Dual PanelPa’dangNa PUANG ullaoi Yerusalem
1Rampomi tu kadanNa PUANG lako kaleku Nakua:
2E ma’rupa tau, mentingoko lako Yerusalem, palolongko kadammu ullaoi mintu’ inan maindan sia ma’nubua’ko ullaoi tondok to Israel,
3sia ma’kadako lako tondok Israel, kumua: Inde sia tu kadanNa PUANG: Manassa la Kulaoiko! La Kunonok tu pa’dangKu sia la Kusabu’i tu to malambu’ sia to tang mekaaluk dio lu kalemu.
4Belanna Kusabu’i dio lu kalemu tu to malambu’ sia to tang mekaaluk, iamoto la tinonok tu pa’dangKu ullaoi mintu’ angge menaa lo’ mai pollo’na uai sae rekke ulunna salu.
5Anna issanni mintu’ angge menaa, kumua Akumo, tu PUANG, tu unnonok pa’dangKu, anna tang sibanuamo sule.
6Na iko, e ma’rupa tau, sumarroko butung to rantang buana; ondongpi sumarroko diona kamapa’dikan penaammu.
7Ianna ma’kada tu tau lako kalemu nakua: Apara tu miposarro?, la mukua mebali: Iamotu diona kareba, tu la saemo, tu napobannang bonnong tu mintu’ penaa, sia kope tu mintu’ lima, sia ri’ta’ tu mintu’ ba’teng sia tang nasalamo ma’pu’ tu mintu’ guntu’. Manassa la rampomo sia dadi, kadanNa Puangta PUANG.
8Rampomi tu kadanNa PUANG lako kaleku Nakua:
9E ma’rupa tau, ma’nubua’ko sia ma’kadako kumua: Inde sia tu kadanNa PUANG: Ma’kadako mukua: Misa’ pa’dang, misa’ pa’dang: Diasamo sia diburindamo.
10Diasamo la dipepan tau, diburindamo, anna pandillak-dillak susi kila’. La parannuriki’ka? Iatu tekkenna anakku muane tang ussanga mintu’ kayu.
11Mesuamo umburindai, kumua anna tangkei tau; mangkamo diasa sia diburinda tu pa’dang iato, nadiben to papatean.
12Melallakko sia umbatingko, e ma’rupa tau, belanna iate iannate dipamanassamo la ullaoi taungKu; dipamanassamo la ullaoi mintu’ arungna to Israel; disorongmo tu tau iato mai la nakande pa’dang, la tau iato mai la taungKu. Iamoto, sala’pai tu pupummu.
13Mangkomo dipalalo tu apa ditoba; sia umbara nakua dadi, ke pa’de dukai tu tekken tu tang pabilang? kadanNa Puangta PUANG.
14E iko, ma’rupa tau, ma’nubua’ko sia massala’pako, anna dipakande tu pa’dang penduan ba’tu pentallun. Papatean tu pa’dang iato, misa’ pa’dang papatean kapua, pa’dang massiok bang dirangi untikui.
15Anna rantang tu buana tau sia buda tu to dipatei. Dio lu mintu’ babanganna Kutanannimo pa’dang tu inan pa’tinggoroan. A’a digaragaimo tu pa’dang la pandillak-dillak; diasamo la dipa’tinggoroan.
16Sembangi tu diona kanan sia tu diona kairi, laoi umba-umba napatu matammu.
17Sia Aku Kalena la massala’pa sia la Kutappuimo tu kare’dekan ara’Ku lako, Akumo, tu PUANG, mangka umpokadai tu iannato.
18Rampomi tu kadanNa PUANG lako kaleku Nakua:
19Na iko, e ma’rupa tau, sura’i tu da’dua lalan, ba’tu umbanna ma’din nannii sae pa’dangna datu Babel; misa’ri tondok nanii tassu’ sola duai, palakoi pedullu lalan; padioi to’ pamulanna lalan lu lako simisa’ kota;
20sura’i tu misa’ lalan la naola pa’dang ullaoi Raba to Amon sia ullaoi duka Yehuda, sae lako Yerusalem tu ditambakuku.
21Belanna iatu datu Babel la bendan dio kasisarakan lalan, iamotu dio to’ pamulanna da’dua lalan, nanii ma’biangi; la narogan tu anak pana; la nakutanai tu balo’ tau, ia la ma’pepa’du.
22Dio lima kananna nanii anak pana dirogan, tu umpatu Yerusalem, la nanii umpabendan kayu petumbuk, la umpopenganga sadangna la unnarrak lao papatean, sia umpekapuai gamaranna mangaru’, la umpabendan kayu petumbuk ullaoi mintu’ babangan, la unggaragai tu misa’ tampo la nanii to umpatama limbui sia misa’ benteng, tu dinii sae ullaoi.
23Moi nasangamo buttok tu biang – sisumpa tonganmo tu tau iato mai –, apa napakilala tu kakadakeanna, anna ditingkan.
24Iamoto, inde sia tu kadanNa Puangta PUANG, Nakua: Belanna mipakilala tu kakadakeammi, saba’ payan tu salami, naurungan iatu kasalammi sombomo lan mintu’ penggaurammi –, belanna nakilalai siakomi tau, ammi di tingkan.
25Na iko, e arung to Israel, to bulituk sia to tang mekaaluk, nalambi’mo tu allomu, iamotu attu kadiukungan ma’katampakanna.
26Inde sia tu kadanNa Puangta PUANG: Alai tu sa’pi’ dio mai! lendokanni tu makota iato! Tae’mo nala susitu dolona. Pamatandei tu apa madiong; pamadionganni tu apa madao.
27La Kupadaun lauan tu kota iato, la Kupadaun lauan, la Kupadaun lauan. Apa moi susito, tae’ duka natontong. Sae lako saena tu to sipatu la umpoapai, angKu kamaseanni lako.
Pa’dangNa PUANG ullaoi tu Amon
28Na iko, e ma’rupa tau, ma’nubua’ko sia ma’kadako kumua: Inde sia tu kadanNa Puangta PUANG diona to Amon sia diona pelo’bona; ma’kadako mukua: E pa’dang, tinonokmoko la ma’tinggoro, diasamoko la papatean, sia la pandillak-dillak
29– iake marassanni tu tau untiroangko pakita-kita buttok sia umbiangangko kamo’rangan – la unta’pai barokona tu to tang mekaaluk, to bulituk, tu nalambi’mo allona, iamotu attu kadiukungan ma’katampakanna.
30Pasibanuai sule tu pa’dang. Dio inan umpadadiko, lan tondok kadadiammu, la Kunii unnukungko.
31La Kubarrakan tu kare’dekan ara’Ku lako kalemu: sia la Kupamurru’ko api kasengkeangKu sia la Kusorongko tama limanna tu to tang untandai battuan, tu to untampa bang pepayu.
32La napokandeko api; lan tangnga tondok tu nanii lolong tu raramu, sia tae’mo nakilalaiko tau, belanna akumo, tu PUANG, mangkamo umpokadai tu iannato.