Dual PanelDa mutarru’ masa’ga’ lan penggaurammu
1Iake den kasigaganna tau, anna pennoloanni lako to ma’paolai salu, anna ra’ta’i to ma’paolai salu, natongananni tu to tongan, napasalai tu to sala,
2manassa iake sipatui la dibamba tu to sala, la nasua to ma’paolai salu umpasumpandanni, sia la umbambai ba’tu pempiran-piran dio tingayona sitinaya salana.
3La mesua umbambai pempatangpulo, tae’ nama’din la’bi, kumua, iake mesuai umbambai losong, da anna matuna tu siulu’mu dio pentiromu.
4Da mukambui tu sapi dipa’palulluran.
Diona baine balu napobaine siulu’na muanena
5Iake to massiulu’ torro sola anna mate misa’ tang ma’dadian muane, iatu bainena to mate iato, tae’ nala umpobainei to senga’, tu tang sangdadianna muane iato; sangadinna ipa’na lao, unnalai napobainei, anna ma’rampanan kapa’ to siipa’.
6Iatu anak pa’bunga’na tu nadadian la direken anakna siulu’na, tu mangka mate, kumua da napa’de tu sanganna dio mai to Israel.
7Apa iake manokai tu muane iato unnala ipa’na la napobaine, la male tu ipa’na lako to’ babangan umpennoloi pekaamberan sia ma’kada nakua: Manoka tu ipa’ku umpatontong sanganna siulu’na lan Israel, belanna tae’ namorai umpobainena’ unturu’ rampanan kapa’na to siipa’.
8Iamoto la natambai pekaamberanna kotana, anna sipa’kada. Ianna tontong manoka, anna ma’kada: Tae’ kuporai umpobaines-
9la male tu ipa’na urreke’i dio pentirona pekaamberan, anna patassu’i tu sepatunna sia natudui tu lindona, anna messa’bi nakua: Susimoto la dipogau’ lako muane tu tae’ namorai umbangunan banuanna siulu’na.
10Dio lu to Israel la disangai, kumua: Banuanna to ditassu’i sepatunna.
Digagai ma’gau’ tang unnissan siri’
11Iake denni muane sibobo’, na iatu bainena tu misa’na sae la umpasisarakki la urrampanan muanena dio mai limanna to ullonga’i sia naulu tu limanna anna dammakki tu kasirisanna muane nasiboboran muanena,
12manassa la muta’takki tu limanna baine iato, da mukasayangi.
Passukaran sia timbangan tongan
13Da munanna da’dua batu timbangan lan kandu’mu, misa’ kapua na misa’ bitti’.
14Da munanna da’dua sukaran epa lan banuammu, misa’ kapua na misa’ bitti’.
15Sangadinna la munanna tu misa’ batu timbangan tang kurang sia tongan; la munanna duka tu misa’ sukaran epa tang kurang sia tongan, ammu malambe’ sunga’ lan tondok tu la Nabenko PUANG, Kapenombammu.
16Belanna minda-minda umpogau’i susite, iamotu minda-minda umpogau’ tang malolo, iamo Nakagalli PUANG, Kapenombammu.
To Amalek sipatu disabu’i
17La mukilalai tu apa nagaurangko to Amalek dio lu lalan, tommi tassu’ lan mai Mesir,
18umba nakua sae umpessitammuiko sia ullaoiko sia ussanggangi tu mintu’ to tang pa’bela tu undi bang dio boko’, tommu mata’ka’ sia bo’yok sia umba nakua tang ungkataku’ Kapenomban.
19Iake Nabenmoko PUANG, Kapenombammu, kapelayoan dio mai mintu’ ualimmu tiku lao lan tondok, tu la Nabenko PUANG, Kapenombammu, la mupotaa mana’, attu iato la mupa’dei tu kapengkilalan lako Amalek tu nasambo langi’; da mukalupai.