Dual PanelPa’pakilala diona kadibenganna Sukaran aluk dao Sinai
1Natambai Musa tu mintu’ to Israel, sirampun nama’kada lako nakua: Perangii, e to Israel, tu aluk dipondok sia atoran, tu kupa’perangian allo iate, kumua ammi pelada’i sia mikaritutui.
2Iatu PUANG, Kapenombanta, untananmoki’ basse sola dao Horeb.
3Tangia nene’ to dolota tu nasisolan PUANG untananni, sangadinna kita, tu denpa tuo totemo inde te.
4Sitiro lindomokomi sipa’kada PUANG dao buntu lan mai tangnga to’ api,
5attu iato bendanna’ lan alla’Na PUANGna kamu, la umpaissannikomi tu kadanNa PUANG, belanna mikataku’ tu api iato, sia tae’ mikendek langngan buntu anNa ma’kada, Nakua:
6Akumo PUANG, Kapenombammu, tu ussolangko sun lan mai tondok Mesir, dio mai inan minii dipokaunan.
7Da’ naden kapenomban senga’ dio oloKu.
8Da’ mugaraga rapang-rapang dipodeata dipa’na tu mai a’gan apa-apa dao langi’, ba’tu dao kuli’na padang diong, ba’tu diong to’ uai, tu diongna lu lino.
9Da’ mutukku umpenombai sia da’ mupengkaolai, belanna Akumo, PUANG, Kapenombammu, Kapenomban manoka ditimba oloNa, tu umpapakkanni kakelokanna mintu’ ambe’ lako anakna sia lako osso’ ma’pentallunna sia ma’penna’pa’na tu mintu’nato ungkabiri’Na’,
10apa umpa’pekitananNa’ kamasokanangKu lako massa’bu-sa’bu tu to ungkamali’Na’ sia ungkaritutui mintu’ pepasanKu.
11Da’ musa’bu’ punala bangi tu sanganNa PUANG, Kapenombammu, belanna tae’ Nabilang maseroi PUANG dio mai kasalan tu to ussa’bu’ punala bangi tu sanganNa.
12Karitutui tu allo katorroan, ammu pamadatui, susitu mangkamoko Napasan PUANG, Kapenombammu.
13Annan allona la munii mengkarang sia ungkarangi tu mintu’ pengkarangammu;
14apa allo ma’pempitu iamo allo katorroanNa PUANG, Kapenombammu; allo iato da mumengkarang, la iko, la anakmu muane, ba’tu anakmu baine, ba’tu solamu muane, ba’tu solamu baine, ba’tu sapimmu, ba’tu keledaimmu, ba’tu iatu mai patuoan senga’mu, la iatu to sae, tu torro lan kotamu, kumua anna melayo tu solamu muane sia solamu baine susi iko.
15Belanna la mukilalai, kumua mangkamoko kaunan lan tondok Mesir, sia mangkamoko Nasolan PUANG, Kapenombammu, tassu’ lan mai tete dio lima mawatang sia takia’ tie’te’; iamoto Napasanko PUANG, Kapenombammu, ungkaritutui tu allo katorroan.
16Kasiri’i tu ambe’mu sia indo’mu, susitu Napepasanammo PUANG, Kapenombammu, lako kalemu, anna dipamalambe’ tu sunga’mu sia malaga’-laga’ko lan tondok tu Nakamaseangko PUANG, Kapenombammu.
17Da’ mupapatean.
18Da’ mupasandak salu lako rampanan kapa’.
19Da’ muboko.
20Da’ musa’bi tang tongan lako padammu ma’rupa tau.
21Da’ mukailui bainena padammu ma’rupa tau, da’ mukaduangi banuanna padammu ma’rupa tau, ba’tu pa’lakna, ba’tu solana muane, ba’tu solana baine, ba’tu sapinna, ba’tu keledainna, ba’tu barang apa-apanna padammu ma’rupa tau.
22Iamote tu kada mangka Napokada PUANG lako mintu’ kombongammi dao buntu, lan mai tangnga to’ api, nakapu’ gaun sia kapittukan, situang gamara kapua, sia tae’ misa’ apa Narangngananni lako. Nasura’i dao da’dua papan batu, anNa benna’.
23Iatommi rangimi tu gamara lan mai tangngana kamalillinan, sia iatu buntu ma’lana-lana apinna, mengkareke’mokomi lako kaleku, mintu’ pangulunna sukummi sia pekaamberammi, ammi ma’kada mikua:
24Manassa PUANG, Kapenombanta, mangkamo umpakitangki’ tu kamala’biranNa sia kapasareongananNa, sia iatu gamaranNa tarangimo lan mai tangnga to’ api; allo iate kitiromo, kumua iatu Puang Matua sipa’kada misa’ tolino sia tontong siapa tuo tu tau iato.
25Apa ma’apai anta la mate totemo? Belanna iate api kapua la umballaki’; iake masaipiki’ urrangi gamaranNa PUANG, Kapenombanta, manassa la mateki’.
26Belanna mindaraka tolino tu urrangi gamaranNa Kapenomban matontongan lan mai tangnga to’ api, susite kita, anna tontong siapa tuo?
27Mengkareke’komi ammi rangii tu mintu’ apa Napokada PUANG, Kapenombanta, ammi parampoangkan tu mintu’ apa Napokada PUANG, Kapenombanta, lako kalemi; ke susito la kiperangii sia la kipogau’.
28Iatonna rangimi PUANG tu kadammi, tommi ma’kada lako kaleku, Napokadami PUANG lako kaleku Nakua: Mangkamo Kurangi tu kadanna bangsa iate, tu napokada lako kalemu; melo nasang tu mintu’ apa napokada.
29Melo ke tontong siai dio lu tau iato mai tu penaa susito tu la ungkataku’Na’ sia la ungkaritutui tu mintu’ pepasanKu, kumua anna malaga’-laga’ sola tu mai anakna tontong sae lakona!
30Malemoko pokadanni tau iato, mukua: Sulemokomi lako tendami.
31Apa la bendanko inde te ussisolanNa’, angKu pokadangko tu mintu’ pepasan, mintu’ aluk dipondok sia iatu mintu’ atoran, tu sipatu la muadaran tau iato, kumua naturu’i lan tondok tu la Kusoronganni la naala napoapa.
32La mikaritutui tongan, susitu mangka Napepasanan PUANG, Kapenombammi, lako kalemi; da misepang kanan ba’tu kairi.
33Mintu’ lalan tu mangka Napepasanan PUANG, Kapenombammi, lako kalemi, la miola, ammi tuo sia malaga’-laga’ sia malambe’ sunga’komi torro lan tondok tu la miala mipoapa.