Dual Panel1Undinnato tibalikmiki’, anta ke’de’ ma’palulako Basan. Iatu Og, datunna Basan, tassu’ umpessitammuiki’, la ia la iatu mai to budanna, la parari dio Edrei.
2Apa ma’kada tu PUANG lako kaleku Nakua: Da mukataku’i, belanna la Kusorong sola mintu’ to budanna sia tondokna tama kuasammu, ammu pogau’i lako kalena susitu mugauran Sihon, datu to Amori, tu umpa’tondokki Hesbon.
3Nasorong dukami PUANG, Kapenombanta, tu Og, datunna Basan, sia mintu’ to budanna tama kuasanta, anta talo nasangi, naurungan moi misa’ tau tae’mo tapalussu’.
4Attu iato tatalomi tu mintu’ kotana; moi misa’ kota tae’mo tang la taala; annan pulona kota tu taala, iamotu mintu’ lili’na Argob, kaparentanna Og lan Basan.
5Mintu’na kota iate ditambakuku nasang sia ma’benteng tembo’ madao sia ma’babangan disalliranni; tang dibilangpa tu mai kota tae’ naditambakuku.
6Tasabu’i to kota iato, susitu tapogau’ lako Sihon, datu Hesbon; tasabu’i tu mintu’ kota, la muane la baine la pia.
7Apa iatu mintu’ patuoan sia pangrampa lan mai kota tarampan kaleta.
8Susimoto tanii unnalai dio mai datunna to Amori sola duai tu tondok sambalinna lu Yordan, randuk dio mai salu’-salu’ Arnon sae lako buntu Hermon
9– iatu to Sidon ussangai Siryon tu Hermon sia to Amori ussangai Senis-
10iamotu mintu’ kota dao rante membuntunna, na ia duka tu mintu’ Gilead sia mintu’ Basan sae lako Salkha sia Edrei, iamotu kota lan kaparentanna Og dio Basan.
11Ia manna tu Og, datu Basan, tu to Refaim tampakna torro; manassa iatu mammaranna mammaran bassi; inang den dio Raba to Amon. Iatu kalandona kasera siku na iatu kalua’na a’pa’ siku situru’ suka’ siku biasa.
12Tondok iate taalamo tapoapa tonna attu iato; randuk dio mai Aroër, tu dio biring salu’-salu’ Arnon, sola sangsesena ma’buntunna Gilead, sia iatu mai kotana kusorong lako to Ruben sia lako to Gad.
13Na iatu Gilead torronapa sola mintu’ lili’na Basan, kaparentanna Og, kusorong lako sangsesena suku Manasye, iamotu mintu’ lili’na Argob. – Iate mintu’ Basan disangai tondok to Refaims-
14Iatu Yair bati’na Manasye, unnala mintu’ lili’na Argob sae lako lili’na to Gesur sia to Maakha, nasangai tu iannate, iamotu Basan, napasikona sanganna, iamotu kampongna Hawot-Yair, sae lako allo iate.
15Iatu Makhir kusorongan Gilead.
16Iatu to Ruben sia to Gad kuben sangtaanna Gilead, tu indena mai sae lako salu’-salu’ Arnon, iamotu tangngana salu’-salu’ iato sola ma’biringna, sia sambalinna lu sae lako salu’-salu’ Yabok, iamo passaparanna to Amon;
17namane Araba-Yordan sia Yordan sola lili’na randuk dio mai Kineret sae lako tasik Araba, iamotu tasik Ma’sin, dio garonto’ mennaa’na Pisga ma’palulako rampe matallo.
18Attu iato mepasanmo’ lako kalemi kumua: Iatu PUANG, Kapenombammi, umbenkomi te tondok, la miala mipoapa; moi susito la undoloan dukakomi siulu’mi to Israel, ma’pa’buno lamban lian, iamotu mintu’ muane sakka’ parari.
19Sangadi iatu bainemi, anakmi sia patuoammi – kuissan, kumua buda patuoan miampui – ma’din torro lan kota, tu kubenmokomi,
20sae lako Nakamasei PUANG karapasan tu siulu’mi susi kamu, sia ia duka unnalai tu tondok napoapai, tu la Napa’bengan PUANG, Kapenombammi, lako kalena, sambalinna lu Yordan; mimane ma’din pantan sule lako tondok mipotaa, tu kubenmokomi.
21Na iatu Yosua kupasan attu iato, kumua: Matammu kalena untiroi te mintu’ apa mangka Napogau’ PUANG, Kapenombammi, lako te da’dua datu; susi dukato la Napogau’ PUANG lako mintu’ kaparentan, tu munii male.
22Da mumataku’, belanna PUANG, Kapenombammi, Iamotu umparariangkomi.
23Attu ia dukato mengkamoyamo’ lako PUANG, kukua:
24O Puangku PUANG, Kamumo umparandukki umpatiroanni te taumMi tu kapasareonganamMi sia Kuasa matoto’Mi; belanna umbara deata, tu den dao langi’ ba’tu dao kapadanganna tu umbelai umpogau’ penggauran matoto’ susito, susitu Mipogau’?
25Eloranna’ lamban, angku tiroi tu tondok melo, tu sambalinna lu Yordan, tu padang buntu ballo sia Libanon.
26Apa Nasengkeimo’ PUANG belanna kamu sia tae’ Naperangiina’. Ma’kadami tu PUANG lako kaleku Nakua: Silasamokoto, damo mupokada pole’i tu iannate lako Kaleku.
27Kendekmoko langngan bottona Pisga, ammu pata’pa matammu ma’palulako rampe matampu’, ma’palurekke, sia ma’palusau’ sia ma’palulako rampe matallo, sia tiroi tiku lao, belanna iate Yordan tae’ mula ullambanni.
28Apa iatu parentamu pokadanni Yosua, pamatoto’i sia pabatta’i, belanna iamo la undoloanni te bangsa lamban lian sia la napaketaa mana’ lako bangsa iato te tondok, tu la mutiro.
29Iatonna attu iato torromoki’ diong lombok sitingoan Bet-Peor.