Dual PanelUkungan urrampoi Mesir
1Rampomi tu kadanNa PUANG lako kaleku, Nakua:
2E ma’rupa tau, ma’nubua’ko sia ma’kadako mukua: Inde sia tu kadanNa Puangta PUANG, Nakua: Umbatingkomi, a’a, tu allo iato!
3Belanna maruku’mo tu allo, ondongpi maruku’mo tu alloNa PUANG, iamotu misa’ allo saleburan, nalambi’mo tu attunna mintu’ bangsa.
4La narampoi pa’dang tu Mesir, sia nanii kama’parondoan tu Etiopia, ketibambangmi tu to dipatei lan Mesir sia iake naalami tau tu kasugiranna sia disanggang tu parandanganna.
5Iatu to Etiopia, to Put, to Lud, sia mintu’ bangsa pantan tama, to Kub sia mintu’ tau lan mai tondok tu mangkamo nasibassean tau iato mai, la tibambang sola nakande pa’dang.
6Inde sia tu kadanNa PUANG, Nakua: Iatu mintu’ tau ussande’ Mesir la tibambang nasang; la pa’de tu kataromposan nasattuanna. Randuk dio mai Migdol sae lako Siene inde to dio la nanii tibambang tu tau iato mai nakande pa’dang, kadanNa Puangta PUANG.
7La sanggang dio lu mintu’ tondok sanggang, la daun-lauan tu kotana dio lu mintu’ kota daun-lauan.
8Sia anna tandai tau iato mai kumua: Akumo tu PUANG, ke kupadukkui api lan tu Mesir sia disanggang tu mintu’ to untundui.
9Allo iato la sun dio mai Kaleku tu pesua ma’kappala’ la umpatirambanni tu to Etiopia masalio, sia la den kama’parondoan dio lu tau iato mai ke allona Mesir. Belanna manassa la sae!
10Inde sia tu kadanNa Puangta PUANG, Nakua: Manassa la Kuputtai tu kabudanna to Mesir tete dio limanna Nebukadnezar, datu Babel.
11Iamo sola bangsana, iamotu misa’ bangsa tarru’ masa’ga’ la disolan lako Mesir la ussanggangi tu tondok iato: iatu tau iato mai la unnonok pa’dangna ullaoi Masir, anna pasitutu’i to dipatei tu tondok iato.
12La Kupamarangke tu messarakna salu Nil sia iatu tondok iato la Kusorongan to bulituk; la Kusanggang tu tondok iato sola tu mintu’ apa lan tete dio limanna to tama sae. Akumo, PUANG, tu mangka umpokadai tu iannato.
13Inde sia tu kadanNa Puangta PUANG, Nakua: Manassa la Kusanggang tu mintu’ rapang-rapang dipodeata sia Kuputtai tu kapenomban tang tongan dio mai Memfis; sia tae’mo tu to Mesir la dadi arung. Sia la Kuparampoi kamatakuran tu tondok Mesir,
14la Kusanggang tu Patros, la Kupadukkui api tu Soan sia la Kuparampoi ukungan tu Tebe.
15La Kubarrakan tu kare’dekan ara’Ku lako Sin, tambakukunna Mesir, sia la Kusabu’i tu kabudanna to lan Tebe.
16La Kupadukkui api tu Mesir, sia la ma’parondo tongan tu Sin; na iatu Tebe la dipoka-poka; na iatu Nof la nalaoi ualinna, ke allo!
17Iatu mai to manguranna On sia Pi-Beset la tibambang nakande pa’dang sia iatu to lan tondok iato la male dipali’.
18La membali malillin tu allo dio Tahpanhes, ke Kupokami tu kuasanna to Mesir inde to dio. Disanggangmo tu kamatotoran nasattuanna; la nasamboi salebu’ sia la male dipali’ tu mai anakna baine.
19SusiMo’to la umparampoi ukungan tu Mesir, anna tandai tau iato mai, kumua Akumo tu PUANG.
20Iatonna taun ma’pessangpulo misa, bulan bunga’na, allo ma’pempitu bulan iato, rampomi tu kadanNa PUANG lako kaleku Nakua:
21E ma’rupa tau, iatu takia’na Firaun, datu Mesir, mangkamo Kurebong; manassa tae’mo nala mondo, moi dipori sia dibi’bi’, naurunganni matoto’ sule la untoe pa’dang.
22Iamoto, inde sia tu kadanNa Puangta PUANG, Nakua: Manassa la Kulaoi tu Firaun, datu Mesir, sia la Kurebong tu takia’na patomali, la iatu mawatangnapa, la iatu rebongnamo, sia la Kuparonno’ tu pa’dang dio mai limanna.
23La Kupatisambo’ tu to Mesir dio lu mintu’ bangsa sia la Kupatitale’ dio lu mintu’ tondok.
24Iatu takia’na datu Babel la Kupamawatang sia la Kupatoei pa’dangKu, apa iatu takia’na Firaun la Kurebong, naurunganni sumarro dio olona susi sarrona to mandalan bangkena.
25Ondongpi iatu takia’na datu Babel la Kupamawatang, apa iatu takia’na Firaun la langga’; anna tandai tau iato mai, kumua Akumo tu PUANG, ke Kupatoei pa’dangKu tu datu Babel, anna ayakki tu tondok Mesir.
26La Kupatisambo’ tu to Mesir dio lu mintu’ bangsa sia la Kupatitale’ dio lu mintu’ tondok. Anna tandai tu tau iato mai, kumua Akumo tu PUANG.