Dual PanelMa’iringanna pepasan iamotu ungkamali’ Puang Matua
1Inde sia tu pepasan, inde sia tu apa dipondok sia atoran, tu mangka Napa’parentan PUANG, Kapenombammi, la diadarangkomi, la mituru’ lan tondok, tu la minii male lako, la miala mipoapa,
2kumua ammu kataku’i tu PUANG, Kapenombammu, ke mukaritutui tu mintu’ aluk Napondok sia pepasan, tu kupapassanangko, la iko la anakmu sia ampomu lan mintu’ allo katuoammu sia anna malambe’ tu sunga’mu.
3Iamoto perangii, e to Israel, sia karitutui tonganni, kumua ammu malaga’-laga’ sia kumua ammu marapuan, susitu mangka Naallu’ PUANG, Kapenombanna nene’ to dolomu, lako kalemu lan tondok sebo pangandu’ sia tani’ enoan.
4Perangiimi, e to Israel: Iatu PUANG Iamo Kapenombanta; iatu PUANG misari!
5La ponno penaammu sia mintu’ deatammu sola mintu’ kamatotorammu la ungkamali’ PUANG, Kapenombammu.
6Iatu apa kupepasanan lako kalemu allo iate, la torro lan penaammu,
7la muadaran mintu’ anakmu sia la mupokada tu iannato, ke unno’ko’ko lan banuammu, sia iake dioko lu lalan, sia iake matindoko, sia iake millikko.
8Sia la mupemporian duka dio limammu la dipotanda sia la mupentalian dio kidemu dio kasitammuan matammu,
9sia la musura’ dio ampang ba’ba banuammu sia dio babanganmu.
10Iake Nasolammoko PUANG, Kapenombammu tama tondok, tu Napalaoan sumpa unnallu’i lako nene’ to dolomu, Abraham, Ishak na Yakub, la Nasorong lako kalemu – iamotu ba’tu pira-pira kota kapua sia melo, tu tangia iko umpabendanni,
11tu ba’tu pira-pira banua tu nanii ponno ianan, tu tangia iko umponnoi, sia iatu ba’tu pira-pira bubun batu, tu tangia iko umpa’i, ba’tu pira-pira pa’lak anggoro’ sia kayu saitun, tu tangia iko untananni – sia iake mangkami mukande sadia’mu.
12Attu iato kanandai tu kalemu, da mukalupai tu PUANG, tu ussolangko tassu’ lan mai tondok Mesir, lan mai inan minii dipokaunan.
13Iatu PUANG, Kapenombammu, la mukataku’ sia la mupengkaolai sia la umpalaoko sumpa tete dio sanganNa.
14Da mituru’i sia umpenombai kapenomban senga’, ba’tu pira-pira tu mai deatanna bangsa untikuikomi,
15belanna iatu PUANG, Kapenombammu, Iamo Kapenomban manoka ditimba oloNa dio lu kamu, kumua na iatu kare’dekan ara’Na PUANG, Kapenombammu, da nadukku ullaoiko sia da Nasabu’iko dao mai kuli’na padang.
16Da mitobai tu PUANG, Kapenombammi, susitu mangka mipogau’ dio Masa.
17La mikaritutui tongan tu pepasanNa PUANG, Kapenombammi, sia mintu’ tu apa Napamanassa sia aluk Napondok, tu mangka Napapassanangko.
18La mupogau’ tu apa malolo sia melo dio pentiroNa PUANG, kumua ammu malaga’-laga’ sia tamako tondok melo, tu mangka Naallu’ PUANG lako nene’ to dolomu Napalaoi sumpa sia la muala mupoapa,
19ke muula’i tu mintu’ ualimmu dio tingayomu, susitu mangka Napokada PUANG.
20Iake nakutanaiko anakmu undinna, kumua: Matumbari tu apa dipamanassa sia aluk dipondok sia atoran, tu mangka Napapassanangkomi Kapenombanta?
21La ma’kadako lako anakmu kumua: Iatonna dolona kaunannaki’ Firaun lan Mesir, apa mangkamoki’ Nasolan PUANG tassu’ lan mai Mesir tete dio lima mawatang.
22Napogau’mo PUANG tu tanda sia tanda mangnga dio pentirota, tu kalle-kallean sia mesanggangan lako Mesir sia lako Firaun sia mintu’ to lan banuanna.
23Apa Nasolanmoki’ tassu’ lan mai, anna baaki’ tama tondok Naalluran nene’ to dolota Napalaoi sumpa anNa benki’.
24Iatu PUANG umpasanki’ la ungkaritutui mintu’ te aluk dipondok sia la ungkataku’i tu PUANG, Kapenombanta, kumua anta tontong malaga’-laga’, sia anNa karimmanniki’, susitu a’ganta allo iate.
25Iamote tu la tapomalolo, ke takaritutui tonganni te mintu’ pepasan dio oloNa PUANG, Kapenombanta, susitu mangka Napepasanan lako kaleta.