Dual PanelAtoran diona tananan ra’
1Iake la ke’de’ko lao parari ullaoi ualimmu, ammu tiroi tu mai darang sia kareta, iamotu misa’ bangsa mandu buda anna iko, manassa da mukataku’i, belanna iatu PUANG, Kapenombammu, urrondongko, tu ussolangko sun lan mai tondok Mesir.
2Iake tarru’mokomi lao parari, la tassu’ tu to minaa dio tingayomi, anna ma’kada lako to buda, nakua:
3Perangii, e to Israel! Tarru’komi lao parari, ullaoi ualimmi; da naranggang tu penaami sia da mimataku’, da mimagiang sia da mipotirambanni tu tau iato,
4belanna iatu PUANG, Kapenombammi den ussisolangkomi la umparariangkomi ullaoi ualimmi, kumua Nabenkomi kapataloan.
5Sia la ma’kada tu mai mantari’ lako to buda nakua: Minda tu umbangun banua ba’ru, apa tae’pa nanii? Dieloran male sule lako banuanna, kumua da nasabu’ lan kapararian, sia nanii to senga’ tu banuanna.
6Sia minda tu untananni pa’lak anggoro’, anna tae’pa nakandei tu buanna? Dieloran male sule lako banuanna, kumua da nasabu’ lan kapararian, sia nakande to senga’ tu bua anggoro’na.
7Sia minda tu sikampamo misa’ baine, natae’pa napobainei? Dieloran male sule lako banuanna, kumua da nasabu’ lan kapararian sia da napobainei to senga’ tu baine iato.
8Sia ma’kada tu mantari’ lako to buda nakua: Minda mataku’ sia ranggang penaanna? Dieloran male sule lako banuanna, kumua da napabonnong tu penaanna siulu’na susi penaanna.
9Iake naupu’imi mantari’ umpokadai lako to buda tu iannato, la naangka’ tau tu mai kamandang surodadu umpangului tu mai to buda.
10Iake mureke’i tu misa’ kota la urrarii, la ussitimbangiko kamarampasan.
11Iake napebalii meloko sia nabungkarangko babangan, manassa iatu mintu’ pa’tondokan, tu torro lan, la ma’diama lompo dio kalemu sia la umpengkarangangko.
12Apa iake tae’ misikaelo, sangadinna la morai urrariiko, manassa la mutalimbung tama.
13Sia la Nasorong PUANG, Kapenombammu, tama kuasammu, ammu pata’pai bassi mataran tu mintu’ muane umpa’tondokki.
14Sangadinna iatu mintu’ baine sia iatu mai pia, patuoan, sia mintu’ ianan lan kota, mintu’na pangrampa iato la murampan kalemu sia iate apa murampa dio mai ualimmu, tu Nabenko PUANG, Kapenombammu, ma’din mupake.
15Susimoto la mugauran mintu’ kota, tu mandu toyang dio mai inanmu, tu tang naala bilangan kotana te mai bangsa iate.
16Apa dio mai kotana te mintu’ bangsa tu la Nasorongangko PUANG, Kapenombammu, la mupotaa mana’, moi misa’ apa kepenaa, da mupatuoi.
17Sangadinna la musabu’i nasang tu bangsa iato, iamotu to Het, to Amori, to Kanaan, to Feris, to Hewi sia to Yebus, susitu Napasanangko PUANG, Kapenombammu,
18kumua da naada’ikomi umpogau’i tu mintu’ apa megallian, tu napogauran deatanna, miurungan umpogau’ kasalan umbali PUANG, Kapenombammi.
19Iake masaiko untalimbung tamai tu misa’ kota ullaoi sirari, la unnalai tu kota iato, da mulellengi uase ummangsanni tu mai to’ kayunna tiku lao, iatu buanna ma’din mukande, apa da mulellengi. Belanna tolinoraka tu to’ kayu dio lu padang, ammu pasangbilanganri to ditalimbung tama?
20Sangadinna iatu to’ kayu mutandai, kumua tae’ nadikande tu buanna, iamoto tu ma’din mumangsanni sia mulelleng, ammu popa’tombonni langngan munii ullaoi tu kota musirarian sae lako musongkanna.