Dual PanelBating diona Tirus
1Rampomi tu kadanNa PUANG lako kaleku Nakua:
2E ma’rupa tau, toloranni bating tu Tirus,
3sia ma’kadako lako Tirus, tu dio babangan tama tasik, tu sipa’balukan mintu’ bangsa ma’biring tasik; kumua: Inde sia tu kadanNa Puangta PUANG, Nakua: E Tirus, mutangnga’ kumua: Sundun tongan balloku.
4Iatu lili’mu sae tama atena tasik, iatu to umbangunko, mangkamo napasundun tu kamaballoammu.
5Iatu kayu sendana dao mai Senir tu digaraga mintu’ batangmu; sia kayu arasi’ diala dao mai Libanon la digaragai lentongmu.
6Kayu jati dio mai Basan digaraga tu mintu’ pebosemu. Iatu salimmu gading digaraga, dipasialla’ kayu buangin dio mai tondok ma’biring tasikna Kitim.
7Iatu sombarammu lenang melo disulan dio mai Mesir; tu diposombaran. Iatu dipokulambu tenda iamotu sampin lango-lango sia lango-lango makaseda dio mai tondok ma’biring tasikna Elisa.
8To ma’tondok lan Sidon sia Arwad iamo pa’bosemu; iatu to matarru’mu o Tirus, diomo kalemu; tau iamoto tu anak pallopimmu.
9Iatu mai to matua sia to matarru’ dio mai Gebal diomo kalemu la umpemeloiko. Iatu mintu’na kappala’ tasik sola pallopinna diomo randanammu la umpasituka’ balukammu.
10Iatu to Persia, to Lud sia to Put tamamo surodadummu nasangbilanganmo surodadummu; natoke’i dio rinding tembo’mu tu balulangna sia songko’ bassinna; napakapua tu kamala’birammu.
11Iatu mai to Arwad sia to Khelek sibendanan dao lu rinding tembo’mu, sia to Gamad dao lu menaramu; iatu mai balulangna natoke’ dio lu mintu’ rinding tembo’mu tiku lao; tau iato mai umpasundun kamaballoammu.
12Iatu to Tarsis iamo musipa’balukan, belanna iatu balukammu seba’; napasituka’ salaka, bassi, tumarra pute sia tumarra lotong tu balukammu.
13Iatu to Yawan, to Tubal sola to Mesekh musipa’balukanan duka; napasituka’ tau dibaluk sia pareanan tambaga tu balukammu.
14Dio mai Bet-Togarma nabaa tau tu darang, darang sia keledai sakean sia bagala’, napasituka’ balukammu.
15Iatu to Dedan musipa’balukanan duka; budamo tu tondok ma’biring tasik munii ma’baluk; nabammoko tu gading sia kayu lotong la napokasuiyan.
16Iatu to Aram musipa’balukanan belanna buda tu panggaragammu; iatu balukammu napasituka’ parimata ake’ lotong, parada lango-lango makaseda, sampin disulan ma’rupa-rupa oki’na; lenang, gewang, sia ake’ pute.
17Iatu to Yuda sia tondok Israel musipa’balukanan; iatu balukammu napasituka’ gandung dio mai Minit, muru, tani’ enoan, minna’ sia minna’ pedampi.
18Iatu to Damsyik musipa’balukanan belanna buda tu panggaragammu, sia belanna iatu mai balukan seba’; iatu balukammu napasituka’ anggoro’ dio mai Helbon sia bulu domba dio mai Sakhar.
19Iatu to Wedan sola to Yawan dio mai Uzal musipa’balukanan bassi ditampa, iatu apa nabalukan tau lako kalemu den duka bangle sia kariango.
20Iatu to Dedan musipa’balukanan sampin dilapikan darang.
21Iatu to Arab sola mintu’ arungna Kedar musipa’balukanan; iatu tau iato mai umbalukan anak domba, domba laki sia bembe’ laki lako kalemu.
22Iatu to ma’baluk dio mai Syeba sia Raema musipa’balukanan; iatu balukammu napasituka’ pebangki’ masuli’ allinna, ma’rupa-rupa parimata sia bulaan.
23Iatu to Haran, to Kane sia to Eden, to ma’baluk dio mai Syeba, Asyur sia Kilmad musipa’balukanan duka.
24Iatu tau iato mai umbalukan pakean mala’bi’, bayu lamba’ lango-lango sia disulan ma’rupa-rupa oki’na, parmadani paroki’ sia pangulang kapua.
25Mintu’ kappala’ Tarsis sae umbangko balukan. Iamoto ammu sara’ naponnoi balukan lan atena tasik.
26Napalanmoko pebosemu tama tasik kalua’ – nabuangko angin rampe matallo lan atena tasik.
27Iatu kasugirammu, iananmu sia balukammu, iatu pallopimmu sia duru mudimmu, to umpemeloiko sia to ma’baluk, sia mintu’ surodadummu, tu dio kalemu, ondongpi mintu’ to dio kalemu – tau iato mai malabu lan atena tasik, ke allo kamalabuammu.
28Belanna pekaindo’ rantangna duru mudimmu, anna ma’parondo tu bombang umbassan-bassan.
29Attu iato iatu mintu’ pebose, iatu pallopi sia duru mudi untampemo kappala’na, anna kendek langngan gantanan.
30Tau iato mai silallakan untangi’iko sia mapalla tongan anna ma’urrukan, napalangnganni barra’-barra’ tu ulunna sia mentombang lan to’ au.
31Belanna diona iko anna ma’galettung tu tau iato mai anna ma’pakean karoro’; belanna kamapallanna penaanna anna tangi’ko misa’ bating mepandingan tongan.
32Ma’urrukammi nasa’burangko misa’ bating, sia nagenterangko misa’ badong merio-rio, nakua: Mindara tu nasusian Tirus, malabu lan atena tasik?
33Iatonna rampo lan mai tasik tu barang apammu, mupediarammi ba’tu pira-pira bangsa; iatu ianan kambanmu sia balukanmu mupasugiran mintu’ datu lan lino.
34Totemo sanggangmoko, lanna’moko diong tasik, sia tallanmoko diong uai mandalan; iatu balukammu sia mintu’ to untorroiko sangmalabuammoko sola.
35Mintu’ to ma’tondok dio biring tasik tiramban untiroko: Mintu’ datunna karrang bulunna magiang, sia pa’de deata bang.
36Iatu to ma’baluk dio lu mintu’ bangsa untelleko, dadimoko misa’ apa megiangan, lanna’moko sae lakona!