Dual PanelKadiba’ruianna basse ditanan sola Puang Matua
1Inde sia tu kada basse tu Napepasanan PUANG lako Musa la Natanan sola to Israel lan padang Moab, senga’ na iatu basse mangka Natanan Puang sola to Israel dio Horeb.
2Natambaimi Musa tu mintu’ to Israel sirampun lako kalena, nama’kada lako nakua: Mangkamo mitiro tu mintu’ apa Napogau’ PUANG lan tondok Mesir lako Firaun, sia mintu’ taunna sia mintu’ tondokna dio pentiromi,
3iamotu pa’pandasa kadisudian kapua, sia tanda kalle-kallean sia tanda mangnga, tu matammu kalena untiroi.
4Apa tae’ Nakamaseikomi PUANG penaa la paissan ba’tu mata la patiro ba’tu talinga la parangi, sae lako allo iate.
5Patangpulo taunna Kunii ussolangkomi lan lu padang pangallaran; iatu tamangkalemi tae’ namalusa sia iatu sepatummu tae’ nakake.
6Tae’ mikande roti, uai anggoro’ ba’tu pangiru’ mepamalango tae’ duka miiru’, ammi issanni, kumua Akumo tu PUANG, Kapenombammi.
7Iatommi rampomo inde te inan iate, saemi tu Sihon, datunna Hesbon, sia Og, datunna Basan, urrariiki’, anta taloi,
8sia tarampa tu tondokna, anta benni Ruben, Gad sia sangsese suku Manasye, la napotaa.
9Karitutui tonganni tu kada basse iate, ammi maupa’ umpalanda’i tu apa mipogau’.
10Bendan nasangkomi allo iate dio oloNa PUANG, Kapenombammi, iamotu mai pangulu rarimmi, pangulu sukummi, pekaamberammi sia mantari’mi, iamotu mintu’ muane Israel;
11sia ia duka tu mai anakmi, bainemi sia to sae lan to’ tendamu, sia iatu mai to mekayummu sia to meuaimmu,
12la tama basseNa PUANG, Kapenombammu, iamotu pangallu’ dipabantang tete dio pa’tampak ropu, tu mutanan sola PUANG, Kapenombammu,
13kumua anNa Puang umpamanassako taunNa allo iate sia mupoKapenomban tu Puang, susitu Naallurangko sia Naallu’ lako nene’ to dolomu, Abraham, Ishak na Yakub Napalaoi sumpa.
14Tangia kamu manna tu Kusisolan untananni te basse sia iate pangallu’ dipabantang tete dio pa’tampak ropu,
15sangadinna ia duka tu mai mintu’ tau tu bendan tasisolan inde te sia bendan allo iate dio oloNa PUANG, Kapenombanta, sia mintu’ tau tu tae’ tasisolanni inde te totemo.
16Belanna miissan, umba takua torro lan tondok Mesir sia umba takua ullendu’i tu mai bangsa, tu miola lendu’ tondokna.
17Sia mitiromo tu apa megallian sia rapang-rapang dipodeata, tu dio lu tau iato mai, iamotu kayu, batu, salaka sia, bulaan.
18Iamoto da naden dio lu kamu tu muane ba’tu baine, ba’tu pa’rapuan ba’tu suku, tu sorong boko’ penaanna totemo dio mai PUANG, Kapenombanta, la umpenombai deatanna bangsa iato; da miden misa’ mentaruk tu la umpaden ipo ba’tu apsantin
19Apa ianna den misa’ tau urrangii te pa’tampak ropu sia nasanga napomasakke, nama’kada nakua: La marampa’na’, ke unturu’na’ lalan penaa makarra’ku – napobannang umparampo kasanggangan lako padang kauaian sia lako padang karangkean –,
20manassa tae’ namorai tu PUANG umpagarri’i tu kasalanna tau iato, sangadinna iatu kare’dekan ara’Na PUANG sia kanokanNa ditimba oloNa dukku urrampoi tu tau iato; iatu mintu’ pa’tampak ropu, tu disura’ lan sura’ iate la unta’pai sia PUANG la umpa’dei tu sanganna lan nasambo langi’.
21PUANG la ussuale pala’i dio mai mintu’ suku Israel anna ruai kasanggangan unturu’ mintu’ pa’tampak ropu lan kasibassean tu disura’ lan te sura’ Sukaran aluk.
22Sia la dadi undinna lako bati’ undi – iamotu anakmi muane, tu la tunannang ussondakomi – sia to salian lembang, tu dio mai tondok mambela, ke natiroi tu kamandasan sia kamarammunan, tu Napabu’tu PUANG lan te tondok,
23iamotu mintu’ padang la susito solo’, susi sia, na susi padang mampu’, naurungan tae’ nadiambo’i sia tae’ apa-apa tuo diong mai sia tae’ nakembura, susi tonna kasangganganna tondok Sodom na Gomora, Adma na Zeboim, tu Nasanggang PUANG diona kasengkeanNa sia kare’dekan ara’Ns-
24attu iato la ma’kada tu mintu’ bangsa nakua: Ma’apai Napasusii PUANG te tondok iate? Apara garonto’na tu kare’dekan ara’ kapua iate?
25Mebalimi tu tau nakua: Belanna natampemo tu basseNa PUANG, Kapenombanna nene’ to dolona, iamotu basse natanan sola Puang, tonna solanni lan mai tondok Mesir,
26sia belanna malemo umpengkaolai kapenomban senga’ sia tukku umpenombai, iamotu kapenomban tang natandai sia tang Naserongi Puans-
27iamoto nare’dek tu ara’Na PUANG urrampoi te tondok la umpasaeanni mintu’ pa’tampak ropu, tu disura’ lan sura’ iate,
28kumua iatu PUANG ussabu’imo tau iate mai lan mai tondokna sia Naali’ lako tondok senga’ diona kasengkeanNa sia kare’dekan ara’Na sia kamalassuan penaanNa, susi a’ganna totemo.
29Iatu apa kabunian Napoissan PUANG, Kapenombanta, apa iatu dipaombo’namo ma’din taissan sia ma’din naissan anakta sae lakona, kumua anta turu’i tu mintu’ kada Sukaran aluk iate.