Dual PanelPUANG kalena tu to mangkambi’ masokanna taunNa
1Rampomi tu kadanNa PUANG lako kaleku Nakua:
2E ma’rupa tau, ma’nubua’ko unnea mintu’ to mangkambi’na Israel, ma’nubua’ko sia ma’kadako lako tau iato mai, iamotu to mangkambi’, mukua: Inde sia tu kadanNa Puangta PUANG, Nakua: Upu’ allona tu to mangkambi’na Israel, tu kalena manna nakambi’! Iatu mai to mangkambi’ tang dombaraka ia tu sipatu nakambi’?
3Iatu lompona mikande, sia mipotamangkale tu bulunna, apa tae’ ammi kambi’i tu mai domba iato.
4Iatu tang nabelanna tae’ mipamatoto’i, iatu masakinna tae’ midampii, iatu dibangkeinna tae’ mibimbinni, iatu pusanna tae’ mipasulei sia iatu pa’dena tae’ midaka’i sangadinna makarra’komi sia masa’ga’komi umparentai.
5Tisambo’-sambo’mi tu tau iato mai, belanna tae’ to mangkambi’na, sia napokande mintu’ olo’-olo’ dio lu padang, susimoto tu tau iato mai tisambo’-sambo’.
6Iatu mai dombaku pusa dao lu mintu’ buntu sia dao lu mintu’ tanete madao; sia tisambo’-sambo’ tu mai dombaku dao te kuli’na padang, na moi misa’ tau tae’ bang umpoinaai, ba’tu undaka’i.
7Iamoto, perangii tu kadanNa PUANG, e mintu’ to mangkambi’.
8La lelukraka tuoKu, kadanNa Puangta PUANG, belanna iatu dombaKu naporampan sia napokande mintu’ olo’-olo’ dio lu padang kataeranna to mangkambi’na – belanna iatu mai to mangkambi’ku tae’ napoinaai tu mai dombaKu; iatu mai to manglaa kalena manna nakambi’, apa iatu mai dombaKu tae’ nakambi’s-
9iamoto, e kamu mintu’ to mangkambi’ perangiimi tu kadanNa PUANG.
10Inde sia tu kadanNa Puangta PUANG, Nakua: Manassa la Kulaoi tu to mangkambi’ iato! La Kutuntun tu mai dombaKu dio mai limanna, sia la Kupasoro’ mangkambi’. Iatu to mangkambi’ tae’mo anna ungkambi’ kalena, sia la Kurampanan tu dombaKu lan mai sadangna, naurunganni tae’mo napokandei tau iato mai.
11Belanna inde sia tu kadanNa Puangta PUANG, Nakua: Manassa Aku kalena la umpoinaai tu mai dombaKu sia la untiroi;
12Susi misa’ to mangkambi’ untiro baanan dombana, ke dioi lu tangnga domba tisambo’-sambo’na, la susi dukaNa’ to untiro dombaKu sia urrampananni dio mai mintu’ inan, tu nanii tisambo’ male tonna allo massalebu’ sia mapittuk.
13AngKu solanni tassu’ tu tau iato mai dio mai mintu’ bangsa sia la Kupasipulung dio mai mintu’ tondok, angKu baai lako padangna; sia la Kukambi’ dao lu mintu’ buntunna Israel, dio lu randan salu’-salu’ sia lako mintu’ inan tu nanii tau torro, lan tu tondok.
14Tau iato mai la Kukambi’ dio lu padang maluna riunna sia iatu inan dinii ungkambi’i la dao buntu malangka’na Israel. Inde to la nanii silengaran lan inan melo dinii ungkambi’i sia ungkande riu dio lu padang malompo dao lu mintu’ buntu Israel.
15Aku kalena la ungkambi’i tu mai dombaKu sia Aku kalena umpalenga’i, kadanNa Puangta PUANG.
16Iatu mai pa’dena la Kudaka’ sia iatu pusanna la Kupasule; iatu dibangkeinna la Kubimbin sia iatu masakinna la Kupamatoto’, apa iatu malompona sia iatu mawatangna la Kusanggangi. La Kukambi’ susi sipatunna dipogau’.
17Na kamu, e dombaKu, kadanNa Puangta PUANG, manassa la Kupaolai salunna simisanan tu domba sia bembe’ – tu mai domba laki sola bembe’ laki –.
18Tang namosoporokomika ungkandei tu riu maluna dio padang lompo, ammi lullu’i lette’mi tu mai tang mipuranna; tang namosoporokomika unniru’i tu uai malinnong, ammi lutu-lutui lette’mi tu torrona?
19Sipaturaka tu mai dombaku ungkandei tu apa mangka nalullu’ lette’mi sia unniru’i tu apa mangka nalutu-lutu lette’mi?
20Iamoto, inde sia tu kadanNa Puangta PUANG lako tau iato mai, Nakua: Manassa Aku kalena la umpaolai salu tu domba malompo na iatu domba madoko.
21Belanna miparussunni sa’demi sia palempengmi tu tang nabelanna sia mipaserokki tandukmi sae lako miula’ lako salian,
22iamoto la Kurampanan tu mai dombaKu, damo nadipakande; la Kupaolai salunna tu domba misa’ sola tu misa’nao.
23Attu iato la Kuangka’ tu misa’ to mangkambi’ dio lu tau iato mai, tu la ungkambi’i, iamotu Daud, taungKu. Iamoto tu la ungkambi’i tau iato mai, sia dadi to mangkambi’na tau iato mai.
24Akumote, tu PUANG, la napoKapenomban, anna Daud, taungKu, la dadi arung dio lu tau iato mai. Akumote, tu PUANG mangka umpokadai tu iannato.
25La untananNa’ misa’ basse kamarampasan sola tau iato mai sia la Kusarapai tu mintu’ olo’-olo’ masuru lan mai tondok iato, naurunganni ma’din torro marampa’ tu tau iato mai dio padang aak sia mamma’ lan lu pangala’.
26La Kupadadi kamauparan tu tau iato mai, ondongpi tu mintu’ apa untikui taneteKu, sia la Kupasaean uran ke attunnai; la dadi uran ma’palobo’.
27Iatu mai mintu’ kayu dio lu padang la umpalao buanna sia iatu padang la umpakendek burana. La manaman tu tau iato mai tuo dio lu padangna. Anna tandai, kumua Akumo tu PUANG, ke Kurebongi tu batang ayokana sia Kurampanan lan mai limanna to umpokaunanni.
28Natae’mo naporampanni mintu’ bangsa, sia tae’mo nala ungkandei olo’-olo’ dao kuli’na padang, sangadinna la torro marampa’ sia moi misa’ tau tae’mo umpatiramban lenni.
29La Kupakendekan bura padang kalelean tu tau iato mai, naurunganni tae’mo tau lan tondok iato nabaa karorian sia tae’mo la umpassanni tu pelo’bona mintu’ bangsa.
30Anna issanni, kumua Akumo tu PUANG, Kapenombanna, urrondongi, na tau iato mai, iamotu to Israel, taungKu, kadanNa Puangta PUANG.
31Kamumo tu dombaKu, iamotu domba Kukambi’; kamumo tu tolino, na Aku tu Kapenombammi, kadanNa Puangta PUANG.