Dual PanelUkungan urrampoi mintu’ arung
1Naangka’mo’ Penaa anNa solanna’ lako babangan matallo dio banuanNa PUANG, tu mentingo lako rampe matallo: kutiromi dio to’ lalan tama Banua iato tu tau duangpulo llima; dio lu tau iato mai kutiro tu Yaazanya, anakna Azur sia Pelaca, anakna Benaya, arungna bangsa iato.
2Ma’kadami lako kaleku Nakua: E ma’rupa tau, iamote mai tu to untangnga’ bang kakadakean sia umpa’bengan pa’timbangan sala lan kota iate,
3tu ma’kada nakua: inang tae’ nala dadi dibangun sule tu banua: iamote tu kurin na kami tu duku’.
4Iamoto la ma’nubua’ko unneai tu tau iato mai, ma’nubua’ko, e ma’rupa tau.
5Attu iato Narampoina’ penaanNa Puang, anNa ma’kada lako kaleku Nakua: Ma’kadako, kumua: Inde sia tu kadanNa PUANG: Susito tu mangka mipokada, e to Israel, na iatu apa bu’tu lan penaammi Kutandaimo.
6Mangkamokomi umpatei buda tau lan kota iate sia mipasitutu’imo batang rabuk tu batattana.
7Iamoto inde sia tu kadanNa Puangta PUANG, Nakua: Iatu mintu’ to mangka mipatei lan lu kota, iamo duku’ to, na iatu kota iamo kurin, apa iatu kamu la Kualaikomi lan mai tangngana.
8Mikataku’ tu pa’dang, apa pa’dang la Kuparampoangkomi, kadanNa Puangta PUANG.
9La Kualaikomi lan mai tangngana, angKu sorongkomi tama kuasanna to salian lembang sia la Kuparampoikomi ukungan.
10La tibambangkomi mate nakande pa’dang, lan lu lili’na Israel la Kuparampoikomi ukungan, ammi tandai, kumua Akumo tu PUANG.
11Iate kota tae’ nala butung kurin lako kalemi, kumua ammi butung duku’ lan; lan tu lili’na Israel la Kuparampoikomi ukungan.
12Ammi tandai, kumua Akumo tu PUANG, tu tae’ mituru’i tu apa Napondok sia tae’ mikaritutui tu aturanNa, sangadinna mikaritutui tu atoranna mintu’ bangsa untikuikomi.
13Iatongku marassan ma’nubua’ matemi tu Pelaca, anakna Benaya. Lumbangmo’ rokko padang, angku melallak kukua: A’a Puangta PUANG, morairoKomika la ussabu’i tu to Israel torronapa?
14Apa rampo tu kadanNa PUANG lako kaleku Nakua:
15E ma’rupa tau, iatu sangsiulurammu, sangsiulurammu sia sangrara sangbukummu sia iatu to Israel sola nasang, nanii to lan Yerusalem ma’kada lako nakua: Torro mambelamokomi dio mai PUANG, iate padang iate dikamaseammokan la kipomana’.
16Iamoto ma’kadamoko mukua: Inde sia tu kadanNa Puangta PUANG Nakua: Moi Kurambai tu tau iato mai dio lu mintu’ bangsa sia Kutale’ lan lu mintu’ tondok, naurunganni sidi’ bangmora tu palambi’na menomba lako Kaleku lan lu tondok nanii rampo,
17iamoto ma’kadako mukua: Inde sia tu kadanNa Puangta PUANG nakua: La Kupasipulungkomi dio mai mintu’ bangsa sia la Kupasirampunkomi lan mai mintu’ tondok tu minii ditale’ male sia la Kukamaseangkomi te padang Israel.
18Ianna rampomo tu tau iato mai lako, napatoyang nasangmi tu mintu’ apa megi’giran sia mintu’ apa megallian lan mai.
19La Kuben misa’ penaa kalebu sia inaa ba’ru lan ba’tengna, na iatu penaa batu la Kualai dio mai kalena, angKu benni penaa duku’;
20Anna turu’i tau iato mai tu apa Kupondok sia nakaritutui tu atorangKu sia napogau’i, anna mendadi taungKu tu tau iato mai, angKu dadi Kapenombanna.
21Apa minda-minda ungkabarii tu apa megi’giran sia apa megallian, la Kupasule tu penggauranna langngan ulunna, kadanNa Puangta PUANG.
22Umballa’mi pani’na tu mai karubion sisola mintu’ lentenan dio sa’dena, na iatu kamala’biranNa Kapenombanna Israel daona lu.
23Kendekmi tu kamala’biranNa PUANG lan mai tangnga kota, anna torro dao buntu dio rampe matallona kota.
24Naangka’mo’ Penaa, anNa solanna’ lako tondok to Kasdim, lako to dipali’, lan patiro mendeata tete dio PenaanNa Puang Matua. Iatu patiro mendeata, mangka Kutiro, kendekmo natampena’.
25Kupokada nasangmi lako mintu’ to dipali’ tu mintu’ apa mangka Napatiroanna’ PUANG.