Dual Panel1Ta’kala kutiromi, tonganna dao batara daona lu ulu karubion, den misa’ apa susi parimata lasuri’, susi rupa isungan kapayungan, tu paan daona lu.
2Ma’kadami tu Puang lako tu to ma’bayu lamba’ lenang, Nakua: Maleko tama alla’na tu mai lentenan diong to’ karubion, muraku’i tu ruaya lan mai alla’ karubion, ammu ambo’i tu to lan lu kota. Malemi inde to lako kutiro.
3Bendanmi tu karubion dio to’ sa’de kanan Banua Kabusungan, tonna male tu tau iato; naden misa’ gaun ussitutu’i tu tarampak lanna lu.
4Kendekmi tu kamala’biranNa PUANG dao mai karubion iato, anna male lako to’ ampang Banua Kabusungan, na iatu tarampak nasitutu’i arrang kamala’biranNa PUANG.
5Iatu ongngo’ pani’ karubion dirangi sae lako tarampak diona lu salian, susi gamaranNa Puang Matua, To umpoissan angge maritik, ke ma’kadaI.
6IatonNa mangkamo ussuai tu to ma’bayu lamba’ lenang nakua: Alai tu api lan mai alla’lenteran, lamotu lan mai alla’ karubion, namale bendan dio sa’dena misa’ roda.
7Unnangka’mi limanna tu misa’ karubion lan mai alla’ karubion lako to’ api lan kasiallaran karubion, anna alai tu ruaya anna parokkoi limanna to ma’bayu lenang; naalami tau iato namale.
8Payanmi dio lu tu mai karubion iato tu susi lima to lino diongna lu pani’na.
9Kutiromo den a’pa’ lentenan dio sa’de karubion iato mai, dio sa’dena simisa’misa’ karubion den misa’ lentenan. Iake ditiroi tu lentenan iato pandillak susi parimata pirusa’.
10Iatu tiroanna: sangrupari sola a’pa’i, takua to den misa’ lentenan lan tangnga lentenan.
11Iake malei ma’din umpempatui a’pa’ patunna sola nasang; tae’ namenggirik len, ke malei. Umba-umba tu napatu tu dolona lako, ia bangsiamo naturu’ tu solana to, tae’ namenggirik len, ke malei.
12Na diona mintu’ kalena, iamotu dio boko’na, limanna sia pani’na, dio lentenan nasitutu’i mata tiku lao; napantan den lentenanna sola a’pa’i.
13Iatu mintu’ lentenan iato disangai Melolin, dio pa’perangingku.
14Na iatu mai karubion iato sia’pa’ tu lindona. Iatu bunga’na lindo karubion, iatu ma’penduanna lindo tolino, iatu ma’ pentallunna lindo singa, iatu ma’penna’pa’na lindo langkan maega.
15Kendekmi tu karubion iato mai, iatu iannato susi bang a’gan mangka kutiro dio salu Kebar.
16Ianna male tu karubion, tigirik nasangmi tu lentenan dio sa’dena; sia ianna umballa’ pani’na tu mai karubion la kendek diong mai lino, tae’ natilendok tu lentenan dio mai sa’dena.
17Ianna bendan tu karubion, bendan duka tu lentenan, ianna kendek tu karubion, kendek duka tu lentenan, belanna iatu penaanna a’gan iato lanna lu lentenan.
18Malemi tu kamala’biranNa PUANG dao mai ampang Banua Kabusungan anna sae bendan dao karubion.
19Umballa’mi pani’na tu karubion, sia iatonna male, kendekmi diong mai padang dio pentiroku, na iatu lentenan kendek sola. Anna torro dio lalan tama babangan matallo dio banuanNa PUANG, na iatu kamala’biranNa Kapenombanna Israel daona lu.
20Iamote tu a’gan kutiro diongna lu Kapenombanna Israel dio salu Kebar; totemo mane kutandairi, kumua karubion pale’ ia.
21Pantanni lindo sia’pa’ sia pantanni pani’ sia’pa’ sia den tu apa susi lima tolino diongna lu pani’na.
22Na iatu pantarisan lindona, susi bang to lindo mangka kutiro dio salu Kebar; iatu rupanna ia bangsiamo rupanna. Iatu apa iato pantan male ma’palulako bang tingayona.