Dual PanelPatiro mendeatanna Yehezkiel
1Iatonna taun ma’pentallungpulo, bulan ma’penna’pa’, allo ma’pellima bulan iato, tongku torro sola mintu’ to dipali’, dio randan salu Kebar, ta’kala anna tibungka’mo tu langi’, angku tiroi tu ba’tu pira-pira patiro mendeata, tu Napaombo’ Puang Matua.
2Iatonna allo ma’pellima bulan iato – iamotu taun ma’pellima kadipaliranna datu Yoyakhins-
3rampomi tu kadanNa PUANG lako tominaa Yehezkiel, anakna Busi, lan tondok to Kasdim, dio randan salu Kebar; inde to dio nanii limanNa PUANG urrondongi.
4Kutiromi, tonganna den misa’ talimpuru’ lu daa mai ulunna salu, iamo tu sangkombong gaun makamban, nanii api mellepa’-lepa’ lan sia natikui misa’ arrang; inde to lan, iamo tu lan tangnga api den tu apa ditiro susi batu bulaan sirau salaka pandila-dila.
5Sia lan tangngana den tu ma’rupa a’pa’ a’gan kepenaa; susite tu rupanna: iatu tampana susi tolino,
6pantanni lindo sia’pa’, sia pantanni pani’ sia’pa’ patomali.
7Iatu a’gan lette’na malolo; iatu pala’ lette’na susitu pala’ lette’ anak sapi, sia pandillak-dillak susi tambaga dirussui.
8Nadiong to’ pani’na den tu lima tau dio to’ sa’dena a’pa’. Na iatu lindona sia pani’na tu a’pa’ a’gan iato,
9sikande tu pani’na. Ianna male tae’mo namenggirik len; male tarru’ bang lako tu napempatuinna.
10Na iatu lindona sola a’pa’i dio kananna susito lindo tau sia lindo singa; na dio kairinna sola a’pa’i susi lindo sapi; na sola a’pa’i to ma’lindo langkan maega duka.
11Na iatu pani’na tiballa’ langngan; pantan ma’pani’ sida’dua, tu sikande; na iatu da’dua ussamboi kalena.
12Pantan male tarru’ lako tu napempatuinna; umba-umba tu naporai penaa la naola, ia duka naola; tae’ namenggirik len, ke malei.
13Iatu rupanna a’gan iato susito ruaya borrong, sia susito bia’ tiroanna – menono’ dio alla’na a’gan iato, na iatu api lako mangarrang, nanii mellepa’ kila’.
14Iatu a’gan iato ma’dondo tipasule-sule ten to kila’ silalle-lalle.
15Iatongku tiroi tu a’gan iato, manassa den tu lentenan diong to’ padang, dio la’pekna a’gan iato, dio tingayona tu a’gan sola a’pa’i.
16Iatu tiroanna sia garaganna tu lentenan iato susi pandillakna parimata pirusa’; susi bang rupanna sola a’pa’i; iatu tiroanna sia garaganna susi bang to misa’ lentenan lan tangngana misa’ lentenan.
17Iake malei ma’din lu lako a’pa’ mata angin tu napempatui; tae’ namenggirik len, ke malei.
18Iatu pelengna malangka’ sia metakuran, belanna nasitutu’i nasang mata mengguririk sola a’pa’i.
19Ianna male tu a’gan iato, iatu lentenan tiputa’ dio la’pekna; na ianna kendek langngan, iatu mintu’ lentenan kendek duka.
20Umba-umba tu naporai penaa, inde dukato nanii tu a’gan iato male – umba-umba naporai tu penaa male; iatu lentenan tiangka’ duka sisola, belanna iatu penaa lan a’gan iato lan duka lentenan.
21Ianna male tu a’gan iato, tiputa’ duka tu lentenan, ianna torro, torro dukamo; iake kendekki langngan, iatu lentenan tiangka’ duka sisola, belanna iatu penaa lan a’gan iato lan duka lentenan.
22Na dao to’ ulunna a’gan iato den susi apa do langi’ tiampa’, ten to kinang es, tiballa’ dao ulunna.
23Diongna lu to apa tiampa’ nanii tiballa’ tu pani’na malolo sitingoan; sia pantan ma’pani da’dua, tu ussamboi kalena dio tingayona sia dio boko’.
24Ianna male tu a’gan iato, kurangi tu pani’na susito uai saba’ mongngo’ bang, susi gamaranna To umpoissan angge maritik, takua gumalugunna surodadu ma’baanan; ianna torromo, napembasseammi tu pani’na.
25Dirangimi tu misa’ gamara dao mai apa tiampa’ dao to’ ulunna; ianna torromo, napembasseammi tu pani’na.
26Dao apa tiampa’ dao ulunna, den tu apa ditiro susi parimata lasuri’, tu ma’rupa isungan kapayungan; na dao apa susi isungan kapayungan nanii unnisung tu ditiro ma’rupa tau.
27Sia kutiro tu apa pandillak susi batu bulaan sirau salaka, randuk dio mai to’ ma’rupa aakna tu ma’palulanganna susito api diparerungi; na iatu randuk dio mai to’ ma’rupa aakna tu ma’palurokkona kutiro susi apa natikui misa’ arrang.
28Susito tindak sarira ditiro, tu paan lan gaun, ke palauranni, susito tu rupanna tu arrang untikui tu api. Susimoto tu rupa dinii umpa’peomboran kamala’biranNa PUANG. Iatongku tiromi to, lumbangmo’ rokko padang, angku rangii misa’ gamara Ma’kada.