Dual PanelPa’nubua’ diona ukunganna to Amon
1Rampomi tu kadanNa PUANG lako kaleku Nakua:
2E ma’rupa tau, mentingo lakoko to Amon, ammu ma’nubua’ lako;
3pokadanni to Amon kumua: Tananni talinga tu kadanNa Puangta PUANG: Inde sia tu kadanNa Puangta PUANG Nakua: Belanna mupa’pallakan tu diona inan maindanKu, tonna diruttakki, sia diona tondok Israel, tonna disanggangi, sia diona to Yehuda, tonna male dipali’,
4iamoto la Kusorongko lako suku dio mai rampe matallo la napotau; dio lili’mu la nanii umpabendanni tu mai tenda ditambakuku sia la nanii unnosokki tu inan nanii torro; anna kandei tu mai bua kayummu sia nairu’ tu mai bumbunganmu.
5Iatu Raba la Kupadadi misa’ padang kariuan nanii unta na iatu mai kota to Amon la Kupopadang lambaran domba sola bembe’, ammi tandai kumua Akumo tu PUANG.
6Belanna inde sia tu kadanNa Puangta PUANG: Belanna massala’pa-la’pamoko sia mentarassa-rassamoko sia lendu’ parannummu untelle-telle tondok Israel, tu umpamapallai,
7iamoto manassa la Kue’te’ tu limangKu umpata’paiko, sia la Kusorongko tama limanna tu mai bangsa, anna rampako, sia la Kusabu’iko dio lu to sangpetayanan sia la Kuputtaiko dio lu mintu’ tondok, sia la Kumangsanniko. Ammu tandai, kumua: Akumo tu PUANG.
Pa’nubua’ diona ukunganna to Moab
8Inde sia tu kadanNa Puangta PUANG, Nakua: Belanna ma’kadamo tu Moab sola Seir kumua: Manassa iatu to Yehuda susi bangsia tu mai bangsa senga’,
9iamoto manassa la Kulo’bangi tu buntu mennaa’na Moab, naurunganni tae’mo kota dio, tae’ bangmo disesa napomaballo tondok, iamotu Bet-Yesimot, Baal-Meon sia Kiryataim.
10La Kusorongmo lako suku dio mai rampe matallo la napotondok, sisola lili’na to Amon, naurunganni tae’ lenmo nadikilalai tu to Amon dio lu mintu’ bangsa,
11sia la Kuparampoimo ukungan tu Moab; anna tandai, kumua Akumo tu PUANG.
Pa’nubua’ diona ukunganna Edom
12Inde sia tu kadanNa PUANG, Nakua: Belanna iatu to Edom napangannan penaa bang tu to Yehuda sia umpogau’ kadakena lako, sia napapassanni tanggungan magasa belanna napabala’i tu tau iato,
13iamoto, inde sia tu kadanNa Puangta PUANG, Nakua: La Kue’te’ tu limangKu umpata’pai Edom sia la Kusabu’i tu tau sia patuoan lan mai; sia la Kupadaun lauan randuk dio mai Téman sae lako Dedan; la tibambang tu tau iato mai nakande pa’dang.
14Sia iatu pa’bala’Ku lako Edom la Kusorong tama limanna taungKu Israel; na iamo la umpogau’i lako to Edom susitu natuntunna kasengkeangKu sia kare’dekan ara’Ku; iatu tau iato mai la umperasaimo pepakkanKu, kadanNa Puangta PUANG.
Pa’nubua’ diona ukunganna to Filistin
15Inde sia tu kadanNa Puangta PUANG, Nakua: Belanna iatu to Filistin nanannan bang randang tu to Yehuda sia umpogau’ kadakena lako, belanna umpabala’i gau’na to Yehuda situang pa’telle-telle, tu umpamapallai sia pasaburan bang tete dio kasiualian tontong sae lakona,
16iamoto, inde sia tu kadanNa Puangta PUANG, Nakua: Manassa la Kue’te’ tu limangKu umpata’pai to Filistin sia la Kusabu’i tu to Kreta sia iatu tinampenapa dio lu biring tasik, la Kupisanni.
17La Kuparampoi pepakkan metakuran sola ukungan mapannang tu tau iato mai. Anna tandai, kumua Akumo tu PUANG, ke Kuparampoi pepakkanKu.