio mai mintu’ apa Napa’kamasean PUANG, Kapenombammu, lako kalemu, la muben lako kalena.
15La mupengkilalai, kumua mangkamoko kaunan lan tondok Mesir sia Nalendokammoko PUANG, Kapenombammu; iamoto kubenko totemo te pepasan.
16Apa iake ma’kadai lako kalemu nakua: Tae’ kumorai untampekomi, – belanna nakamali’komi sola repokmi, belanna manaman dio kalemi,
17manassa la muala tu petossok, mutossokki tu talinganna sitarru’ ba’ba, anna tontong sandang lako kalemu. Susi dukato la mupogau’ lako baine mupotosandang.
18Da namagasa penaammu la ussuai male, belanna annanmo taunna mupotosumaro tu umpengkarangangko penduan manglokkon; ke susito la Napamasakkeko PUANG, Kapenombammu, lan mintu’ apa mupogau’.
Anak pa’bunga’na patuoan
19Iatu mintu’ lakinna dio mai anak pa’bunga’, tu dadi dio lu sapi sia domba sia bembe’, la mupamarimbangan PUANG, Kapenombammu. Da muoongi dio lu pengkarangammu tu anak pa’bunga’na sapimmu, ba’tu unggontingi tu anak pa’bunga’na dombamu.
20Iake taunoi la mukande tu duku’na dio oloNa PUANG, Kapenombammu, dio inan tu la Natonno’ PUANG, la iko la iatu mai to lan banuammu.
21Apa iake denni tattanna, iamotu ke keppai ba’tu butai, ba’tu mandu maro’i tu tattanna, da mutunui dio oloNa PUANG, Kapenombammu.
22Lan pa’tondokammu la munii ungkandei, la to tang masero la to masero, susitu kijang sia donga.
23Sangadinna iatu rarana da mukandei; la mubolloan susi uai.