Dual PanelRapang-rapang diona kadipaliran dipa’petiroan
1Rampomi tu kadanNa PUANG lako kaleku Nakua:
2E ma’rupa tau, torroko dio lu misa’ bati’ pabali-bali, iamotu bati’ kemata la patiro, apa tae’ napatiro, ketalinga la parangi, apa tae’ naparangi, belanna tau iato mai misa’ bati’ pabali-bali.
3Na iko, e ma’rupa tau, pasakka’i tu mintu’ apa parallu dio pa’paliran, sia la maleko butung to dipali’ ke allona dio pentirona tau iato mai; manassako la ke’de’ dio mai inanmu lako misa’ inan senga’ dio pentirona tau iato mai. Umbai la napalan penaa sia tau iato mai, belanna misa’i bati’ pabali-bali.
4Baai sun tu apa parallu lako kalemu butung misa’ pa’bungku’ to dipali’ ke allona dio pentirona tau iato mai, na iatu iko la sunko ke bonginnai butung to dipali’ dio pentirona tau iato mai.
5Lo’po’i tu rinding tembo’ dio pentirona tau iato mai, ammu olai sun lako salian.
6Iatu pa’bungku’mu la mupassan dao palempengmu dio pentirona tau iato mai; iake mapi’tukmi la mubaamo; ammu putu’i tu lindomu, naurunganni tae’ mutiroi tu padang. Belanna la Kupadadiko misa’ rapang-rapang lako to Israel.
7Kupogau’mi susitu Napa’parentan lako kaleku: iatu apa parallu lako kaleku kubaa lako salian butung to pa’bungku’na misa’ to dipali’ sia iatonna bongi kulo’po’mi limangku tu rinding tembo’; iatonna mapi’tukmo kubaami; kupadaomi palempengku dio pentirona.
8Iatonna melambi’mo rampomi tu kadanNa PUANG lako kaleku Nakua:
9E ma’rupa tau, iatu to Israel, iamotu bati’ pabali-bali, tae’raka ungkutanaiko kumua: Apara tu mipogau’?
10Ma’kadako lako tau iato mai mukua: Inde sia tu kadanNa Puangta PUANG: Iatu datu lan Yerusalem narua te kada Napa’petanggungan Puang Matua iate sia mintu’ to Israel tu torro inde to dio.
11Ma’kadako kumua: Akumote tu misa’ rapang-rapang lako kalemi; susitu mangkanna kupogau’ susi dukato la digauran tau iato mai: iamotu la male dipali’ sia la ditarungku.
12Iatu datu dio lu tau iato mai la ussompo pa’bungku’na dao palempengna ke mapi’tukmi anna male lako salian; la nalo’po’ tau tu rinding tembo’, kumua anna olai tassu’; la naputu’ tu lindona, belanna tae’mo na la untiro pole’i matanna te padang iate.
13La Kupae’te’i pukaKu sia la naala poyaKu; la Kusolan lako Babel, tondok to Kasdim, apa tae’ nala untiroi; sia inde to dio la nanii mate.
14Mintu’ baananna, iamotu to untundui sia mintu’ surodadu la Kupatitale’ lako mintu’ mata angin, sia la Kunonok tu pa’dang dio boko’na.
15Anna tandai tau iato mai, kumua Akumo tu PUANG, ke Kupatitale’mi dio lu mintu’ bangsa sia Kuambo’ lan lu mintu’ tondok.
16Apa dio mai tau iato mai tae’mora napira la Kupatilendokpa dio mai kandean pa’dang, karorian na ra’ba biang, kumua anna tuna’i tau iato mai tu mintu’ penggauran megallianna dio lu mintu’ bangsa tu nanii rampo lako; anna tandai bangsa iato kumua Akumo tu PUANG.
17Rampomi tu kadanNa PUANG lako kaleku Nakua:
18E ma’rupa tau, la ma’parondoko ungkande rotimmu sia la ma’paganggangko sia rosso penaammu unniru’ uaimmu.
19Sia la ma’kadako lako tau lan tondok, kumua: Inde sia tu kadanNa Puangta PUANG diona pa’tondokan Yerusalem dio lu padang Israel, Nakua: iatu tau iato mai la ungkande rotinna situang karossoan penaanna sia la unniru’ uainna situang kamagianganna – kumua anna iatu tondokna tau iato mai masopu tu mintu’ apa lan sia mempadang lo’bang napobua’ kamasa’garanna mintu’ pa’tondokanna.
20Iatu kota dinii torro la daun lauan sia iatu tondok la mempadang lo’bang, ammi tandai, kumua Akumo tu PUANG.
Mandappi’mo tu ukungan
21Rampomi tu kadanNa PUANG lako kaleku Nakua:
22E ma’rupa tau, pa’parunde apara tu mipoparunde lan tondok Israel, kumua: Lendu’mo tu allo, apa tae’ nalalo tu patiro mendeata.
23Iamoto ma’kadako lako tau iato mai: Inde sia tu kadanNa Puangta PUANG Nakua: La Kutappui tu pa’parunde iate sia tae’mo nala umpoparundei tau lan Israel, sangadinna ma’kadako lako tau iato mai kumua: Mandappi’mo tu attunna sia iatu kadipalandaranna mintu’ patiro mendeata!
24Belanna la tae’mo tu patiro mendeata balle sia pa’biangan ma’papusa dio lu to Israel.
25Akumo, PUANG, la umpokadai tu kada la Kupokada, sia la dipalanda’; tae’ anna la dipadampa. Belanna lan allomi, e bati’ pabali-bali, la Kupokada tu misa’ kada sia la Kupogau’ duka, kadanNa Puangta PUANG.
26Rampomi tu kadanNa PUANG lako kaleku Nakua:
27E ma’rupa tau, tonganna iatu to Israel ma’kada nakua: Iatu patiro mendeata natiro, umpatu allo masaipa namane sae, sia ma’nubua’ diona attu mambelapa.
28Iamoto ma’kadako lako tau iato mai, kumua: Inde sia tu kadanNa Puangta PUANG: Iatu mintu’na kadangKu, moi sangbuku tae’ nala dipadampa, sangadinna iatu kada la Kupokada la dipalanda’, kadanNa Puangta PUANG.