Dual PanelPa’nubua’ diona ukunganna Mesir
1Iatonna taun ma’pessangpulo, bulan ma’pessangpulo, allo ma’pessangpulo duanna bulan iato, rampomi tu kadanNa PUANG lako kaleku Nakua:
2E ma’rupa tau, mentingo lakoko Firaun, datu Mesir, ammu ma’nubua’ unneai sia unneai tu mintu’ tondok Mesir.
3Ma’kadako mukua: Inde sia tu kadanNa Puangta PUANG, Nakua: Manassa la Kulaoiko, Firaun, datu Mesir, ikomo naga mawatang, sumpandan lan tangnga messarakna salu Nilmu, tu ma’kada kumua: Aku puangna tu messarakna Nilku, sia aku kalena umpadadianni kaleku.
4La Kupakadangi kadangan tu parangka sadangmu sia la Kupala’ka’ nasang lako sissikmu tu bale lan messarakna salu Nilmu; angKu alako lan mai messarakna salu Nilmu sisola mintu’ bale lan messarakna Nilmu, tu la’ka’ dio sissikmu.
5Sia la KupembuangangKo tama padang pangallaran, iko sola mintu’ bale lan messarakna salu Nilmu. Dio rante kalua’ la munii melenten; tae’ mula diendekan ba’tu diala; la Kusorongko napokande olo’-olo’ dao kuli’na padang sia manuk-manuk dao lu langi’.
6Anna tandai mintu’ to lan Mesir, kumua Akumo tu PUANG, belanna tau iato mai tekken bulona to Israel.
7Ianna la’ka’iko limanna tu tau iato mai, tibangkoko sia mupatipa’pak tu palempengna sola nasang; ianna sissareiko, le’tomoko sia mupopa’lento-lento tu aakna.
8Iamoto, inde sia tu kadanNa Puangta PUANG, manassa la Kupata’paiko misa’ pa’dang, angKu sabu’i tu mintu’ tau sia olo’-olo’ dio mai kalemu,
9naurunganni mempadang lo’bang sia daun-lauan tu tondok Mesir, anna tandai tau iato mai kumua Akumo tu PUANG. Belanna mukua: Aku puangna tu Nil, aku kalena umpadadii,
10manassa iamoto mentingoNa’ lako kalemu la unnukungko sia iatu messarakna salu Nilmu sia la Kupopendaunlauan nasang tu tondok Mesir sia padang talo randuk dio mai Migdol sae lako Siene, tarru’ lako katonanna tondok Etiopia.
11Tae’ nala unnolai tau ondongpi tae’ nala unnolai olo’-olo’; sia tae’ misa’ tau la torro dio patangpulo taunna.
12La Kupopempadang lo’bang tu tondok Mesir dio lu mintu’ tondok sanggang; iatu mintu’ kotana la mempadang lo’bang dio lu mintu’ kota ro’pok, patangpulo taunna; sia la Kupatisambo’ tu to Mesir dio lu mintu’ bangsa sia la Kupasisarak-sarak lako mintu’ tondok.
13Belanna inde sia tu kadanNa Puangta PUANG, Nakua: Iake upu’mi patangpulo taunna, la Kupasirampunmo tu to Mesir dio mai mintu’ bangsa, tu nanii sisarak-sarak.
14Angku pasulei tama dandanna tu to Mesir sia la Kupasule lako tondok Patros, tama tondok kadadianna, anna inde to dio la dadi misa’ kadatuan bitti’ tu tau iato mai.
15Iamo la bitti’na dio lu mintu’ kadatuan, naurunganni tae’mo nakullei la undaoanni tu mintu’ bangsa; la Kupabitti’, naurunganni tae’mo nala umparenta mintu’ bangsa.
16Sia attu iato tae’mo nala den apa narannuan to Israel, iamotu misa’ apa ma’pakilala diona sala, ke naturu’i tau iato mai tu to Mesir. Anna tandai tau iato mai, kumua Akumo tu Puangta PUANG.
17Iatonna taun ma’penduangpulo mpitu, bulan bunga’na, allo bunga’na bulan iato, rampomi tu kadanNa PUANG lako kaleku Nakua:
18E ma’rupa tau, iatu Nebukadnezar, datu Babel ussuamo surodadunna ungkarang pengkarangan masang urrarii Tirus; iatu mintu’ ulunna mapesemo sia palempengna tipa’pakmo, apa la ia la iatu surodadunna tae’ apa napolean sonda ra’ta’na urrarii Tirus.
19Iamoto, inde sia tu kadanNa Puangta PUANG: Manassa la Kuben Nebukadnezar, datu Babel, tu tondok Mesir, kumua naalai tu kasugiranna, sia narampai sia nasarrinni tu sisalingna; iamotu sonda ra’ta’na surodadunna.
20La Kuben tu tondok Mesir sondona ra’ta’na, belanna nakarangmo tu pengkarangangKu, kadanNa Puangta PUANG.
21Attu iato la Kupamu’kuran misa’ tanduk tu to Israel sia la Kupabaraniko ma’kada dio lu tau iato mai. Anna tandai tau iato mai, kumua Akumo tu PUANG.